ಸ್ಪಂದನ | ಹೆರಿಗೆ ನಂತರ ಹೊಟ್ಟೆ ಇಳಿಸುವುದು ಹೀಗೆ

ಇದು ಮೊದಲನೆಯ ಮಗು ಅಥವಾ ಎರಡನೆಯ ಮಗು ತಿಳಿಸಿಲ್ಲ. ಇರಲಿ. ಒಂಬತ್ತು ತಿಂಗಳಲ್ಲಿ ಸರಾಸರಿ ತೂಕ ಎಷ್ಟು ಹೆಚ್ಚಾಗಿದೆ ಎಂಬುದನ್ನು ಗಮನಿಸಿ. ಸಹಜ ತೂಕವಿರುವ ಮಹಿಳೆ ಗರ್ಭಧಾರಣೆಯ ಅವಧಿಯಲ್ಲಿ 10ರಿಂದ 12ಕೆ.ಜಿ ತೂಕಗಳಿಸಬಹುದು. ಗರ್ಭಧಾರಣೆಗೂ ಮೊದಲು ಬೊಜ್ಜಿನ ಸಮಸ್ಯೆ ಇದ್ದರೆ, ಅಂಥವರು 8.ಕೆ.ಜಿ ತೂಕವನ್ನಷ್ಟೆ ಹೆಚ್ಚಿಗೆ ಗಳಿಸಬೇಕು. ಆದರೆ, ಈಚೆಗೆ 15ರಿಂದ 20 ಕೆ.ಜಿ. ಹೆಚ್ಚಾಗುತ್ತಿದೆ. ಹೆರಿಗೆ ನಂತರವೂ 9 ತಿಂಗಳವರೆಗೆ ಬಾಣಂತನವೆಂದು ಕಡಿಮೆ ದೈಹಿಕ ಶ್ರಮ, ಹೆಚ್ಚು ಆಹಾರ ಸೇವನೆ, ಮಗುವಿಗೆ ದೀರ್ಘಾವಧಿಯವರೆಗೆ ಸ್ತನ್ಯಪಾನ ಮಾಡಿಸದೇ ಇರುವುದರಿಂದ ದೇಹದ ತೂಕ ಹೆಚ್ಚುತ್ತದೆ. 

ಹೊಟ್ಟೆಯ ಮುಂದಿನ ಭಾಗದ  ಮುಖ್ಯ ಸ್ನಾಯು ರೆಕ್ಟಸ್‌ ಅಬ್ಡಾಮಿನಿಸ್‌ ಮಾಂಸಖಂಡ ಬಲಹೀನಗೊಂಡು, ಅದರ ನಡುವಿನ ಅಂತರ ಹೆಚ್ಚಿ, ಕರುಳುಗಳು ಅವೆರಡರ ನಡುವಿನ ಜಾಗವನ್ನು ಆಕ್ರಮಿಸಿಕೊಳ್ಳುತ್ತದೆ. ಇದರಿಂದ ಹೊಟ್ಟೆ ಉಬ್ಬಿದ ಹಾಗೆ ಅನಿಸುತ್ತದೆ. ಸಾಮಾನ್ಯವಾಗಿ ಅವಳಿ ಮಕ್ಕಳನ್ನು ಹಡೆದವರಲ್ಲಿ, ಅತಿ ತೂಕದ ಮಗು ಹೊಂದಿದವರಲ್ಲಿ, ನೆತ್ತಿನೀರು ಹೆಚ್ಚಿದವರಲ್ಲಿ ಹೆರಿಗೆ ನಂತರ ಹೀಗೆ ಆಗಬಹುದು. ಹೊಟ್ಟೆಯ ಸ್ನಾಯುಗಳನ್ನು ಬಲಪಡಿಸುವ ವ್ಯಾಯಾಮಗಳನ್ನು ಮಾಡಿ. ಶಸ್ತ್ರಚಿಕಿತ್ಸೆ ಆಗಿರುವುದರಿಂದ ಕನಿಷ್ಠ 8 ವಾರಗಳ ನಂತರ ಆರಂಭಿಸಬಹುದು. ಅಲ್ಲಿಯವರೆಗೆ ಸೀರೆ ಅಥವಾ ಹತ್ತಿಬಟ್ಟೆಯಿಂದ ಮಾಡಿದ ಬೆಲ್ಟ್‌ ಹೊಲಿಸಿಕೊಂಡು ನಡಿಗೆ ಆರಂಭಿಸಬಹುದು. ಎರಡು ವರ್ಷಗಳವರೆಗೆ ಮಗುವಿಗೆ ಎದೆಹಾಲುಣಿಸಿ. ಹೊಟ್ಟೆಯ ಬೊಜ್ಜಷ್ಟೆ ಅಲ್ಲ, ಇಡೀ ಶರೀರದ ಬೊಜ್ಜು ಕಡಿಮೆಯಾಗುತ್ತದೆ.

ಹೊಟ್ಟೆ ಇಳಿಸುತ್ತದೆ ಎಂದು ಹೇಳಿಕೊಳ್ಳುವ ತರಹೇವಾರಿ ಎಣ್ಣೆಗಳು, ವೈಬ್ರೇಟರ್ ಬೆಲ್ಟ್‌, ಲೈಫೊಸಕ್ಷನ್‌ಗಳಂಥ ಆಲೋಚನೆಗಳಿಂದ ದೂರವಿರಿ. ಹಿತಮಿತವಾದ ಪ್ರೊಟೀನ್‌ಯುಕ್ತ, ಕಡಿಮೆ ಕೊಬ್ಬಿನಾಂಶವಿರುವ ಆಹಾರ ಸೇವಿಸಿ. 

ಹೊಟ್ಟೆಯ ಮಾಂಸಖಂಡಗಳನ್ನ ಬಲಪಡಿಸಿಕೊಳ್ಳಲು ದ್ವಿಪಾದಉತ್ತಾನಾಸನ, ನೌಕಾಸನ, ಸೂರ್ಯನಮಸ್ಕಾರ ನಿಯಮಿತವಾಗಿ ಮಾಡಿ. 

ಮಗುವಿಗೆ  ಸ್ತನ್ಯಪಾನವಷ್ಟೆ ಮಾಡಿಸುತ್ತಿರುವಾಗ ಮೊದಲ ಒಂದು ವರ್ಷದವರೆಗೆ ಅಂಡಾಶಯದಿಂದ ಅಂಡಾಣು ಬಿಡುಗಡೆಯಾಗದೇ ಮುಟ್ಟಾಗುವ ಪ್ರಕ್ರಿಯೆಯಲ್ಲಿ ವ್ಯತ್ಯಾಸ ಉಂಟಾಗುತ್ತದೆ. ಈ ಅಂಡೋತ್ಪತ್ತಿಯ ಪ್ರಕ್ರಿಯೆ ಯಾವಾಗ ಬೇಕಾದರೂ ಆಗಬಹುದು. ಮೂತ್ರತಪಾಸಣೆಯಿಂದ ಮತ್ತೊಮ್ಮೆ ಗರ್ಭಧಾರಣೆ ಆಗಿದೆಯೇ ಎಂಬುದನ್ನು  ಪರೀಕ್ಷಿಸಿಕೊಳ್ಳಿ.