5 ವರ್ಷಗಳಲ್ಲಿ ಹುಲಿ ದಾಳಿಯಿಂದ 302 ಜನರು ಸಾವು: ಮಹಾರಾಷ್ಟ್ರದಲ್ಲಿ ಅತ್ಯಧಿಕ

ನವದೆಹಲಿ: ಕಳೆದ ಐದು ವರ್ಷಗಳಲ್ಲಿ ದೇಶದಲ್ಲಿ ಒಟ್ಟು 302 ಮಂದಿ ಹುಲಿ ದಾಳಿಯಿಂದ ಮೃತಪಟ್ಟಿದ್ದಾರೆ. ಈ ಪೈಕಿ ಶೇ 55ರಷ್ಟು ಸಾವುಗಳು ಮಹಾರಾಷ್ಟ್ರದಲ್ಲಿಯೇ ಸಂಭವಿಸಿವೆ ಎಂದು ಅಧಿಕೃತ ಅಂಕಿ ಅಂಶಗಳು ತಿಳಿಸಿವೆ. ಸಂತ್ರಸ್ತರ ಕುಟುಂಬಗಳಿಗೆ ಪರಿಹಾರವಾಗಿ ಕೇಂದ್ರ ಸರ್ಕಾರ ₹29.57 ಕೋಟಿ ನೀಡಿದೆ.

ರಾಜ್ಯವಾರು ಮಾಹಿತಿ..

ಈ ಅವಧಿಯಲ್ಲಿ, ಮಹಾರಾಷ್ಟ್ರವೊಂದರಲ್ಲೇ 170 ಸಾವುಗಳು ದಾಖಲಾಗಿದ್ದವು. 2022ರಲ್ಲಿ 85, 2021ರಲ್ಲಿ 32, 2020 ರಲ್ಲಿ 25, 2019ರಲ್ಲಿ 26 ಹಾಗೂ 2018ರಲ್ಲಿ ಇಬ್ಬರು ಮೃತಪಟ್ಟಿದ್ದರು.

ಕಳೆದ ಐದು ವರ್ಷಗಳಲ್ಲಿ ಉತ್ತರ ಪ್ರದೇಶದಲ್ಲಿ 39 ಜನರು ಮೃತಪಟ್ಟಿದ್ದರು. 2022 ಮತ್ತು 2021 ರಲ್ಲಿ ತಲಾ 11 ಮಂದಿ, 2020ರಲ್ಲಿ 4, 2019ರಲ್ಲಿ 8 ಹಾಗೂ 2018ರಲ್ಲಿ ಐವರು ಮೃತಪಟ್ಟಿದ್ದರು.

ದತ್ತಾಂಶಗಳ ಪ್ರಕಾರ ಬಿಹಾರದಲ್ಲಿ ಹುಲಿ ದಾಳಿ ಸಂಬಂಧಿತ ಸಾವು ಕಡಿಮೆ ವರದಿಯಾಗಿವೆ. 2019ರಲ್ಲಿ ಶೂನ್ಯ, 2020ರಲ್ಲಿ ಒಂದು, 2021ರಲ್ಲಿ 4 ಮತ್ತು 2022ರಲ್ಲಿ 9 ಜನರು ಸಾವಿಗೀಡಾಗಿದ್ದರು.

ವಾರ್ಷಿಕ ಶೇ 6ರಷ್ಟು ಏರಿಕೆ

ಭಾರತದಲ್ಲಿ 2018ರಲ್ಲಿ 2,967 ಇದ್ದ ಹುಲಿಗಳ ಸಂಖ್ಯೆ 2022ರ ವೇಳೆಗೆ 3,682ಕ್ಕೆ ಏರಿಕೆಯಾಗಿದೆ. ಈ ವರ್ಷದ ಜುಲೈನಲ್ಲಿ ಬಿಡುಗಡೆಯಾದ ಸರ್ಕಾರಿ ಅಂಕಿಅಂಶಗಳ ಪ್ರಕಾರ ವಾರ್ಷಿಕ ಶೇ 6ರಷ್ಟು ಏರಿಕೆಯಾಗಿದೆ.

ಕಳೆದ ನಾಲ್ಕು ವರ್ಷಗಳಲ್ಲಿ 50 ಪ್ರತಿಶತ ಹೆಚ್ಚಳದೊಂದಿಗೆ, ಮಧ್ಯಪ್ರದೇಶವು, ದೇಶದಲ್ಲಿ ಗರಿಷ್ಠ ಸಂಖ್ಯೆಯ(785) ಹುಲಿಗಳನ್ನು ಹೊಂದಿದೆ. ನಂತರದ ಸ್ಥಾನದಲ್ಲಿ ಕರ್ನಾಟಕ (563), ಉತ್ತರಾಖಂಡ (560) ಹಾಗೂ ಮಹಾರಾಷ್ಟ್ರದ (444) ಹುಲಿಗಳನ್ನು ಹೊಂದಿದೆ.