ದೇಶದ ಅತ್ಯಂತ ಸ್ವಚ್ಛ ನಗರ ಇಂದೋರ್‌ನಲ್ಲಿ ಕುಸಿದ ಗಾಳಿಯ ಗುಣಮಟ್ಟ

ಇಂದೋರ್‌: ತ್ಯಾಜ್ಯ ನಿರ್ವಹಣೆ ಯಲ್ಲಿ ದೇಶದ ಸ್ವಚ್ಛ ನಗರ ಎಂಬ ಖ್ಯಾತಿಗೆ ಸತತ ಏಳು ವರ್ಷ ಭಾಜನವಾಗಿದ್ದ ಇಂದೋರ್‌ನಲ್ಲಿ, ಗಾಳಿಯ ಗುಣಮಟ್ಟವು ‘ಅತ್ಯಂತ ಕಳಪೆ’ಯಾಗಿದೆ ಎಂದು ಶುಕ್ರವಾರ ದಾಖಲಾಗಿದೆ.

ಮಧ್ಯಪ್ರದೇಶದ ಆರ್ಥಿಕ ರಾಜಧಾನಿಯೂ ಆಗಿರುವ ಈ ನಗರದಲ್ಲಿ ವಾಯು ಗುಣಮಟ್ಟ ಸೂಚ್ಯಂಕವು (ಎಕ್ಯೂಐ) 400 ಅನ್ನು ದಾಟಿದ್ದು, ಇದೀಗ ‘ವಿಷಮ ಸ್ಥಿತಿ’ಯ ವರ್ಗಕ್ಕೆ ಸೇರ್ಪಡೆಯಾಗಿದೆ.

ನಗರದ ಜನನಿಬಿಡ ಹಾಗೂ ವಾಹನದಟ್ಟಣೆಯ ಛೋಟಿ ಗ್ವಾಲ್ಟೋಲಿ ಪ್ರದೇಶದಲ್ಲಿ ಎಕ್ಯೂಐ ಮಧ್ಯಾಹ್ನ 404ಕ್ಕೆ ದಾಖಲಾಗಿದ್ದರೆ, ಪಿ.ಎಂ 2.5 (ದೂಳಿನ ಕಣಗಳ ಸಾಂದ್ರತೆ) ಸರಾಸರಿ 255.26 ಇದ್ದರೆ, ಪಿಎಂ 10ರ ಸರಾಸರಿ ಮಟ್ಟ 318.08 ದಾಖಲಾಗಿತ್ತು ಎಂದು ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿಯು ಮಾಹಿತಿ ನೀಡಿದೆ.

‘ದೀಪಾವಳಿ ಹಬ್ಬದ ಸಂಭ್ರಮ ಗುರುವಾರ ಬೆಳಿಗ್ಗೆಯಿಂದಲೇ ನಗರದಲ್ಲಿ ಮನೆ ಮಾಡಿತ್ತು. ಇದರೊಟ್ಟಿಗೆ ಪಟಾಕಿಗಳ ಸಿಡಿತವೂ ಜೋರಾಗಿತ್ತು. ಇದು ತಡರಾತ್ರಿ ಯವರೆಗೂ ಮುಂದುವರೆದಿತ್ತು. ಶುಕ್ರವಾರವೂ ಹಲವು ಪ್ರದೇಶಗಳಲ್ಲಿ ಇದೇ ಚಿತ್ರಣವಿತ್ತು. ನಗರದಲ್ಲಿನ ಗಾಳಿಯ ಗುಣಮಟ್ಟವು ‘ವಿಷಮ ಸ್ಥಿತಿ’ ತಲುಪಲು ಇದೇ ಮುಖ್ಯ ಕಾರಣವಾಗಿದೆ’ ಎಂದು ಪರಿಸರ ತಜ್ಞ ಹಾಗೂ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿಯ ನಿವೃತ್ತ ಅಧಿಕಾರಿ ಡಾ. ದಿಲೀಪ್ ವಘೇಲಾ ಅವರು ಸುದ್ದಿಸಂಸ್ಥೆಗೆ ಮಾಹಿತಿ ನೀಡಿದರು.

‘ಶುಕ್ರವಾರ ಬೆಳಿಗ್ಗೆ 8.30ಕ್ಕೆ ನಗರದಲ್ಲಿ ಗಾಳಿಯ ವೇಗ ಶೂನ್ಯವಾಗಿತ್ತು’ ಎಂದು ಹವಾಮಾನ ಇಲಾಖೆ ತಿಳಿಸಿದೆ. ‘ಶಾಂತ ಗಾಳಿಯಿಂದಾಗಿ ಮಾಲಿನ್ಯಕಾರಕಗಳು ಬೇರೆಡೆ ಪಸರಿಸದೆ ಒಂದೇ ಸ್ಥಳದಲ್ಲಿವೆ. ಇದು ಗಾಳಿಯ ಗುಣಮಟ್ಟವನ್ನು ಮತ್ತಷ್ಟು ಕುಸಿಯುವಂತೆ ಮಾಡಿದೆ’ ಎಂದು ಅವರು ಹೇಳಿದರು. ನಗರದ ಗಾಳಿಯ ಗುಣಮಟ್ಟವು ಸಹಜವಾಗಿ ‘ತೃಪ್ತಿದಾಯಕ’ (ಎಕ್ಯೂಐ 51–100) ವರ್ಗದಲ್ಲಿ ಇರುತ್ತಿತ್ತು ಎಂದು ತಜ್ಞರು ಹೇಳಿದ್ದಾರೆ.

ದೆಹಲಿ ವಾಯು ಗುಣಮಟ್ಟ ಸ್ಥಿರ: ಡಿಪಿಸಿಸಿ

ನವದೆಹಲಿ (ಪಿಟಿಐ): ರಾಷ್ಟ್ರ ರಾಜಧಾನಿಯ ವಾಯು ಗುಣಮಟ್ಟ ಸೂಚ್ಯಂಕವು ಈ ದೀಪಾವಳಿಯಲ್ಲಿ ಯಾವುದೇ ಮಹತ್ತರ ಬದಲಾವಣೆ ಹೊಂದಿಲ್ಲ ಎಂದು ದೆಹಲಿಯ ಮಾಲಿನ್ಯ ನಿಯಂತ್ರಣ ಮಂಡಳಿಯು ಹೇಳಿಕೊಂಡಿದೆ.

ಬಹುತೇಕರು ಮಾಲಿನ್ಯ ನಿಯಮಗಳನ್ನು ಉಲ್ಲಂಘಿಸಿದ ಬಳಿಕವೂ ದೆಹಲಿ ಮಾಲಿನ್ಯ ನಿಯಂತ್ರಣ ಮಂಡಳಿಯ ವರದಿಯ ಪ್ರಕಾರ, 24 ಗಂಟೆಗಳ ಸರಾಸರಿ ಎಕ್ಯೂಐ ಗುರುವಾರ 328ಕ್ಕೆ ತಲುಪಿದ್ದು, ದೀಪಾವಳಿ ಹಬ್ಬದ ಒಂದು ದಿನದ ನಂತರ 362ಕ್ಕೆ ಏರಿದೆ.

ಕಳೆದ ವರ್ಷದ ದೀಪಾವಳಿಗೆ ಹೋಲಿಸಿದರೆ ಪಿಎಂ 2.5 ಮಟ್ಟವು ಶೇಕಡಾ 4ರಷ್ಟು ಕಡಿಮೆಯಾಗಿದೆ ಎಂದು ವರದಿ ಹೇಳಿದೆ. 10 ಮೈಕ್ರೋಮೀಟರ್ ಅಥವಾ ಅದಕ್ಕಿಂತ ಕಡಿಮೆ ವ್ಯಾಸದ ಕಣಗಳನ್ನು ಒಳಗೊಂಡಿರುವ ಪಿಎಂ 10 ಮಟ್ಟವು ಶೇ 11ರಷ್ಟು ಹೆಚ್ಚಾಗಿದೆ.

ಕಲುಷಿತ ದೀಪಾವಳಿ: ದೆಹಲಿಯು ಮೂರು ವರ್ಷಗಳಲ್ಲಿ ಅತ್ಯಂತ ಕಲುಷಿತ ದೀಪಾವಳಿಯನ್ನು ದಾಖಲಿಸಿದೆ ಎಂದು ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ (ಸಿಪಿಸಿಬಿ) ದತ್ತಾಂಶವು ಹೇಳಿದೆ. 

ಗುರುವಾರ ನಗರದ 24 ಗಂಟೆಗಳ ಸರಾಸರಿ ಎಕ್ಯೂಐ 330ಕ್ಕೆ ದಾಖಲಾಗಿದೆ. 2023ರಲ್ಲಿ 218 ಹಾಗೂ 2022ರಲ್ಲಿ 312 ದಾಖಲಾಗಿತ್ತು. ಹಿಂದಿನ ಈ ಎರಡಕ್ಕೂ ಹೋಲಿಸಿದರೆ ಈ ಬಾರಿ ಹೆಚ್ಚಾಗಿದೆ ಎಂದಿದೆ.

ರಾಷ್ಟ್ರ ರಾಜಧಾನಿಯ ಎಕ್ಯೂಐ ಶುಕ್ರವಾರ ಬೆಳಿಗ್ಗೆ 9 ಗಂಟೆಗೆ 362ಕ್ಕೆ ಏರಿಕೆಯಾಗುವ ಮೂಲಕ ‘ಅತ್ಯಂತ ಕಳಪೆ’ ವಿಭಾಗದಲ್ಲಿ ದಾಖಲಾಗಿದೆ.