Gadar 2 | 5 ದಿನದಲ್ಲಿ ₹229 ಕೋಟಿ ಗಳಿಸಿದ ಸನ್ನಿ ಡಿಯೋಲ್ ಅಭಿನಯದ ಗದರ್–2

ಮುಂಬೈ: ಆಗಸ್ಟ್‌ 11ರಂದು ತೆರೆ ಕಂಡಿದ್ದ ಸನ್ನಿ ಡಿಯೋಲ್ ಅಭಿನಯದ ‘ಗದರ್‌ 2’ ಸಿನಿಮಾದ ಭಾರತದ ಆದಾಯ ₹200 ಕೋಟಿ ದಾಟಿದೆ ಎಂದು ನಿರ್ಮಾಪಕರು ಬುಧವಾರ ತಿಳಿಸಿದ್ದಾರೆ.

ಅನಿಲ್‌ ಶರ್ಮಾ ನಿರ್ದೇಶನದ ಈ ಚಿತ್ರವು, 2001ರ ಬ್ಲಾಕ್‌ ಬಸ್ಟರ್‌ ಸಿನಿಮಾ ‘ಗದರ್‌–ಏಕ್ ‍ಪ್ರೇಮ್‌ ಕಥಾ’ ಸಿನಿಮಾದ ಸೀಕ್ವೆಲ್ ಆಗಿದೆ. ಈ ಸಿನಿಮಾದಲ್ಲಿ ಸನ್ನಿ ಡಿಯೋಲ್ ಅವರು ತಾರಾ ಸಿಂಗ್‌ ಎನ್ನುವ ಪಾತ್ರ ನಿರ್ವಹಿಸಿದ್ದಾರೆ.

ಸಿನಿಮಾ ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ ದಾಖಲೆಗಳನ್ನು ಮುರಿದಿದೆ. ಅಭೂತಪೂರ್ವ ವಿಜಯ ಕಂಡಿದ್ದು, ಭಾರತೀಯ ಚಿತ್ರರಂಗದಲ್ಲಿ ಹೊಸ ದಾಖಲೆಯನ್ನು ನಿರ್ಮಿಸಿದೆ ಎಂದು ಪತ್ರಿಕಾ ಪ್ರಕಟಣೆಯಲ್ಲಿ ನಿರ್ಮಾಪಕರು ತಿಳಿಸಿದ್ದಾರೆ.

ಅಲ್ಲದೆ, ಸ್ವಾತಂತ್ರ್ಯ ದಿನಾಚರಣೆಯಂದು ಚಿತ್ರವು ಕಳೆದ ಎರಡು ದಶಕಗಳಲ್ಲೇ ಅತಿ ಹೆಚ್ಚು ಗಳಿಕೆ ಮಾಡಿದೆ ಎಂದು ಅವರು ಹೇಳಿದ್ದಾರೆ.

ಸಿನಿಮಾವು ಸ್ವಾತಂತ್ರ್ಯ ದಿನದಂದು ₹55.40 ಕೋಟಿ ಗಳಿಸಿದ್ದು, ಒಟ್ಟು ₹228.98 ಕೋಟಿ ಗಳಿಸಿದೆ.

ಝಿ ಸ್ಟುಡಿಯೋಸ್‌ ನಿರ್ಮಾಣ ಮಾಡಿರುವ ಈ ಚಿತ್ರದಲ್ಲಿ, ಅಮೀಷಾ ಪಟೇಲ್ ಹಾಗೂ ಉಕರ್ಷ್ ಶರ್ಮಾ ಬಣ್ಣ ಹಚ್ಚಿದ್ದಾರೆ.