ಒಂದೇ ವಿಮಾನದಲ್ಲಿ ನಿತಿಶ್‌ ಕುಮಾರ್, ತೇಜಸ್ವಿ ಯಾದವ್ ಪ್ರಯಾಣ: ಗರಿಗೆದರಿದ ಕುತೂಹಲ

ನವದೆಹಲಿ: ಲೋಕಸಭಾ ಚುನಾವಣೆಯ ಫಲಿತಾಂಶದ ಬೆನ್ನಲ್ಲೇ ಕ್ರಮವಾಗಿ ಎನ್‌ಡಿಎ ಹಾಗೂ ಇಂಡಿಯಾ ಮೈತ್ರಿಕೂಟದ ಸಭೆಗಳಲ್ಲಿ ಭಾಗವಹಿಸಲು ಬಿಹಾರ ಮುಖ್ಯಮಂತ್ರಿ ನಿತಿಶ್ ಕುಮಾರ್ ಮತ್ತು ಆರ್‌ಜೆಡಿ ನಾಯಕ ತೇಜಸ್ವಿ ಯಾದವ್ ಒಂದೇ ವಿಮಾನದಲ್ಲಿ ‌ಪ್ರಯಾಣಿಸಿದ್ದಾರೆ.

ನಿತಿಶ್‌ ಮತ್ತು ಯಾದವ್ ಒಂದೇ ವಿಮಾನದಲ್ಲಿ ಪ್ರಯಾಣಿಸಿರುವ ದೃಶ್ಯಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು, ಕುತೂಹಲಕ್ಕೆ ಎಡೆಮಾಡಿಕೊಟ್ಟಿದೆ.

ಮೊದಲು ಹಿಂದಿನ ಸೀಟಿನಲ್ಲಿ ಕುಳಿತಿದ್ದ ಯಾದವ್ ಅವರು, ನಂತರ ನಿತಿಶ್ ಅವರ ಪಕ್ಕ ಬಂದು ಕುಳಿತು ಚರ್ಚೆ ನಡೆಸಿದ್ದರು ಎಂದೂ ವರದಿಯಾಗಿದೆ.

ಮೈತ್ರಿಕೂಟಗಳನ್ನು ಬದಲಿಸುವುದರಲ್ಲಿ ನಿಸ್ಸೀಮರಾಗಿರುವ ನಿತಿಶ್‌ ಕುಮಾರ್ ಅವರು ಮೊದಲು ಎನ್‌ಡಿಎದೊಂದಿಗೆ ಮೈತ್ರಿ ಮಾಡಿಕೊಂಡಿದ್ದರು. ನಂತರ ಆರ್‌ಜೆಡಿಗೆ ಜಿಗಿದಿದ್ದರು. ಅದಾದ ಸ್ವಲ್ಪ ದಿನದಲ್ಲೇ ಮರಳಿ ಎನ್‌ಡಿಎಗೆ ಬಂದಿದ್ದರು.

ಮಂಗಳವಾರ ಪ್ರಕಟಗೊಂಡ ಚುನಾವಣಾ ಫಲಿತಾಂಶದಲ್ಲಿ ಯಾವುದೇ ಪಕ್ಷಕ್ಕೆ ಸ್ಪಷ್ಟ ಬಹುಮತ ಸಿಕ್ಕಿಲ್ಲ. ಈ ಮಹಾ ಸಮರದಲ್ಲಿ ಟಿಡಿಪಿ ನಾಯಕ ಚಂದ್ರಬಾಬು ನಾಯ್ಡು ಮತ್ತು ಜೆಡಿಯು ನಾಯಕ ನಿತಿಶ್ ಕುಮಾರ್ ಕಿಂಗ್ ಮೇಕರ್‌ಗಳಾಗಿ ಹೊರಹೊಮ್ಮಿದ್ದಾರೆ.

ಫಲಿತಾಂಶದ ಬೆನ್ನಲ್ಲೇ ಇಂಡಿಯಾ ಮತ್ತು ಎನ್‌ಡಿಎ ಮೈತ್ರಿಕೂಟ ದೆಹಲಿಯಲ್ಲಿ ಮಹತ್ತರ ಸಭೆಗಳನ್ನು ಏರ್ಪಡಿಸಿದ್ದು, ಆ ಸಭೆಗಳಲ್ಲಿ ಭಾಗವಹಿಸಲು ನಿತಿಶ್ ಮತ್ತು ಯಾದವ್ ದೆಹಲಿಗೆ ಪ್ರಯಾಣ ಬೆಳೆಸಿದ್ದರು ಎಂದು ತಿಳಿದುಬಂದಿದೆ.

ಬಿಹಾರದ 40 ಸ್ಥಾನಗಳಿಗೆ ನಡೆದ ಚುನಾವಣೆಯಲ್ಲಿ ಎನ್‌ಡಿಎಗೆ 24 (ನಿತಿಶ್ ಕುಮಾರ್ ನೇತೃತ್ವದ ಜೆಡಿಯುಗೆ 12, ಬಿಜೆಪಿಗೆ 12), ಇಂಡಿಯಾಗೆ 7(ಆರ್‌ಜೆಡಿ 4, ಕಾಂಗ್ರೆಸ್‌ 3), ಇತರ ಪಕ್ಷಗಳಿಗೆ 9 ಸ್ಥಾನ ಲಭಿಸಿದ್ದವು.

ಎನ್ ಡಿಎ, ಇಂಡಿಯಾ ಮೈತ್ರಿಕೂಟಗಳ ಸಭೆಗಳಲ್ಲಿ ಭಾಗವಹಿಸಲು ಈ ಇಬ್ಬರು ನಾಯಕರೂ ಒಟ್ಟಾಗಿ ಪ್ರಯಾಣ ಬೆಳೆಸಿದ್ದು ಸದ್ಯ ರಾಜಕೀಯ ವಲಯದಲ್ಲಿ ಹೊಸ ಲೆಕ್ಕಾಚಾರಗಳಿಗೆ ನಾಂದಿ ಹಾಡಿದೆ.