'ಮಣಿಕರ್ಣಿಕಾ: ದ ಕ್ವೀನ್ ಆಫ್ ಝಾನ್ಸಿ' ಚಿತ್ರದ ಮೊದಲ ಟೀಸರ್ ಬಿಡುಗಡೆ
ಝಾನ್ಸಿ ರಾಣಿ ಲಕ್ಷ್ಮೀಬಾಯಿ ಕುರಿತು ಸಿದ್ಧವಾಗುತ್ತಿರುವ, ನಟಿ ಕಂಗನಾ ರನೋಟ್ ಮುಖ್ಯಪಾತ್ರದಲ್ಲಿ ನಟಿಸಿರುವ 'ಮಣಿಕರ್ಣಿಕಾ: ದ ಕ್ವೀನ್ ಆಫ್ ಝಾನ್ಸಿ' ಚಿತ್ರದ ಮೊದಲ ಟೀಸರ್ ಮಂಗಳವಾರ ಬಿಡುಗಡೆಯಾಗಿದೆ. ಝಾನ್ಸಿ ರಾಣಿಯ ಪಾತ್ರಕ್ಕೆ ಪರಕಾಯ ಪ್ರವೇಶ ಮಾಡಿದವರಂತೆ ನಟಿಸಿರುವ ಕಂಗನಾ ರನೋಟ್ ಅಭಿನಯ ಗಮನ ಸೆಳೆಯುವಂತಿದೆ.
ಬ್ರಿಟಿಷರ ವಿರುದ್ಧ ಹೋರಾಡುವ ಯುದ್ಧದ ದೃಶ್ಯಗಳಲ್ಲಿ ರಾಣಿ ಲಕ್ಷ್ಮೀಬಾಯಿಯ ಪ್ರತಿರೂಪದಂತೆ ಕಂಗನಾ ಕಂಗೊಳಿಸುತ್ತಾರೆ. ಸಮರಕಲೆಗಳನ್ನು ಅಭ್ಯಾಸ ಮಾಡಲು ಕಂಗನಾ ಸಾಕಷ್ಟು ಬೆವರು ಸುರಿಸಿದ್ದಾರೆ ಎನ್ನಲು ಟೀಸರ್‌ನಲ್ಲಿ ಸಾಕ್ಷ್ಯಗಳಿವೆ. ಗಾಂಧಿಜಯಂತಿ ದಿನದಂದೇ ಚಿತ್ರದ ಮೊದಲ ಟೀಸರ್ ಬಿಡುಗಡೆಯಾಗಿರುವುದು ಮತ್ತು ಚಿತ್ರ ಬಿಡುಗಡೆಗೆ ಗಣರಾಜ್ಯೋತ್ಸವಕ್ಕೆ ಒಂದು ದಿನ ಮೊದಲು (ಜ.25) ಮುಹೂರ್ತ ಇಟ್ಟಿರುವುದು ಕೇವಲ ಕಾಕತಾಳೀಯವಾಗಲಾರದು.
ಟೀಸರ್‌ನ ಆರಂಭದಲ್ಲಿ ಅಮಿತಾಭ್‌ ಬಚ್ಚನ್‌ ತಮ್ಮ ಕಂಚಿನ ಕಂಠದಲ್ಲಿ ರಾಣಿ ಮಣಿಕರ್ಣಿಕಾ ಹಿನ್ನೆಲೆ ಕಟ್ಟಿಕೊಡುತ್ತಾರೆ. ಬ್ರಿಟಿಷರ ಯೂನಿಯನ್ ಜಾಕ್ ಧ್ವಜವನ್ನು ಕತ್ತಿಯಿಂದ ಸೀಳಿದಾಗ ನಮಗೆ ರಾಣಿಮಣಿಕರ್ಣಿಕಾ ದರ್ಶನವಾಗುತ್ತದೆ. ಬ್ರಿಟಿಷ್‌ ಸೇನೆ ವಿರುದ್ಧ ಹೋರಾಡುವ ವೀರರಾಣಿಯಾಗಿ ಕಂಗನಾ ಕಂಗೊಳಿಸುತ್ತಾರೆ. ಕತ್ತಿವರಸೆ, ಕುದುರೆ ಸವಾರಿ, ಹೋರಾಟದ ದೃಶ್ಯಗಳು ಚಿತ್ರದಲ್ಲಿ ಮೇಳೈಸಿವೆ ಎನ್ನುವುದನ್ನು ಟೀಸರ್ ಸಾರಿಹೇಳುತ್ತದೆ. ರೋಷ ಹಾಗೂ ಅಕ್ರೋಶವನ್ನು ಆವಾಹಿಸಿಕೊಂಡಿರುವ ಈ ಪಾತ್ರಕ್ಕೆ ಕಂಗನಾ ಜೀವ ತುಂಬಬಲ್ಲರೇ ಎಂದು ಪ್ರಶ್ನಿಸಿದ್ದವರು ಚಿತ್ರವನ್ನು ನೋಡಿ ಉತ್ತರ ಕಂಡುಕೊಳ್ಳಬೇಕು ಎಂದು ಟೀಸರ್ ಸಾರಿ ಹೇಳುತ್ತದೆ.
ಟೀಸರ್‌ನ ಅವಧಿ ಒಟ್ಟು ಎರಡು ನಿಮಿಷ. ಬಿಡುಗಡೆಯಾದ ಕೆಲವೇ ಗಂಟೆಗಳಲ್ಲಿ 1.5 ಲಕ್ಷಕ್ಕೂ ಹೆಚ್ಚು ಜನರು ವೀಕ್ಷಿಸಿದ್ದಾರೆ. ಜಿಶು ಸೇನ್‌ಗುಪ್ತಾ, ಸುರೇಶ್‌ ಒಬೆರಾಯ್‌, ಅತುಲ್‌ ಕುಲಕರ್ಣಿ, ಅಂಕಿತಾ ಲೋಖಂಡೆ ಇತರರ ತಾರಾಗಣವಿದೆ. ಜೀ ಸ್ಟುಡಿಯೋ ಹಾಗೂ ಕಮಲ್‌ ಜೈನ್‌ ನಿರ್ಮಾಣದ ಚಿತ್ರ ಜ.25ರಂದು ಬಿಡುಗಡೆಯಾಗಲಿದೆ.
ಈ ಚಿತ್ರಕ್ಕೆ ಕಂಗನಾ ಸಹ ನಿರ್ದೇಶಕರಾದ ಬಳಿಕ ಕೆಲ ಕಾರಣಗಳಿಂದ ಸುದ್ದಿಯಲ್ಲಿತ್ತು. ನಟ ಸೋನು ಸೂದ್‌ ಸೇರಿದಂತೆ ಅನೇಕರು ಚಿತ್ರದಿಂದ ಹೊರನಡೆದಿದ್ದರು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.