Miss You Movie: ಪುಷ್ಪ–2ಗೆ ನಾನೇಕೆ ಹೆದರಬೇಕು ಎಂದ ನಟ ಸಿದ್ಧಾರ್ಥ್

ಬೆಂಗಳೂರು: ನೂರಾರು ಕೋಟಿ ವೆಚ್ಚದ, ಬಹುತಾರಾಗಣದ ಹಾಗೂ ಬಹುನಿರೀಕ್ಷಿತ ಪುಷ್ಪ–2 ದಿ ರೂಲ್ ಸಿನಿಮಾ ತೆರೆಗೆ ಅಪ್ಪಳಿಸಲು ಸಿದ್ಧವಾಗಿರುವ ಬೆನ್ನಲ್ಲೇ ಇದೇ ಅವಧಿಯಲ್ಲಿ ಬಿಡುಗಡೆಗೆ ಸಿದ್ದವಾಗಿರುವ ಅನೇಕ ಚಿತ್ರಗಳಿಗೆ ಆತಂಕ ಎದುರಾಗಿದೆ.

ಪುಷ್ಪ–2 ಕಾರಣದಿಂದಲೇ ಅನೇಕ ಚಿತ್ರಗಳ ಬಿಡುಗಡೆ ಮುಂದಕ್ಕೆ ಹೋಗಿವೆ. ಆದರೆ, ನಟ ಸಿದ್ಧಾರ್ಥ್ ಅವರ ‘ಮಿಸ್ ಯೂ’ (Miss You) ಸಿನಿಮಾ ನವೆಂಬರ್ 29 ಕ್ಕೆ ತಮಿಳು, ತೆಲುಗಿನಲ್ಲಿ ಬಿಡುಗಡೆಯಾಗುತ್ತಿದೆ.

ತಮ್ಮ ಮಿಸ್ ಯೂ ಸಿನಿಮಾ ಬಗ್ಗೆ ಹೈದರಾಬಾದ್‌ನಲ್ಲಿ ನಡೆದ ಇವೆಂಟ್‌ನಲ್ಲಿ ಎದುರಾದ ಪ್ರಶ್ನೆಗೆ ಪ್ರತಿಕ್ರಿಯಿಸಿರುವ ಸಿದ್ಧಾರ್ಥ್, 'ಪುಷ್ಪ–2 ಬಿಡುಗಡೆಯಾಗುತ್ತಿರುವ ಬಗ್ಗೆ ಅದು ನನ್ನ ಸಮಸ್ಯೆ ಅಲ್ಲ. ಅದರ ಬಗ್ಗೆ ನಾನೇಕೆ ಹೆದರಬೇಕು? ಅವರು ಹೆದರಬೇಕು. ಅದೆಲ್ಲ ನನ್ನ ನಿಯಂತ್ರಣದಲ್ಲಿಲ್ಲ' ಎಂದು ಹೇಳಿದ್ದಾರೆ.

'ಸಿನಿಮಾ ಯಶಸ್ಸು ಬಿಗ್ ಬಜೆಟ್ ಸಿನಿಮಾ ಎನ್ನೋ ಕಾರಣಕ್ಕೆ ನಿರ್ಧಾರವಾಗುವುದಿಲ್ಲ' ಎಂದು ಹೇಳಿದ್ದಾರೆ.

'ಉತ್ತಮ ಸಿನಿಮಾ ಖಂಡಿತವಾಗಿಯೂ ಚಿತ್ರಮಂದಿರಲ್ಲಿರುತ್ತದೆ. ಜನ ಬಂದು ನೋಡಿಯೇ ನೋಡುತ್ತಾರೆ. ನನ್ನ ಅನೇಕ ಚಿತ್ರಗಳು ಮೊದಲ ಒಂದು ವಾರ ಸಪ್ಪೆ ಎನಿಸಿ ಆಮೇಲೆ ದೊಡ್ಡ ಹಿಟ್ ಆಗಿ ಚಿತ್ರಮಂದಿರಗಳಲ್ಲಿ ಯಶಸ್ಸು ಕಂಡಿವೆ' ಎಂದರು.

'ಉತ್ತಮ ಸಿನಿಮಾ ಮಾಡಿದರೇ ಇಂದಿನ ಸಾಮಾಜಿಕ ಮಾಧ್ಯಮಗಳ ಮುಖಾಂತರ ಜನರೇ ಅದನ್ನು ಯಶಸ್ಸುಗೊಳಿಸುತ್ತಾರೆ' ಎಂದು ಹೇಳಿದ್ದಾರೆ.

ಮಿಸ್ ಯೂ ಸಿನಿಮಾವನ್ನು ರಾಜಶೇಖರ್ ಎನ್ ನಿರ್ದೇಶಿಸುತ್ತಿದ್ದು ರೆಡ್ ಗೇಂಟ್ ಮತ್ತು 7ಮೈಲ್ಸ್ ಪರ್ ಸೆಕೆಂಡ್ ಬ್ಯಾನರ್ ಅಡಿ ಮ್ಯಾಥ್ಯೂ ಸ್ಯಾಮುಯಲ್ ನಿರ್ಮಿಸುತ್ತಿದ್ದಾರೆ. ಇದೊಂದು ಕಾಮಿಡಿ, ಆಕ್ಷನ್ ಡ್ರಾಮಾ ಆಗಿದ್ದು ನಟಿ ಆಶಿಕಾ ರಂಗನಾಥ್ ಮುಖ್ಯ ಪಾತ್ರದಲ್ಲಿದ್ದಾರೆ.

ಸುಕುಮಾರ್ ನಿರ್ದೇಶಿಸಿರುವ ಪುಷ್ಪ–2 ದಿ ರೂಲ್ ಸಿನಿಮಾ ಇದೇ ಡಿಸೆಂಬರ್ 5ಕ್ಕೆ ಬಿಡುಗಡೆಯಾಗುತ್ತಿದೆ.