ಬಿಹಾರ: ನಳಂದ ಜಿಲ್ಲೆಯಲ್ಲಿ ದಂಪತಿಯ ಕೊಲೆ– ಸುಟ್ಟುಕರಕಲಾದ ಶವಗಳು

ನಳಂದ, ಬಿಹಾರ: ದಂಪತಿಯನ್ನು ಕೊಲೆ ಮಾಡಿ ನಂತರ ಅವರ ಶವಗಳನ್ನು ಮನೆಯೊಳಗೆ ಸುಟ್ಟು ಹಾಕಿರುವ ಘಟನೆ ಬಿಹಾರದ ನಳಂದ ಜಿಲ್ಲೆಯ ಡೋಗಿ ಎಂಬಲ್ಲಿ ಭಾನುವಾರ ನಡೆದಿದೆ.

ಮೃತರನ್ನು ಚಬಿಲಾಪುರ ಪೊಲೀಸ್ ಠಾಣಾ ವ್ಯಾಪ್ತಿಯ ಡೋಗಿ ಹಳ್ಳಿಯ ವಿಜಯಪ್ರಸಾದ ಹಾಗೂ ಅವರ ಪತ್ನಿ ಶಾರದಾ ಎಂದು ಗುರುತಿಸಲಾಗಿದೆ.

ಕೊಲೆ ಹಿಂದಿನ ಕಾರಣ ಇನ್ನೂ ತಿಳಿದು ಬಂದಿಲ್ಲ. ಕೊಲೆಗಾರರ ಪತ್ತೆಗೆ ತನಿಖಾ ತಂಡ ರಚಿಸಲಾಗಿದೆ ಎಂದು ನಳಂದ ಎಸ್‌ಪಿ ಪಿಟಿಐಗೆ ತಿಳಿಸಿದ್ದಾರೆ.

ಮೃತರು ಕೊಲೆಯಾಗುವ ಕೆಲ ಗಂಟೆ ಮುಂಚೆ ಗ್ರಾಮದ ಧಾರ್ಮಿಕ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದನ್ನು ಗ್ರಾಮಸ್ಥರು ಕಂಡಿದ್ದರು. ಕೊಲೆ ಸುದ್ದಿ ತಿಳಿದು ಸ್ಥಳಕ್ಕೆ ಭೇಟಿ ಕೊಟ್ಟಾಗ ಶವಗಳು ಸಂಪೂರ್ಣ ಸುಟ್ಟು ಕರಕಲಾಗಿದ್ದವು ಎಂದು ಪೊಲೀಸರು ತಿಳಿಸಿದ್ದಾರೆ.

ಘಟನೆ ನಡೆದ ದಿನ ವಿಜಯಪ್ರಸಾದ ಅವರ 22 ವರ್ಷದ ಮಗ ಮನೆಯಲ್ಲಿರಲಿಲ್ಲ. ಆತನನ್ನು ತೀವ್ರ ವಿಚಾರಣೆಗೆ ಒಳಪಡಿಸಿದ್ದೇವೆ ಎಂದು ಪೊಲೀಸರು ಹೇಳಿದ್ದಾರೆ.