ನಳಪಾಕ: ಪುಂಡಿ ಸೊಪ್ಪು ಪುಳಿಯೋಗರೆ.. ಮಾಡಿ ನೋಡಿ ಒಮ್ಮೆ

ಹುಣಸೆಹುಳಿಯ ಪುಳಿಯೋಗರೆ ಎಲ್ಲರಿಗೂ ಗೊತ್ತು. ಆಗಿಂದಾಗ ಮಾಡಿಕೊಂಡು, ಉಣ್ಣಬಹುದಾದ ಪುಳಿಯೋಗರೆಯನ್ನೇ ಹೋಲುವ ಖಾದ್ಯ ಇದು. ಪುಂಡಿಪುಳಿಯೋಗರೆ. ಪುಂಡಿ ಸೊಪ್ಪನ್ನು ಬಳಸಿ ಮಾಡುವ ಈ ಪುಳಿಯೋಗರೆ ನಾಲಗೆಯ ರುಚಿಮೊಗ್ಗುಗಳನ್ನು ಅರಳಿಸಿ, ಹೊಟ್ಟೆ ಹಸಿಯುವಂತೆ ಮಾಡುತ್ತವೆ. ಹಸಿರು ಬಣ್ಣದ ಈ ಪುಳಿಯೋಗರೆ ಪ್ರಯತ್ನಿಸಿ ನೋಡಿ

ಬೇಕಾಗುವ ಸಾಮಗ್ರಿಗಳು: ಒಂದು ಕಟ್ಟು ಪುಂಡಿ ಸೊಪ್ಪು, ಬೇಯಿಸಿದ ಅನ್ನ ಒಂದು ಬಟ್ಟಲು, ಎಣ್ಣೆ, ಶೇಂಗಾ, ಗೋಡಂಬಿ, ದ್ರಾಕ್ಷಿ, ಉದ್ದಿನಬೇಳೆ, ಕಡ್ಲೆಬೇಳೆ, ಸಾಸಿವೆ, ಜೀರಿಗೆ, ಉಪ್ಪು, ಅರಿಸಿಣ, ಕೆಂಪು ಒಣ ಮೆಣಸಿನಕಾಯಿ, ಮೆಂತೆಕಾಳು, ಕೊತ್ತಂಬರಿ ಸೊಪ್ಪು.

ಮಾಡುವ ವಿಧಾನ: ಕಾದ ಬಾಣಲಿಗೆ ಎರಡು ಸಣ್ಣ ಚಮಚ ಎಣ್ಣೆ ಹಾಕಿ ಅದಕ್ಕೆ ಅರ್ಧ ಚಮಚ ಮೆಂತೆಕಾಳು, 5ರಿಂದ 6 ಕೆಂಪು ಒಣ ಮೆಣಸಿನಕಾಯಿ, ಬಿಡಿಸಿಟ್ಟುಕೊಂಡ ಪುಂಡಿಸೊಪ್ಪು ಹಾಕಿ ಹುರಿದುಕೊಳ್ಳಬೇಕು. ಹುರಿದುಕೊಂಡ ಸಾಮಗ್ರಿಗಳನ್ನು ನೀರು ಹಾಕದೆ ಮಿಕ್ಸಿಯಲ್ಲಿ ನುನ್ನಗೆ ರುಬ್ಬಿಟ್ಟುಕೊಳ್ಳಬೇಕು. ನಂತರ ಒಂದು ಬಾಣಲಿಯಲ್ಲಿ ತುಪ್ಪದಲ್ಲಿ ಗೋಡಂಬಿ, ದ್ರಾಕ್ಷಿ, ಶೇಂಗಾ ಹುರಿದಿಟ್ಟುಕೊಳ್ಳಬೇಕು. ಪುಳಿಯೊಗರೆ ತಯಾರಿಗಾಗಿ ಒಂದು ಬಾಣಲಿಗೆ ಪಲ್ಯಕ್ಕೆ ಬೇಕಾಗುವಷ್ಟು ಎಣ್ಣೆ ಹಾಕಿ ಅದಕ್ಕೆ ಉದ್ದಿನಕಾಳು, ಸಾಸಿವೆ, ಜೀರಿಗೆ, ಕರಿಬೇವು, ಕೆಂಪು ಒಣ ಮೆಣಸಿನಕಾಯಿ, ಅರಿಸಿಣ (ಕಾರ ಜಾಸ್ತಿ ಬೇಕೆನ್ನುವವರು ಹಸಿಮೆಣಸಿನಕಾಯಿ ಹಾಕಿಕೊಳ್ಳಬಹುದು), ರುಬ್ಬಿಟ್ಟುಕೊಂಡ ಪುಂಡಿಸೊಪ್ಪಿನ ಪೌಡರ್‌ ಹಾಕಿ ಮಿಕ್ಸ್‌ ಮಾಡಿ ನಂತರ ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಚೆನ್ನಾಗಿ ಬೇಯಿಸಬೇಕು. ಚೆನ್ನಾಗಿ ಬೆಂದ ನಂತರ ತಯಾರಿಸಿಟ್ಟುಕೊಂಡ ಅನ್ನವನ್ನು ಹಾಕಿ ಚಿತ್ರಾನ್ನ ರೀತಿಯಲ್ಲಿ ಮಿಶ್ರಣ ಮಾಡಬೇಕು.