ಪ್ರಶಾಂತ್‌ ನೀಲ್‌ ನಿರ್ದೇಶನದ ‘ಸಲಾರ್‌’ಗೆ ದಾರಿಬಿಟ್ಟ ಚಿತ್ರರಂಗ

ವರ್ಷಾಂತ್ಯಕ್ಕೆ ಒಂದೂ ಕನ್ನಡ ಚಿತ್ರ ತೆರೆಗೆ ಬಾರದೆ ಅಚ್ಚರಿ ಮೂಡಿಸಿದೆ. ತೆಲುಗಿನ ಪ್ರಭಾಸ್‌ ನಟಿಸಿ, ‘ಕೆ.ಜಿ.ಎಫ್‌’ ಖ್ಯಾತಿಯ ಪ್ರಶಾಂತ್‌ ನೀಲ್‌ ನಿರ್ದೇಶಿಸಿರುವ ‘ಸಲಾರ್‌’ ಇಂದು(ಡಿ.22) ತೆರೆ ಕಾಣುತ್ತಿರುವ ಏಕೈಕ ಕನ್ನಡ ಚಿತ್ರವಾಗಿದೆ.

ಇದು ಕೂಡ ನೇರ ಕನ್ನಡ ಚಿತ್ರವಲ್ಲ; ತೆಲುಗಿನಿಂದ ಡಬ್‌ ಆಗಿರುವುದು. ಹೀಗಾಗಿ ಒಂದು ರೀತಿಯಲ್ಲಿ ಈ ವಾರ ಯಾವುದೇ ಚಿತ್ರ ತೆರೆ ಕಾಣುತ್ತಿಲ್ಲ. ಹಿಂದಿಯಲ್ಲಿ ಶಾರೂಕ್‌ ಖಾನ್‌ ನಟನೆಯ ‘ಡಂಕಿ’ ಕೂಡ ಗುರುವಾರ ತೆರೆಕಂಡಿದ್ದು, ಈ ಎರಡು ದೊಡ್ಡ ಚಿತ್ರಗಳಿಗೆ ಈ ವಾರ ಕನ್ನಡ ಚಿತ್ರರಂಗ ದಾರಿ ಬಿಟ್ಟುಕೊಟ್ಟಿದೆ.

ಹೊಂಬಾಳೆ ಫಿಲ್ಮ್ಸ್ ನಿರ್ಮಾಣದ ಈ ಚಿತ್ರದಲ್ಲಿ ಮಲಯಾಳಂನ ಖ್ಯಾತ ನಟ ಪೃಥ್ವಿರಾಜ್‌ ಮುಖ್ಯಭೂಮಿಕೆಯಲ್ಲಿದ್ದಾರೆ. ತಾಂತ್ರಿಕವಾಗಿ ‘ಕೆಜಿಎಫ್‌’ ತಂಡವೇ ಇದೆ. ರವಿ ಬಸ್ರೂರು ಸಂಗೀತ, ಭುವನ್‌ ಗೌಡ ಛಾಯಾಗ್ರಹಣ ಚಿತ್ರಕ್ಕಿದೆ. ಮೂಲ ತೆಲುಗು ಸಿನಿಮಾವಾಗಿರುವುದರಿಂದ ಕನ್ನಡ ಅವತರಣಿಕೆ ಬೆರೆಳೆಣಿಕೆ ಚಿತ್ರಮಂದಿರಗಳಲ್ಲಿ ತೆರೆ ಕಾಣುತ್ತಿದೆ.