‘ನಾ ನಿನ್ನ ಬಿಡಲಾರೆ’ಯ ರಾಯರ ಹಾಡು

ಅನಂತ್‌ ನಾಗ್‌, ಲಕ್ಷ್ಮಿ ಜೋಡಿಯಾಗಿ ನಟಿಸಿದ್ದ ‘ನಾ ನಿನ್ನ ಬಿಡಲಾರೆ’ ಚಿತ್ರದಲ್ಲಿ ‘ಬಿಡೆನು ನಿನ್ನ ಪಾದ’ ಹಾಡು ಬಹಳ ಜನಪ್ರಿಯವಾಗಿತ್ತು. ಇದೀಗ ‘ನಾ ನಿನ್ನ ಬಿಡಲಾರೆ’ ಶೀರ್ಷಿಕೆ ಹೊಂದಿರುವ ಚಿತ್ರವೊಂದು ಬಿಡುಗಡೆಗೆ ಸಿದ್ಧವಾಗಿದ್ದು, ಚಿತ್ರತಂಡ ‘ಗುರು ಸಾರ್ವಭೌಮಂ..ಗುರು ರಾಘವೇಂದ್ರಂ’ ಎಂಬ ರಾಯರ ಕುರಿತಾದ ಭಕ್ತಿಗೀತೆಯನ್ನು ಇತ್ತೀಚೆಗಷ್ಟೇ ಬಿಡುಗಡೆಗೊಳಿಸಿದೆ. 

ನವೀನ್ ಜಿ.ಎಸ್ ನಿರ್ದೇಶಿಸಿರುವ ಸಸ್ಪೆನ್ಸ್‌, ಥ್ರಿಲ್ಲರ್‌ ಕಥೆ ಹೊಂದಿರುವ ಚಿತ್ರ ನವೆಂಬರ್ 29ಕ್ಕೆ ತೆರೆಗೆ ಬರಲಿದೆ. ಕಮಲ ಉಮಾ ಭಾರತಿ ಪ್ರೊಡಕ್ಷನ್ಸ್ ಬ್ಯಾನರ್ ಅಡಿಯಲ್ಲಿ, ಭಾರತಿ ಬಾಳಿಯವರು ಈ ಚಿತ್ರವನ್ನ ನಿರ್ಮಿಸಿದ್ದಾರೆ. ಪಂಚಿ ಚಿತ್ರದ ನಾಯಕ. ಅಂಬಾಲಿ ಭಾರತಿ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ.

ವೀರೇಶ್ ಎಸ್.ಛಾಯಾಚಿತ್ರಗ್ರಹಣ, ಎಮ್.ಎಸ್.ತ್ಯಾಗರಾಜು ಸಂಗೀತ, ದೀಪಕ್ ಸಿ.ಎಸ್ ಸಂಕಲನ ಚಿತ್ರಕ್ಕಿದೆ. ಸೀರುಂಡೆ ರಘು,ಕೆ.ಎಸ್.ಶ್ರೀಧರ್,ಶ್ರೀನಿವಾಸ್ ಪ್ರಭು,ಹರಿಣಿ ಮುಂತಾದವರು ಚಿತ್ರದಲ್ಲಿದ್ದಾರೆ.