ಈ ವಾರ ಎರಡು ಸಿನಿಮಾಗಳು ತೆರೆಗೆ

ಕಳೆದ ಎರಡು ವಾರಗಳಿಗೆ ಹೋಲಿಸಿದರೆ ಈ ವಾರ ತೆರೆಗೆ ಬರುತ್ತಿರುವ ಸಿನಿಮಾಗಳ ಸಂಖ್ಯೆ ಗಣನೀಯವಾಗಿ ಕುಸಿದಿದೆ. ಚಿತ್ರಮಂದಿರಗಳಿಗೆ ಜನವೇ ಬಾರದೇ ಬಿಡುಗಡೆಗೊಂಡ ಬಹುತೇಕ ಚಿತ್ರ ಪ್ರದರ್ಶನಗಳು ರದ್ದಾಗುತ್ತಿರುವುದು ನಿರ್ಮಾಪ‍ಕರನ್ನು ಕಂಗೆಡಿಸಿದೆ. ಮುಂದಿನ ವಾರ ತೆರೆ ಕಾಣುತ್ತಿರುವ ‘ಭೀಮ’ ಸಾಕಷ್ಟು ಚಿತ್ರಮಂದಿರಗಳನ್ನು ಆಕ್ರಮಿಸಿಕೊಳ್ಳಲಿದೆ. ಈ ಎಲ್ಲ ಕಾರಣಗಳಿಂದಾಗಿ ಈ ವಾರ ಕೇವಲ ಎರಡು ಚಿತ್ರಗಳು ಮಾತ್ರ ತೆರೆಗೆ ಬರುತ್ತಿವೆ.

ಅಡವಿಕಟ್ಟೆ:

ನಟ ಅಭಿಜಿತ್ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ‘ಅಡವಿಕಟ್ಟೆ’ ಚಿತ್ರ ತೆರೆ ಕಾಣುತ್ತಿದೆ. ಉಮ ಎಸ್ ನಿರ್ಮಿಸಿ, ಸಂಜೀವ್ ಗಾವಂಡಿ ನಿರ್ದೇಶಿಸಿರುವ ಈ ಚಿತ್ರ ಸಸ್ಪೆನ್ಸ್ ಥ್ರಿಲ್ಲರ್ ಕಥೆ ಹೊಂದಿದೆ. ಗೋಕಾಕ್ ನಗರದ ಸುತ್ತಮುತ್ತ ಚಿತ್ರೀಕರಣಗೊಂಡಿದೆ.

ಎಸ್‌.ಎನ್‌. ಈಶ್ವರ್ ಸಂಗೀತ ನಿರ್ದೇಶನ, ವೀರೇಶ್ ಛಾಯಾಚಿತ್ರಗ್ರಹಣವಿದೆ. ನಾಗರಾಜು, ಶಾಂತಿ ಮೊದಲಾದ ಕಲಾವಿದರು ತಾರಾಗಣದಲ್ಲಿದ್ದಾರೆ.

ಇಷ್ಕ್‌:

ಬಹುತೇಕ ಹೊಸಬರಿಂದಲೇ ಕೂಡಿರುವ ‘ಇಷ್ಕ್‌’ ಕೂಡ ತೆರೆಗೆ ಬರುತ್ತಿದೆ. ವಿನಯ್ ರಾಘವೇಂದ್ರ ವಿ ನಿರ್ದೇಶನ ಚಿತ್ರದಲ್ಲಿ ರಾಜು ತ್ಯಾಗರಾಜು ನಾಯಕನಾಗಿ ನಟಿಸಿರುವುದರ ಜೊತೆಗೆ ಬಂಡವಾಳವನ್ನು ಹೂಡಿದ್ದಾರೆ. ಶ್ವೇತಾ ಭಟ್ ಕಾರವಾರ ನಾಯಕಿ. ಶ್ರೀರಾಮ್ ಗಂಧರ್ವ ಸಂಗೀತ ಚಿತ್ರಕ್ಕಿದೆ. ನಿರ್ದೇಶಕರೇ ಛಾಯಾಚಿತ್ರಗ್ರಹಣ ಮಾಡಿದ್ದಾರೆ.  ಚೇತನ್ ದುರ್ಗ, ಶಿಲ್ಪಾಶ್ರೀ ಶಾಂತಕುಮಾರ್, ಸೃಜನ್ ಬೆಳ್ಮಣ್ಣು, ಶಶಾಂಕ್ ರಾಘವೇಂದ್ರ ಮುಂತಾದವರು ಚಿತ್ರದಲ್ಲಿದ್ದಾರೆ.