ಕಮಲ್ ಹಾಸನ್–ಮಣಿರತ್ನಂ ಜೋಡಿಯ ‘ಥಗ್ ಲೈಪ್‌‘ ಸಿನಿಮಾ 2025ರ ಜೂನ್ 5ರಂದು ತೆರೆಗೆ
‘ಥಗ್ ಲೈಪ್‌‘
ಬೆಂಗಳೂರು: ಕಮಲ್ ಹಾಸನ್ ಅಭಿನಯದ ಮತ್ತು ಮಣಿರತ್ನಂ ನಿರ್ದೇಶನದ 'ಥಗ್ ಲೈಫ್' ಚಿತ್ರ ವಿಶ್ವದಾದ್ಯಂತ 2025ರ ಜೂನ್ 5ರಂದು ಚಿತ್ರಮಂದಿರಗಳಲ್ಲಿ ತೆರೆಕಾಣಲಿದೆ.
ಕಮಲ್ ಹಾಸನ್ ಅವರ 70ನೇ ವರ್ಷದ ಜನ್ಮದಿನದ ಈ ಸಂದರ್ಭದಲ್ಲಿ ನಿರ್ಮಾಪಕರು ಚಿತ್ರದ ಬಿಡುಗಡೆ ದಿನಾಂಕವನ್ನು ಘೋಷಣೆ ಮಾಡಿದರು. ಕಮಲ್ ಹಾಸನ್ ಅವರು ಇಂದು (ನ.7) 70ನೇ ವರ್ಷಕ್ಕೆ ಕಾಲಿಟ್ಟರು. ಅವರಿಗೆ ಸಿನಿಮಾ, ರಾಜಕೀಯ ರಂಗದ ಗಣ್ಯರು ಸೇರಿದಂತೆ ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳ ಮೂಲಕ ಜನ್ಮದಿನದ ಶುಭಾಶಯ ಕೋರಿದರು.
ಕಮಲ್ ಹಾಸನ್ ಅವರ ರಾಜ್‌ ಕಮಲ್ ಫಿಲಂಸ್‌ ಕೂಡ ಎಕ್ಸ್ ಖಾತೆಯಲ್ಲಿ ಈ ಮಾಹಿತಿ ಹಂಚಿಕೊಂಡಿದೆ. ಉದಯ್‌ನಿಧಿ ಸ್ಟಾಲಿನ್‌ ಅವರ ರೆಡ್‌ಗೈಂಟ್‌ ಮೂವೀಸ್‌, ರತ್ನಂ ಅವರ ಮದ್ರಾಸ್ ಟಾಕೀಸ್ ಮತ್ತು ಕಮಲ್ ಹಾಸನ್ ಅವರ ರಾಜ್‌ ಕಮಲ್ ಫಿಲಂಸ್‌ ಒಟ್ಟಾಗಿ ಈ ಚಿತ್ರವನ್ನು ನಿರ್ಮಿಸುತ್ತಿವೆ.
ಸಿಲಂಬರಸನ್, ತ್ರಿಶಾ, ಅಶೋಕ್ ಸೆಲ್ವನ್, ಅಭಿರಾಮಿ, ನಾಸಿರ್‌, ಜೋಜು ಜಾರ್ಜ್, ಐಶ್ವರ್ಯ ಲೇಖಿ, ಅಲಿ ಫಜಲ್ ಸೇರಿದಂತೆ ಮುಂತಾದವರು ತಾರಾಗಣದಲ್ಲಿದ್ದಾರೆ.
35 ವರ್ಷಗಳ ನಂತರ ಕಮಲ್ ಹಾಸನ್–ಮಣಿರತ್ನಂ ಜೋಡಿ ‘ಥಗ್ ಲೈಫ್‘ ಸಿನಿಮಾದಲ್ಲಿ ಒಂದಾಗಿದೆ. ಇದು ದಿಗ್ಗಜ ನಟ ಕಮಲ್ ಹಾಸನ್ ಅವರ 234ನೇ ಚಿತ್ರವಾಗಿದೆ. ಈ ಜೋಡಿ 1987ರಲ್ಲಿ ನಾಯಗನ್‌ ಸಿನಿಮಾದೊಂದಿಗೆ ಇತಿಹಾಸವನ್ನೇ ಸೃಷ್ಟಿಸಿತ್ತು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.