ಎಎಪಿ ಸಂಸ್ಥಾಪಕ ಸದಸ್ಯ ದಿನೇಶ್ ವಘೇಲಾ ನಿಧನ

ಪಣಜಿ: ಆಮ್ ಆದ್ಮಿ ಪಕ್ಷದ ಸಂಸ್ಥಾಪಕ ಸದಸ್ಯ, ಬಾಬಾಜಿ ಎಂದು ಗುರುತಿಸಲಾಗುತ್ತಿದ್ದ ದಿನೇಶ್ ವಘೇಲಾ (73) ಅವರು ನಿಧನರಾಗಿದ್ದಾರೆ ಎಂದು ಎಎಪಿ ಮುಖಂಡರೊಬ್ಬರು ಮಂಗಳವಾರ ತಿಳಿಸಿದ್ದಾರೆ.

ಅನಾರೋಗ್ಯದಿಂದ ವಘೇಲಾ ಅವರು ಸೋಮವಾರ ರಾತ್ರಿ ಗೋವಾದ ಪಣಜಿಯಲ್ಲಿರುವ ತಮ್ಮ ನಿವಾಸದಲ್ಲಿ ನಿಧನರಾಗಿದ್ದಾರೆ ಎಂದು ಎಎಪಿ ಗೋವಾ ಉಪಾಧ್ಯಕ್ಷ ವಾಲ್ಮೀಕಿ ನಾಯಕ್ ತಿಳಿಸಿದ್ದಾರೆ.

ವಘೇಲಾ ಅವರು ಆಮ್ ಆದ್ಮಿ ಪಕ್ಷದ ರಾಷ್ಟ್ರೀಯ ಕಾರ್ಯದರ್ಶಿಯಾಗಿದ್ದರು. ಅಲ್ಲದೇ ಅವರು ಎಎಪಿಯ ಶಿಸ್ತು ಸಮಿತಿಯ ಮುಖ್ಯಸ್ಥರಾಗಿಯೂ ಸೇವೆ ಸಲ್ಲಿಸಿದ್ದರು.

ಮೂಲತಃ ಗುಜರಾತ್‌ನವರಾದ ವಘೇಲಾ ಅವರು ಗೋವಾದಲ್ಲಿ ವಾಸಿಸುತ್ತಿದ್ದರು.