ಹುಲಿ ಸಂಖ್ಯೆ ರಾಜ್ಯದಲ್ಲೇ ಅಧಿಕ

ನವದೆಹಲಿ (ಪಿಟಿಐ): ವನ್ಯಜೀವಿ ಮತ್ತು ಹುಲಿ ಪ್ರೇಮಿ­ಗಳ ಸಂತಸಕ್ಕೆ ಕಾರಣ­ವಾಗುವ ಸಂಗತಿಯೊಂದು  ಇದೀಗ ಹೊರ ಬಿದ್ದಿದೆ. ದೇಶದಲ್ಲಿ ಹುಲಿಗಳ ಸಂಖ್ಯೆ ಗಣನೀಯ­ವಾಗಿ ಏರಿಕೆ­ಯಾಗಿದೆ.

ವಿಶ್ವದ ಹುಲಿಗಳ ಪೈಕಿ ಶೇ 70 ರಷ್ಟು ಭಾರತದ­ಲ್ಲಿವೆ. ವಿಶೇಷ ಎಂದರೆ ದೇಶದಲ್ಲಿಯೇ ಅತಿ ಹೆಚ್ಚು ಹುಲಿಗಳಿರುವ ರಾಜ್ಯ ಕರ್ನಾಟಕ. 2014ರ ಗಣತಿ ಪ್ರಕಾರ ದೇಶದ­ಲ್ಲಿನ ಹುಲಿಗಳ ಸಂಖ್ಯೆ 2,226.  ಈ ಹಿಂದೆ 2010ರಲ್ಲಿ ನಡೆಸಿದ ಗಣತಿ­ಯಲ್ಲಿ   1,706 ಹುಲಿಗಳು ಪತ್ತೆ­ಯಾ­ಗಿ­ದ್ದವು.  ಅಂದರೆ ಇದು ಶೇ 30 ರಷ್ಟು  ಹೆಚ್ಚಳ.

2014ರಲ್ಲಿ ದೇಶದಾದ್ಯಂತ ನಡೆಸ­ಲಾದ ಗಣತಿ ವರದಿ­­ಯನ್ನು ಪರಿಸರ ಸಚಿವ ಪ್ರಕಾಶ್‌ ಜಾವಡೇಕರ್‌ ಮಂಗಳವಾರ ಬಿಡುಗಡೆ ಮಾಡಿದರು. ರಾಷ್ಟ್ರಪ್ರಾಣಿಯ ಸಂಖ್ಯೆ­ಯಲ್ಲಿ ಏರಿಕೆ­ಯಾಗಿರುವುದನ್ನು ಅವರು ‘ಯಶಸ್ಸಿನ ಕಥೆ’ ಎಂದು ಬಣ್ಣಿಸಿ­ದರು. ಇದೇ ವೇಳೆ ವಿಶ್ವದಾದ್ಯಂತ ಹುಲಿಗಳ ಸಂಖ್ಯೆಯಲ್ಲಿ ಇಳಿಕೆಯಾಗಿ­ರುವ ಅಂಶ­ವನ್ನೂ ಗಮನಕ್ಕೆ ತಂದರು.

2006ರಲ್ಲಿ 1,411ರಷ್ಟಿದ್ದ ಹುಲಿಗಳ ಸಂಖ್ಯೆ 2010ರಲ್ಲಿ 1,706ಕ್ಕೆ ಏರಿತ್ತು. 18 ರಾಜ್ಯಗಳ 3.78 ಲಕ್ಷ ಚದರ ಕಿ.ಮೀ.ಗಳಲ್ಲಿ ಹುಲಿ­ಗಣತಿ ನಡೆಸ­ಲಾಗಿದೆ. ಒಟ್ಟು 1,540 ಹುಲಿಗಳ ವಿಶೇಷ ಚಿತ್ರ­ಗಳನ್ನು ತೆಗೆಯಲಾಗಿದೆ.   ಭಾರತದ ಶೇ 80 ರಷ್ಟು ಹುಲಿಗಳ ಚಿತ್ರಗ­ಳನ್ನು ತೆಗೆಯ­ಲಾಗಿದೆ. ಇದಕ್ಕಾಗಿ 9,735 ಕ್ಯಾಮೆರಾ­ಗಳನ್ನು ಬಳಸಲಾ­ಗಿದೆ. ವಿಶ್ವದ ಯಾವುದೇ ದೇಶದಲ್ಲಿ ಇಷ್ಟೊಂದು ಸಂಖ್ಯೆಯ ಚಿತ್ರಗಳನ್ನು ಸೆರೆ­ಹಿಡಿಯಲಾಗಿಲ್ಲ ಎಂದು ಸಚಿವರು ವಿವರಿಸಿದರು.

‘ಏರಿಕೆ ಕಾರಣವೇನು?’
ಬೇಟೆ ನಿಯಂತ್ರಣ, ಮಾನವ –ಪ್ರಾಣಿ ಸಂಘರ್ಷ ಕಡಿಮೆ­ಯಾಗಿ­ರುವು­ದರಿಂದ ಹುಲಿಗಳ ಸಂಖ್ಯೆಯಲ್ಲಿ ಏರಿಕೆ­ಯಾಗಿದೆ ಎಂದು -ಕೇಂದ್ರ ಸಚಿವ ಪ್ರಕಾಶ್‌ ಜಾವಡೇಕರ್‌ ಹೇಳಿದರು.

‘ಹುಲಿಮರಿಗಳನ್ನು ಇತರ ದೇಶ­ಗಳಿಗೆ  ನೀಡಲು ಭಾರತ ಇಚ್ಛೆ ಹೊಂದಿದೆ. ಅಳಿವಿನಂಚಿನಲ್ಲಿರುವ ಪ್ರಾಣಿಯನ್ನು ಸಂರಕ್ಷಿ­ಸುವ ಯತ್ನ­ದಲ್ಲಿ ಭಾರತವೂ ಮಹತ್ವದ ಪಾತ್ರ ವಹಿಸಲಿದೆ’ ಎಂದು ಜಾವಡೇಕರ್‌ ಹೇಳಿದರು. ವನ್ಯಜೀವಿ ಪಾಲಕರು  ಮತ್ತು ಹುಲಿ ಅಭಯಾರಣ್ಯಗಳ ಕ್ಷೇತ್ರ ನಿರ್ದೇಶಕರ ಕಾರ್ಯಾಗಾರ ಉದ್ಘಾಟಿಸಿ  ಮಾತನಾಡಿದರು.

ಪಶ್ಚಿಮ ಘಟ್ಟ: ವಿಶ್ವದ  ಹುಲಿ ಕೇಂದ್ರ
ಜೀವ ವೈವಿಧ್ಯ ಸಮೃದ್ಧ ಪಶ್ಚಿಮ ಘಟ್ಟ ವಿಶ್ವದಲ್ಲೇ ಅತಿ ಹೆಚ್ಚು ಹುಲಿಗಳನ್ನು ಹೊಂದಿದೆ. ಪಶ್ಚಿಮ ಘಟ್ಟಗಳಲ್ಲಿನ ಹುಲಿಗಳ ಸಂಖ್ಯೆಯಲ್ಲಿ ಗಣನೀಯ ಏರಿಕೆಯಾಗಿದೆ ಎಂಬುದನ್ನು ಈ ಗಣತಿ ದೃಢಪಡಿಸಿದೆ.

ಮುದುಮಲೈ, ಬಂಡೀಪುರ, ನಾಗರಹೊಳೆ, ವಯನಾಡು, ಗೋವಾ ಸೇರಿ ಪಶ್ಚಿಮ ಘಟ್ಟದ ಪ್ರದೇಶದಲ್ಲಿ  ವಿಶ್ವದಲ್ಲೇ ಅತ್ಯಧಿಕ ಹುಲಿಗಳು ಪತ್ತೆಯಾಗಿವೆ. 2014 ರ ಗಣತಿ ಪ್ರಕಾರ ಇಲ್ಲಿ 776 ಹುಲಿಗಳಿವೆ. 

ಇದರಲ್ಲಿ ಕರ್ನಾಟಕ ಭಾಗದಲ್ಲಿ 406, ಕೇರಳದಲ್ಲಿ 136 ಮತ್ತು ತಮಿಳುನಾಡಿನಲ್ಲಿ 229 ಹುಲಿಗಳಿವೆ. ಕಳೆದ ಬಾರಿಯ ಗಣತಿಯಲ್ಲಿ ಗೋವಾದಲ್ಲಿ ಒಂದೂ ಹುಲಿ ಸಿಕ್ಕಿರಲಿಲ್ಲ. ಈ ಬಾರಿ 5 ಪತ್ತೆಯಾಗಿವೆ.