ಶಿವಕಾಶಿ: ಮತ್ತೊಂದು ಪಟಾಕಿ ಘಟಕದಲ್ಲಿ ದುರಂತ, ಮೂವರು ಭಸ್ಮ

ಶಿವಕಾಶಿ (ಪಿಟಿಐ): ನಗರದ ಗುಡಿಸಲು ಒಂದರಲ್ಲಿ ಇದ್ದ ಅಕ್ರಮ ಪಟಾಕಿ ಘಟಕವೊಂದರಲ್ಲಿ ಶನಿವಾರ ಸಂಭವಿಸಿದ ಅಗ್ನಿ ದುರಂತದಲ್ಲಿ ಮೂವರು ಸುಟ್ಟು ಕರಕಲಾಗಿ. ಇತರ ಮೂವರು ತೀವ್ರವಾಗಿ ಸುಟ್ಟುಗಾಯಗಳಿಗೆ ಒಳಗಾಗಿದ್ದಾರೆ.

 ಶಿವಕಾಶಿ ಸಮೀಪದ ಮುಧಾಲಿಪಟ್ಟಿಯ ಪಟಾಕಿ ತಯಾರಿ ಘಟಕದಲ್ಲಿ 39 ಮಂದಿಯನ್ನು ಬಲಿ ತೆಗೆದುಕೊಂಡ ಪಟಾಕಿ ಘಟಕದ ಭಾರಿ ಅಗ್ನಿದುರಂತದ ನೆನಪು ಆರುವ ಮುನ್ನವೇ ನಗರದ ವಿಜಯಕರಿಸಾಲ್ಕುಲಂನಲ್ಲಿ ಈ ದುರಂತ ಸಂಭವಿಸಿದೆ.

ಗುಡಿಸಲು ಒಂದರಲ್ಲಿ ಪರವಾನಗಿ ಇಲ್ಲದೆ ಅಕ್ರಮವಾಗಿ ಪಟಾಕಿ ತಯಾರಿಸಲಾಗುತ್ತಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.

ಸೆಪ್ಟೆಂಬರ್ 5ರ ಪಟಾಕಿ ದುರಂತದ ಬಳಿಕ ಅಧಿಕಾರಿಗಳು ಪಟಾಕಿ ತಯಾರಿಕಾ ಘಟಕಗಳ ತಪಾಸಣೆಯನ್ನು ತೀವ್ರಗೊಳಿಸಿದ್ದಾರೆ. ನಿಯಮಗಳ ಪ್ರಕಾರ ಪಟಾಕಿ ತಯಾರಿಕೆಯಲ್ಲಿ ಬಳಸಲಾಗುವ ರಾಸಾಯನಿಕಗಳನ್ನು ಯಾವುದೇ ಮನೆಯೊಳಕ್ಕೆ ಒಯ್ಯಲು ಅನುಮತಿ ನೀಡಲಾಗುವುದಿಲ್ಲ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.