UP Elections 2022: ಮತ ಎಣಿಕೆ ಲೈವ್ ವೆಬ್‌ಕಾಸ್ಟ್‌‌ಗೆ ಸಮಾಜವಾದಿ ಪಕ್ಷ ಒತ್ತಾಯ

ಲಖನೌ: ವಾರಾಣಸಿಯಲ್ಲಿ ಮತಯಂತ್ರಗಳನ್ನು (ಇವಿಎಂ) ಅಕ್ರಮವಾಗಿ ಸಾಗಿಸಲಾಗಿದೆ ಎಂಬ ಗಂಭೀರ ಆರೋಪದ ಬೆನ್ನಲ್ಲೇ ಸಮಾಜವಾದಿ ಪಕ್ಷ,ಉತ್ತರ ಪ್ರದೇಶ ವಿಧಾನಸಭೆ ಚುನಾವಣೆಯ ಸಂಪೂರ್ಣ ಮತಎಣಿಕೆ ಪ್ರಕ್ರಿಯೆಯನ್ನು ಲೈವ್ ವೆಬ್‌ಕಾಸ್ಟ್ ಮಾಡುವಂತೆ ಒತ್ತಾಯಿಸಿದೆ.

ಈ ವೆಬ್‌ಕಾಸ್ಟ್ ಲಿಂಕ್ ಅನ್ನು ಚುನಾವಣಾ ಆಯುಕ್ತರು ಹಾಗೂ ಇತರ ಪ್ರಮುಖ ಚುನಾವಣಾ ಅಧಿಕಾರಿಗಳನ್ನು ಹೊರತುಪಡಿಸಿ ಚುನಾವಣೆಯಲ್ಲಿ ಸ್ಪರ್ಧಿಸಿದ ರಾಜಕೀಯ ಪಕ್ಷಗಳಿಗೆ ಒದಗಿಸಬೇಕು ಎಂದು ಹೇಳಿದೆ.

ಉತ್ತರ ಪ್ರದೇಶ ಸೇರಿದಂತೆ ಪಂಚ ರಾಜ್ಯಗಳ ಮತಎಣಿಕೆಯು ನಾಳೆ (ಮಾರ್ಚ್ 10) ನಡೆಯಲಿರುವಂತೆಯೇ ಮಹತ್ವದ ಬೆಳವಣಿಗೆಗಳು ಕಂಡುಬಂದಿವೆ.

ಪಾರದರ್ಶಕ, ಸ್ವತಂತ್ರ ಹಾಗೂ ನಿಷ್ಪಕ್ಷಪಾತ ಮತ ಎಣಿಕೆ ಬಯಸಿರುವ ಸಮಾಜವಾದಿ ಪಕ್ಷವು ಶೇ 50ಕ್ಕೂ ಹೆಚ್ಚು ಚುನಾವಣಾ ಕೇಂದ್ರಗಳಲ್ಲಿ ಮತ ಎಣಿಕೆಯ ಪಕ್ರಿಯೆಯನ್ನುವೆಬ್‌ಕಾಸ್ಟ್ ಮಾಡಬೇಕು ಎಂದು ಪತ್ರದಲ್ಲಿ ಉಲ್ಲೇಖಿಸಿದೆ.