₹100 ಕೋಟಿ ಗಳಿಸಿದ 'ಸ್ಯಾಮ್ ಬಹದ್ದೂರ್' ಸಿನಿಮಾ

ಮುಂಬೈ: ಬಾಲಿವುಡ್‌ ನಟ ವಿಕ್ಕಿ ಕೌಶಲ್ ಅಭಿನಯದ 'ಸ್ಯಾಮ್ ಬಹದ್ದೂರ್' ಚಿತ್ರ ವಿಶ್ವಾದ್ಯಂತ ₹100 ಕೋಟಿ ಗಳಿಸಿದೆ ಎಂದು ನಿರ್ಮಾಪಕರು ತಿಳಿಸಿದ್ದಾರೆ.

ಚಿತ್ರದ ಬಾಕ್ಸ್ ಆಫೀಸ್ ಕಲೆಕ್ಷನ್ ಬಗ್ಗೆ ನಿರ್ಮಾಣ ಸಂಸ್ಥೆ ಆರ್‌ಎಸ್‌ವಿಪಿ ಸಾಮಾಜಿಕ ಮಾಧ್ಯಮ ಎಕ್ಸ್‌ನಲ್ಲಿ ಮಾಹಿತಿ ಹಂಚಿಕೊಂಡಿದೆ. ‘ಸ್ಯಾಮ್ ಬಹದ್ದೂರ್ ಗಲ್ಲಾಪೆಟ್ಟಿಗೆಯಲ್ಲಿ ಯಶ ಕಂಡಿದೆ. ‌ಇದಕ್ಕೆ ನಾವು(ಆರ್‌ಎಸ್‌ವಿಪಿ) ಕೃತಜ್ಞರಾಗಿರುತ್ತೇವೆ. ಈ ಚಿತ್ರ ವಿಶ್ವಾದ್ಯಂತ ₹100 ಕೋಟಿಗಿಂತ ಅಧಿಕ ಗಳಿಕೆ ಕಂಡಿದೆ. ಇದು ಅದ್ಭುತವಾದ ಸಾಧನೆ' ಸಂಸ್ಥೆ ಹೇಳಿದೆ.

ದೇಶದ ಮೊದಲ ಫೀಲ್ಡ್ ಮಾರ್ಷಲ್, ಆರ್ಮಿ ಜನರಲ್ ಸ್ಯಾಮ್ ಮಾಣಿಕ್​ ಶಾ ಅವರ ಜೀವನವನ್ನು ಆಧರಿಸಿದ ಚಿತ್ರವೇ 'ಸ್ಯಾಮ್​ ಬಹದ್ದೂರ್'.

ಸ್ಯಾಮ್ ಮಾಣಿಕ್​ ಶಾ ಅವರು 1971ರಲ್ಲಿ ನಡೆದ ಭಾರತ–ಪಾಕಿಸ್ತಾನ ಯುದ್ಧದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಇವರ ಜೀವನಾಧಾರಿತ ಚಿತ್ರದಲ್ಲಿ ವಿಕ್ಕಿ ಕೌಶಲ್​​ ಜತೆಗೆ ಸಾನ್ಯಾ ಮಲ್ಹೋತ್ರಾ, ನೀರಜ್ ಕಬಿ, ಫಾತಿಮಾ ಸನಾ ಶೇಖ್, ಎಡ್ವರ್ಡ್ ಸೊನ್ನೆನ್‌ಬ್ಲಿಕ್ ಹಾಗೂ ಮೊಹಮ್ಮದ್ ಜೀಶನ್ ಅಯ್ಯೂಬ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.

ಮೇಘನಾ ಗುಲ್ಜಾರ್ ನಿರ್ದೇಶನದ ಈ ಚಿತ್ರ ಡಿಸೆಂಬರ್ 1ರಂದು ಬಿಡುಗಡೆಯಾಗಿತ್ತು.