ಕಿರಿಕ್ ಪಾರ್ಟಿ 2 ಕರ್ಣ ಇರ್ತಾನೆ, ಸಾನ್ವಿ ಇರಲ್ಲ!
ರಕ್ಷಿತ್ ಶೆಟ್ಟಿ ಅವರು ‘ಕಿರಿಕ್ ಪಾರ್ಟಿ 2’ ಸಿನಿಮಾ ವೀಕ್ಷಕರ ಮುಂದೆ ಬರಲಿದೆ ಎಂದು ಟ್ವೀಟ್ ಮಾಡಿದ್ದು ಹಲವು ಊಹಾಪೋಹಗಳಿಗೆ ಮೂಲವಾಗಿತ್ತು. ‘ರಕ್ಷಿತ್ ಮತ್ತು ರಶ್ಮಿಕಾ ಮಂದಣ್ಣ ಜೋಡಿ ತೆರೆಯ ಮೇಲೆ ಪುನಃ ಒಂದಾಗಲಿದೆ’ ಎಂಬುದು ಈ ಸಿನಿಮಾ ವಿಚಾರವಾಗಿ ಹರಡಿದ್ದ ಊಹಾಪೋಹಗಳಲ್ಲಿ ಒಂದು.
ಆದರೆ, ರಶ್ಮಿಕಾ ಅವರು ‘ಕಿರಿಕ್ ಪಾರ್ಟಿ 2’ರಲ್ಲಿ ಇರುವುದಿಲ್ಲ ಎಂಬುದು ಖಚಿತವಾಗಿದೆ. ‘ಅವರು ಹೊಸ ಸಿನಿಮಾದಲ್ಲಿ ಇರುತ್ತಾರೆಯೇ ಎಂಬ ಪ್ರಶ್ನೆಯೇ ಅಪ್ರಸ್ತುತ’ ಎನ್ನುವ ಉತ್ತರ ಕೂಡ ರಕ್ಷಿತ್ ಬಳಗದ ಕಡೆಯಿಂದ ಬಂದಿದೆ! ಏಕೆಂದರೆ, ರಶ್ಮಿಕಾ ನಿಭಾಯಿಸಿದ್ದ, ಹದಿಹರೆಯದವರ ಮನಸ್ಸು ಕದ್ದ ‘ಸಾನ್ವಿ’ ಪಾತ್ರ ‘ಕಿರಿಕ್ ಪಾರ್ಟಿ’ ಚಿತ್ರದಲ್ಲಿಯೇ ಕೊನೆಯಾಗಿದೆಯಲ್ಲ?!
‘ಆ ಪಾತ್ರ ಪುನಃ ಜೀವ ಪಡೆದು, ಕಿರಿಕ್ ಪಾರ್ಟಿಯ ಎರಡನೆಯ ಭಾಗದಲ್ಲಿ ಕಾಣಿಸಿಕೊಳ್ಳುವುದು ಎಲ್ಲಾದರೂ ಉಂಟೇ’ ಎಂಬ ಪ್ರಶ್ನೆ ಬಂದಿದೆ ‘ಕಿರಿಕ್...’ ತಂಡದ ಕಡೆಯಿಂದ. ‘ಈ ಚಿತ್ರದ ಎರಡನೆಯ ಭಾಗದ ಕಥೆಯು ಪರಿಕಲ್ಪನೆಯ ರೂಪದಲ್ಲಿ ಸಿದ್ಧವಾಗಿದೆ. ಆದರೆ, ಸಿನಿಮಾ ಸಿದ್ಧವಾಗಿ ವೀಕ್ಷಕರ ಎದುರು ಬರಲು ಇನ್ನೂ ಸಮಯ ಬೇಕು. ರಿಷಬ್ ಶೆಟ್ಟಿ ಅವರು ರುದ್ರಪ್ರಯಾಗ ಚಿತ್ರದ ಕೆಲಸ ಪೂರ್ಣಗೊಳಿಸಬೇಕು, ರಕ್ಷಿತ್ ಅವರು ಪುಣ್ಯಕೋಟಿ ಸಿನಿಮಾ ಕೆಲಸ ಮುಗಿಸಬೇಕು. ಅದಾದ ನಂತರ ಈ ಸಿನಿಮಾ’ ಎನ್ನುತ್ತವೆ ಮೂಲಗಳು.
‘ಕಿರಿಕ್‌ನ ಎರಡನೆಯ ಭಾಗದ ಕಥೆಯು ಕಾಲೇಜಿನ ಸುತ್ತವೇ ಇರುವ ಸಾಧ್ಯತೆ ಇದೆ. ಕರ್ಣ ಮತ್ತು ಅವನ ಸ್ನೇಹಿತರು ಓದಿದ ಕಾಲೇಜಿನ ಜೊತೆ ಕನೆಕ್ಟ್‌ ಆಗುವ ಅಂಶಗಳೂ ಇದರಲ್ಲಿ ಇರುತ್ತವೆ. ಹಿಂದಿನ ಚಿತ್ರದಲ್ಲಿ ಕೆಲಸ ಮಾಡಿದ್ದ ತಂತ್ರಜ್ಞರೇ ಹೊಸ ಚಿತ್ರದಲ್ಲಿಯೂ ಇರಲಿದ್ದಾರೆ. ಆದರೆ, ಪಾತ್ರಗಳಲ್ಲಿ ಒಂದಿಷ್ಟು ಬದಲಾವಣೆಗಳು ಆಗಬಹುದು’ ಎಂದು ರಕ್ಷಿತ್ ಆಪ್ತರು ಹೇಳುತ್ತಾರೆ.
ಅಂದಹಾಗೆ, ಹೊಸ ಚಿತ್ರದ ಎರಡನೆಯ ಭಾಗದ ನಿರ್ದೇಶನದ ಹೊಣೆ ಯಾರದ್ದು ಎಂಬ ಪ್ರಶ್ನೆ ಕೇಳುವ ಅಗತ್ಯವೇ ಇಲ್ಲವಂತೆ. ‘ಅದನ್ನು ರಿಷಬ್ ಅವರೇ ನಿಭಾಯಿಸಲಿದ್ದಾರೆ’ ಎಂಬುದು ಖಚಿತ ವರ್ತಮಾನ. ಆದರೆ ಕರ್ಣನ ಜೊತೆ ತೆರೆಯ ಮೇಲೆ ಯಾರು ಹೆಜ್ಜೆ ಹಾಕುತ್ತಾರೆ ಎಂಬ ಗುಟ್ಟು ರಟ್ಟಾಗಿಲ್ಲ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.