‘ಟಾಕ್ಸಿಕ್’ಗೆ ಕ್ಲ್ಯಾಪ್‌ ಮಾಡಿದ ಸೆಟ್‌ ಬಾಯ್‌
ಯಶ್‌ ನಟನೆಯ ಹೊಸ ಸಿನಿಮಾ, ಗೀತು ಮೋಹನ್‌ದಾಸ್‌ ಆ್ಯಕ್ಷನ್‌ ಕಟ್‌ ಹೇಳುತ್ತಿರುವ ‘ಟಾಕ್ಸಿಕ್’ ಸಿನಿಮಾದ ಮುಹೂರ್ತ ಬೆಂಗಳೂರಿನಲ್ಲಿ ಗುರುವಾರ(ಆಗಸ್ಟ್ 8) ನಡೆಯಿತು. ವಿಶೇಷ ಏನೆಂದರೆ ಸೆಟ್‌ ಬಾಯ್‌ ಆಗಿ ಕಾರ್ಯನಿರ್ವಹಿಸುತ್ತಿರುವ ಸುನೀಲ್‌ ಎಂಬುವವರು ಕ್ಲ್ಯಾಪ್‌ ಮಾಡುವುದರ ಮೂಲಕ ಚಿತ್ರೀಕರಣಕ್ಕೆ ಚಾಲನೆ ನೀಡಿದರು.
2023ರ ಡಿಸೆಂಬರ್‌ 8ರಂದು ‘ಟಾಕ್ಸಿಕ್’ ಸಿನಿಮಾ ಶೀರ್ಷಿಕೆ ಘೋಷಣೆಯಾಗಿತ್ತು. ಇದಾದ ಬಳಿಕ ಬೆಂಗಳೂರಿನ ಎಚ್‌ಎಂಟಿ ಮೈದಾನದಲ್ಲಿ ಚಿತ್ರದ ಚಿತ್ರೀಕರಣಕ್ಕಾಗಿ ಬೃಹತ್‌ ಸೆಟ್‌ಗಳ ನಿರ್ಮಾಣ ಆರಂಭವಾಗಿತ್ತು. ಇಲ್ಲೇ ಮುಹೂರ್ತವೂ ನಡೆದಿದೆ. ಶೀರ್ಷಿಕೆ ಘೋಷಣೆಯಾಗಿ ಎಂಟು ತಿಂಗಳ ಬಳಿಕ ಚಿತ್ರದ ಶೂಟಿಂಗ್‌ ಆರಂಭವಾಗಿದೆ. ‘A fairy tale for grown-ups’ ಎಂಬ ಅಡಿಬರಹವಿರುವ ಈ ಸಿನಿಮಾವನ್ನು ಕೆವಿಎನ್‌ ಪ್ರೊಡಕ್ಷನ್ಸ್‌ ಹಾಗೂ ಯಶ್‌ ಅವರ ಮಾನ್‌ಸ್ಟರ್‌ ಮೈಂಡ್‌ ಕ್ರಿಯೇಷನ್ಸ್‌ ನಿರ್ಮಾಣ ಮಾಡುತ್ತಿದೆ. 2025ರ ಏಪ್ರಿಲ್‌ 10ರಂದು ಸಿನಿಮಾ ಬಿಡುಗಡೆಯಾಗಲಿದೆ ಎಂದು ಈಗಾಗಲೇ ಘೋಷಿಸಲಾಗಿದ್ದು, ಎಂಟು ತಿಂಗಳಲ್ಲಿ ಚಿತ್ರೀಕರಣ ಪೂರ್ಣಗೊಳಿಸಿ ಬಿಡುಗಡೆ ಸಾಧ್ಯವೇ ಎಂಬ ಪ್ರಶ್ನೆಯೂ ಉದ್ಭವಿಸಿದೆ.
‘ಟಾಕ್ಸಿಕ್’ ಯಶ್‌ ನಟನೆಯ 19ನೇ ಸಿನಿಮಾ. ಯಶ್‌ ನಟನೆಯ ‘ಕೆ.ಜಿ.ಎಫ್‌. ಚಾಪ್ಟರ್‌–2’ ಬಿಡುಗಡೆಗೊಂಡು ಎರಡು ವರ್ಷಗಳ ಉರುಳಿವೆ. ಹೀಗೆ ಒಟ್ಟಾರೆ ಮೂರು ವರ್ಷಗಳ ಬಳಿಕ ಯಶ್‌ ನಟನೆಯ ಹೊಸ ಸಿನಿಮಾ ಬಿಡುಗಡೆಯಾಗಲಿದೆ. ‘ಟಾಕ್ಸಿಕ್’ ಸಿನಿಮಾದ ತಾರಾಬಳಗವನ್ನು, ತಾಂತ್ರಿಕ ವರ್ಗವನ್ನು ಚಿತ್ರತಂಡ ಇನ್ನೂ ಘೋಷಿಸಿಲ್ಲ.
8ರ ನಂಟು: ಯಶ್‌ ಜನ್ಮದಿನ ಜನವರಿ 8, ‘ಟಾಕ್ಸಿಕ್’ ಶೀರ್ಷಿಕೆ ಘೋಷಣೆಯಾಗಿದ್ದು ಡಿಸೆಂಬರ್‌ 8ರಂದು. ಇದೀಗ ಚಿತ್ರದ ಮುಹೂರ್ತವೂ ಆಗಸ್ಟ್ 8ರಂದು ನಡೆದಿದೆ. ಹೀಗೆ ಯಶ್‌ ಅವರಿಗೆ ‘8’ರ ನಂಟು ಬಹಳಷ್ಟಿದೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.