ಚುನಾವಣೋತ್ತರ ಸಮೀಕ್ಷೆ: ‘ಎಎಪಿ’ ಮುಂದೆ

ನವದೆಹಲಿ (ಪಿಟಿಐ): ದೆಹ­ಲಿ ವಿಧಾನಸಭೆ ಚುನಾವಣೆಯಲ್ಲಿ ಈ ಬಾರಿ ’ಎಎಪಿ’ ಪಕ್ಷಕ್ಕೆ ಬಹುಮತ ಲಭಿಸುವ ಸಾಧ್ಯತೆ ಇದೆ ಎಂದು ಬಹುತೇಕ ಚುನಾವಣೋತ್ತರ ಸಮೀಕ್ಷೆಗಳು ಹೇಳಿವೆ.

ಶನಿವಾರ ಸಂಜೆ ಮತದಾನ ಮುಗಿದ ಬೆನ್ನಲ್ಲೇ, ‘ದಿ ಇಂಡಿಯಾ ಟುಡೆ - ಸಿಸೆರೊ’ ಚುನಾವಣೋತ್ತರ ಸಮೀಕ್ಷೆ ಪ್ರಕಟಗೊಂಡಿದ್ದು ‘ಎಎಪಿ’ 35 ರಿಂದ 43 ಸ್ಥಾನಗಳನ್ನು ಗೆಲ್ಲಲಿದೆ ಎಂದಿದೆ. ಒಟ್ಟು 70 ಸ್ಥಾನಗಳಲ್ಲಿ ‘ಬಿಜೆಪಿ’ 23 ರಿಂದ 29 ಸ್ಥಾನಗಳನ್ನು ಮತ್ತು ಕಾಂಗ್ರೆಸ್‌ 3 ರಿಂದ 5 ಸ್ಥಾನಗಳನ್ನು ಗೆಲ್ಲಲಿದೆ ಎಂದು ಭವಿಷ್ಯ ನುಡಿದಿದೆ.

ಸಿ- ವೋಟರ್‌ ಸಂಸ್ಥೆ ಕೂಡ ಚುನಾವಣೋತ್ತರ ಸಮೀಕ್ಷೆ ಪ್ರಕಟಿಸಿದ್ದು ‘ಎಎಪಿ’ 31ರಿಂದ 39, ಬಿಜೆಪಿ 27ರಿಂದ 35, ಕಾಂಗ್ರೆಸ್‌ 2 ರಿಂದ 4 ಸ್ಥಾನಗಳನ್ನು ಗೆಲ್ಲಲಿದೆ ಎಂದಿದೆ. 

ಶೂನ್ಯ ಸಂಪಾದನೆ: ಮತದಾರನ ಮನದಲ್ಲಿ ಏನಿದೆ ಎನ್ನುವುದನ್ನು ತಿಳಿಯುವ ವಾಹಿನಿಗಳ ಸ್ಪರ್ಧೆಯಲ್ಲಿ ‘ಚಾಣಕ್ಯ ತಂತ್ರ’ ಬಹುತೇಕ ಮುನ್ನಡೆಯಲ್ಲಿದೆ. ‘ಟುಡೇಸ್‌ ಚಾಣಕ್ಯ’ ಸಮೀಕ್ಷೆ  ಪ್ರಕಾರ ಈ ಬಾರಿ ದೆಹಲಿಯಲ್ಲಿ ಕಾಂಗ್ರೆಸ್‌ಗೆ ಒಂದೇ ಒಂದು ಸ್ಥಾನವೂ ಲಭಿಸುವುದಿಲ್ಲ. ವಿಧಾನಸಭೆ ಚುನಾವಣೆಯಲ್ಲಿ ಕಾಂಗ್ರೆಸ್‌ ಶೂನ್ಯ ಸಂಪಾದನೆ ಮಾಡಲಿದೆ ಎಂದಿದೆ. ‘ಎಎಪಿ’ 48 ಮತ್ತು ಬಿಜೆಪಿ 22 ಸ್ಥಾನಗಳನ್ನು ಗೆಲ್ಲಲಿದೆ ಎಂದಿದೆ. ದೆಹಲಿ ಮುಖ್ಯಮಂತ್ರಿಯಾಗುವ ಸಾಧ್ಯತೆ ಕೇಜ್ರಿವಾಲ್‌ಗೆ ಶೇ 53ರಷ್ಟಿದೆ ಎಂದಿದೆ.

ಎಬಿಪಿ- ನೀಲ್ಸನ್‌ ಸಮೀಕ್ಷೆ ಪ್ರಕಾರ ‘ಎಎಪಿ’ 39 ಮತ್ತು ಬಿಜೆಪಿ 28 ಸ್ಥಾನಗಳನ್ನು ಗೆಲ್ಲಲಿದೆ.  36 ಸ್ಥಾನಗಳನ್ನು ಗೆಲ್ಲುವ ಪಕ್ಷ ದೆಹಲಿಯಲ್ಲಿ ಸರ್ಕಾರ  ರಚಿಸಲಿದೆ.‌

2013ರ ಚುನಾವಣೆಯಲ್ಲಿ 28 ಸ್ಥಾನಗಳನ್ನು ಗೆದ್ದಿದ್ದ ‘ಎಎಪಿ’, 8 ಸ್ಥಾನಗಳನ್ನು ಗೆದ್ದಿದ್ದ ಕಾಂಗ್ರೆಸ್‌ ಜತೆ  ಸೇರಿ ಸಮ್ಮಿಶ್ರ ಸರ್ಕಾರ ರಚಿಸಿ 49 ದಿನಗಳ ಆಡಳಿತ ನಡೆಸಿತ್ತು. ಈ ಚುನಾವಣೆಯಲ್ಲಿ 32 ಸ್ಥಾನಗಳನ್ನು ಗೆಲ್ಲುವ ಮೂಲಕ ಬಿಜೆಪಿ ಏಕೈಕ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿತ್ತು.

ನಿರ್ಬಂಧ: ಫೆ.7ರಂದು ಮತದಾನ ಮುಗಿಯುವವರೆಗೆ (ಬೆಳಿಗ್ಗೆ 7 ಗಂಟೆಯಿಂದ ಸಂಜೆ 6.30ರವರಗೆ) 48 ಗಂಟೆಗಳ ಕಾಲ ಚುನಾವಣೋತ್ತರ ಸಮೀಕ್ಷೆಗಳನ್ನು  ಪ್ರಸಾರ ಮಾಡಬಾರದು, ಪ್ರಕಟಿಸಬಾರದು ಎಂದು ಚುನಾವಣಾ ಆಯೋಗ ನಿರ್ಬಂಧ ಹೇರಿತ್ತು.