2021ರಿಂದ 71 ಹುಲಿಗಳ ಅಸಹಜ ಸಾವು: ಪರಿಸರ ಸಚಿವಾಲಯ​

ನವದೆಹಲಿ: ಬೇಟೆ ಮತ್ತು ಕಾಯಿಲೆ ಸೇರಿದಂತೆ ಅಸಹಜ ಕಾರಣಗಳಿಂದಾಗಿ 2021ರಿಂದ 71 ಹುಲಿಗಳು ಮೃತಪಟ್ಟಿವೆ ಎಂದು ಪರಿಸರ ಸಚಿವಾಲಯ ಸೋಮವಾರ ತಿಳಿಸಿದೆ.

ಮಧ್ಯಪ್ರದೇಶದಲ್ಲಿ 20 , ಮಹಾರಾಷ್ಟ್ರದಲ್ಲಿ 15, ಕರ್ನಾಟಕದಲ್ಲಿ ನಾಲ್ಕು ಹುಲಿಗಳು ಸಾವಿಗೀಡಾಗಿವೆ ಎಂದು ಪರಿಸರ, ಹವಾಮಾನ ಬದಲಾವಣೆ ಮತ್ತು ಅರಣ್ಯ ಖಾತೆಯ ರಾಜ್ಯ ಸಚಿವ ಕೀರ್ತಿವರ್ಧನ್‌ ಸಿಂಗ್‌ ಲೋಕಸಭೆಯಲ್ಲಿ ಪ್ರಶ್ನೆಯೊಂದಕ್ಕೆ ಉತ್ತರಿಸಿದ್ದಾರೆ.

2021ರಲ್ಲಿ 20, 2022 ಹಾಗೂ 2023ರಲ್ಲಿ ತಲಾ 25 ಹುಲಿಗಳು ಮೃತಪಟ್ಟಿವೆ ಎಂದು ವರದಿಯಾಗಿದ್ದು, 2024ರಲ್ಲಿ ಇಲ್ಲಿಯವರೆಗೂ ಒಂದು ಹುಲಿಯ ಅಸಹಜ ಸಾವು ದೃಢಪಟ್ಟಿದೆ ಎಂದು ಸಚಿವರು ಮಾಹಿತಿ ನೀಡಿದ್ದಾರೆ.

ದೇಶದಲ್ಲಿ ಹುಲಿಗಳ ಸಂಖ್ಯೆಯು ವಾರ್ಷಿಕವಾಗಿ ಶೇ 6ರಷ್ಟು ಹೆಚ್ಚುತ್ತಿದೆ ಎಂದು ಲಿಖಿತ ಉತ್ತರದಲ್ಲಿ ತಿಳಿಸಿದ್ದಾರೆ.