ವಿನಯ್‌ ರಾಜ್‌ಕುಮಾರ್‌ಗೆ ದುನಿಯಾ’ ವಿಜಯ್‌ ಆ್ಯಕ್ಷನ್‌ ಕಟ್‌
‘ದುನಿಯಾ’ ವಿಜಯ್‌ ನಿರ್ದೇಶಿಸುತ್ತಿರುವ ಮೂರನೇ ಚಿತ್ರದಲ್ಲಿ ನಾಯಕರಾಗಿ ವಿನಯ್‌ ರಾಜ್‌ಕುಮಾರ್‌ ನಟಿಸಲಿದ್ದಾರೆ. ಸೋಮವಾರ (ಸೆ.23) ಚಿತ್ರತಂಡ ವಿಭಿನ್ನವಾದ ಪೋಸ್ಟರ್‌ನೊಂದಿಗೆ ನಾಯಕನನ್ನು ಪರಿಚಯಿಸಿದೆ.
ದುನಿಯಾ ವಿಜಯ್‌ ಪುತ್ರಿ ಮೋನಿಷಾ ವಿಜಯ್‌ ಕುಮಾರ್ ನಟಿಸುತ್ತಿರುವ ಚೊಚ್ಚಲ ಸಿನಿಮಾ ಇದಾಗಿದ್ದು, ‘ಭೀಮ’ ಯಶಸ್ಸಿನ ಬೆನ್ನಲ್ಲೇ ವಿಜಯ್‌ ಮತ್ತೊಂದು ಸಿನಿಮಾ ನಿರ್ದೇಶನಕ್ಕೆ ಸಜ್ಜಾಗಿದ್ದಾರೆ. ‘ಪೆಪೆ’ ಸಿನಿಮಾ ತೆರೆಕಂಡ ಬೆನ್ನಲ್ಲೇ ವಿನಯ್‌ ನಟನೆಯ ಹೊಸ ಸಿನಿಮಾ ಘೋಷಣೆಯಾಗಿದೆ. ಚಿತ್ರಕ್ಕೆ ‘ಸಿಟಿ ಲೈಟ್ಸ್‌’ ಎಂಬ ಶೀರ್ಷಿಕೆ ಇಡಲಾಗಿದ್ದು, ‘ಜವಾಬ್‌ ದಾರಿ... ದೀಪಗಳು’ ಎಂಬ ಅಡಿಬರಹವಿದೆ. ಈಗಾಗಲೇ ವಿಜಯ್‌ ಅವರ ಮೊದಲ ಪುತ್ರಿ ರಿತನ್ಯಾ ಚಂದನವನಕ್ಕೆ ಹೆಜ್ಜೆ ಇಟ್ಟಿದ್ದಾರೆ. ಜಡೇಶ್‌ ಕೆ.ಹಂಪಿ ನಿರ್ದೇಶನದ ವಿಜಯ್‌ ನಟನೆಯ 29ನೇ ಸಿನಿಮಾದಲ್ಲಿ ರಿತನ್ಯಾ ನಟಿಸುತ್ತಿದ್ದು, ಇದೀಗ ಮೋನಿಷಾ ಕೂಡಾ ಬಣ್ಣದ ಲೋಕಕ್ಕೆ ಕಾಲಿಡುತ್ತಿದ್ದಾರೆ.
‘ಸಲಗ’ ಹಾಗೂ ‘ಭೀಮ’ ಚಿತ್ರದ ಯಶಸ್ಸಿನ ನಂತರ ಅಪ್ಪ ವಿಜಯ ಕುಮಾರ್ ಅವರ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ಮತ್ತೊಂದು ಚಿತ್ರ ಇದಾಗಿದೆ. ಇಂತಹ ಅದ್ಭುತ ತಂಡದೊಟ್ಟಿಗೆ ಕೆಲಸ ಮಾಡುವ ಅವಕಾಶ ಸಿಕ್ಕಿರುವುದು ಅದೃಷ್ಟ’ ಎಂದು ಮೋನಿಷಾ ಹೇಳಿಕೊಂಡಿದ್ದರು. ‘ಸಲಗ’ ಮತ್ತು ‘ಭೀಮ’ ರೀತಿಯ ಎರಡು ಮಾಸ್‌ ಸಿನಿಮಾಗಳ ಬಳಿಕ ವಿಜಯ್‌ ಯಾವ ರೀತಿಯ ಕಥಾಹಂದರವುಳ್ಳ ಸಿನಿಮಾ ಮಾಡಲಿದ್ದಾರೆ ಎನ್ನುವ ಕುತೂಹಲವೂ ಪ್ರೇಕ್ಷಕರಲ್ಲಿದೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.