ಡಿ.13ಕ್ಕೆ ‘ಲೈಫ್ ಈಸ್...’

ಪ್ರಿಯಾಂಕಾ ಉಪೇಂದ್ರ, ಪೃಥ್ವಿ ಅಂಬಾರ್ ನಟನೆಯ ‘ಲೈಫ್ ಈಸ್ ಬ್ಯೂಟಿಫುಲ್’ ಡಿ.13ರಂದು ತೆರೆಗೆ ಬರಲಿದೆ. ನಟ ಉಪೇಂದ್ರ ಚಿತ್ರ ಬಿಡುಗಡೆ ದಿನಾಂಕ ಘೋಷಿಸಿ ತಂಡಕ್ಕೆ ಶುಭ ಹಾರೈಸಿದರು. 

‘ಸಿನಿಮಾದ ತುಣುಕುಗಳನ್ನು ನೋಡಿದ್ದೇನೆ. ಲಿಫ್ಟ್ ಒಳಗೆ ನಡೆಯುವ ಕಥೆ ಎನ್ನಿಸುತ್ತದೆ. ಬದುಕು ಕೂಡ ಲಿಫ್ಟ್‌ನಂತೆ ಮೇಲೆ, ಕೆಳಗೆ ಹೋಗುತ್ತಿರುತ್ತದೆ. ಹಾಗಾಗಿಯೇ ಇದಕ್ಕೆ ಈ ಶೀರ್ಷಿಕೆ ಇಟ್ಟಿದ್ದಾರೆ. ಈ ಸಿನಿಮಾ ಬಿಡುಗಡೆ ಮೊದಲೇ ಗೊತ್ತಿದ್ದರೆ ‘ಯುಐ’ ಸಿನಿಮಾ ಬಿಡುಗಡೆ ಇನ್ನೊಂದು ಸ್ವಲ್ಪ ಮುಂದೂಡುತ್ತಿದ್ದೆವು. ಪ್ರಿಯಾಂಕಾ ಅದ್ಬುತ ಕಲಾವಿದೆ. ಅವರಿಂದ ನಾನು ಸಾಕಷ್ಟು ಕಲಿಯುವುದಿದೆ’ ಎಂದು ಉಪೇಂದ್ರ ತಮ್ಮ ಪತ್ನಿಯ ಕಾಲೆಳೆಯುತ್ತಲೇ ತಂಡಕ್ಕೆ ಶುಭ ಕೋರಿದರು. 

ಸಾಬು ಅಲೋಶಿಯಸ್ ಮತ್ತು ಅರುಣ್‌ಕುಮಾರ್.ಎಂ ಜಂಟಿಯಾಗಿ ಚಿತ್ರವನ್ನು ನಿರ್ದೇಶಿಸಿದ್ದಾರೆ. ನಿರ್ದೇಶಕ ಲೋಹಿತ್‌ ಎಂ ಗೆಳೆಯರ ಜೊತೆಗೂಡಿ ತಮ್ಮ ಫ್ರೈಡೆ ಫಿಲ್ಮ್ಸ್‌ ಮೂಲಕ ಚಿತ್ರವನ್ನು ನಿರ್ಮಿಸಿದ್ದಾರೆ.  ತಾರಾಗಣದಲ್ಲಿ ಲಾಸ್ಯ ನಾಗರಾಜ್, ಸಿದ್ಲಿಂಗು ಶ್ರೀಧರ್, ‘ಕಾಮಿಡಿ ಕಿಲಾಡಿ’ಗಳು ಖ್ಯಾತಿಯ ಮಹಾಂತೇಶ್ ಮುಂತಾದವರಿದ್ದಾರೆ. ನೊಬಿನ್‌ಪೌಲ್ ಸಂಗೀತ ಚಿತ್ರಕ್ಕಿದೆ.