ಫ್ಯಾಕ್ಟ್ ಚೆಕ್: ಓವೈಸಿ ನಮಾಜ್‌ಗೆ ಪ್ರತಿಯಾಗಿ ಮಹಿಳೆಯ ಭಜನೆ; ಸುಳ್ಳು ಸುದ್ದಿ
ಕೆಲವರು ಸಾಮಾಜಿಕ ಜಾಲತಾಣದಲ್ಲಿ ಎರಡು ವಿಡಿಯೊಗಳನ್ನು ಹಂಚಿಕೊಳ್ಳುತ್ತಿದ್ದು, ಒಂದರಲ್ಲಿ ಎಐಎಂಐಎಂ ಮುಖ್ಯಸ್ಥ ಅಸಾದುದ್ದೀನ್ ಒವೈಸಿ ಅವರು ವಿಮಾನದಲ್ಲಿ ಪ್ರಯಾಣಿಸುವ ವೇಳೆ ನಮಾಜ್ ಮಾಡುವ ದೃಶ್ಯವಿದೆ. ಮತ್ತೊಂದು ವಿಡಿಯೊದಲ್ಲಿ ಮಹಿಳೆಯೊಬ್ಬರಿದ್ದು, ಒವೈಸಿ ಅವರ ಪ್ರಾರ್ಥನೆಗೆ ಪ್ರತಿಕ್ರಿಯೆಯಾಗಿ ಮಹಿಳೆ ಭಜನ್ ಹಾಡಿದ್ದಾರೆ ಎಂದು ಪ್ರತಿಪಾದನೆ ಮಾಡಲಾಗುತ್ತಿದೆ. ಮುಸ್ಲಿಂ ವ್ಯಕ್ತಿಯ ನಮಾಜ್‌ಗೆ ಪ್ರತಿಕ್ರಿಯೆಯಾಗಿ ಅಲ್ಲಿಯೇ ಇದ್ದ ಮಹಿಳೆ ಭಜನ್ ಹಾಡುತ್ತಿರುವುದು ಅವರಲ್ಲಿನ ಅಸಹಿಷ್ಣುತೆ ತೋರಿಸುತ್ತದೆ ಎಂದು ಕೆಲವರು ಹಂಚಿಕೊಂಡರೆ, ಆ ಮಹಿಳೆಯ ಧೈರ್ಯವನ್ನು ಹೊಗಳಿ ಕೆಲವರು ವಿಡಿಯೊ ಹಂಚಿಕೊಳ್ಳುತ್ತಿದ್ದಾರೆ. ಆದರೆ, ಇದು ಸುಳ್ಳು ಸುದ್ದಿ.
ಒವೈಸಿ ಇರುವ ವಿಡಿಯೊ ಅನ್ನು ಇನ್‌ವಿಡ್ ಟೂಲ್ ಸರ್ಚ್‌ಗೆ ಒಳ‍ಪಡಿಸಿ, ಅದರ ಕೀಫ್ರೇಮ್ ಅನ್ನು ಗೂಗಲ್ ಲೆನ್ಸ್ ಮೂಲಕ ಪರಿಶೀಲಿಸಿದಾಗ, ಇದೇ ವಿಡಿಯೊ ಅನ್ನು ಹೈದರಾಬಾದ್ ನ್ಯೂಸ್ ಉರ್ದು ಯುಟ್ಯೂಬ್‌ನಲ್ಲಿ 2019ರಲ್ಲಿ ಅಪ್‌ಲೋಡ್‌ ಮಾಡಿದ್ದು ಕಂಡುಬಂತು. ಅದರಲ್ಲಿ ವಿಮಾನದಲ್ಲೇ ಒವೈಸಿ ಪ್ರಯಾಣ ಮಾಡಿರುವ ಬಗ್ಗೆ ವಿವರಿಸಲಾಗಿತ್ತು. ಎರಡನೆಯ ವಿಡಿಯೊ ಅನ್ನೂ ಅದೇ ರೀತಿ ಪರಿಶೀಲನೆಗೊಳಪಡಿಸಿದಾಗ, ವಿಡಿಯೊ ಅನ್ನು ‘ಡ್ರಂಕ್ ಜರ್ನಲಿಸ್ಟ್’ ಎನ್ನುವ ಎಕ್ಸ್ ಖಾತೆಯಲ್ಲಿ 2024ರಲ್ಲಿ ಹಂಚಿಕೊಂಡಿರುವುದು ಕಂಡುಬಂತು. ಇವೆರಡೂ ಬೇರೆ ಬೇರೆ ವಿಡಿಯೊಗಳಾಗಿದ್ದು, ಪರಸ್ಪರ ಸಂಬಂಧವೇ ಇಲ್ಲದ ಎರಡು ವಿಡಿಯೊಗಳನ್ನು ಸೇರಿಸಿ, ಸುಳ್ಳು ಪ್ರತಿಪಾದನೆಗಳನ್ನು ಮಾಡಲಾಗುತ್ತಿದೆ. ಈ ಬಗ್ಗೆ ಪಿಟಿಐ ಫ್ಯಾಕ್ಟ್ ಚೆಕ್ ಪ್ರಕಟಿಸಿದೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.