ಅರುಣಾಚಲ ಪ್ರದೇಶ | ಸಾರಿಗೆ ಸಂಸ್ಥೆಯ ಆವರಣ ಗೋಡೆ ಕುಸಿದು ನಾಲ್ವರು ಸಾವು

ಇಟಾನಗರ(ಅರುಣಾಚಲ ಪ್ರದೇಶ): ಭಾರಿ ಮಳೆಗೆ ಕರ್ಸಿಂಗ್ಸಾದಲ್ಲಿರುವ ಅರುಣಾಚಲ ಪ್ರದೇಶ ರಾಜ್ಯ ಸಾರಿಗೆ ಸೇವೆಗಳು(ಎಪಿಎಸ್‌ಟಿಎಸ್‌) ಕೇಂದ್ರ ಕಾರ್ಯಾಗಾರದ ಆವರಣ ಗೋಡೆ ಕುಸಿದು ಬಿದ್ದು, ನಾಲ್ವರು ಮೃತಪಟ್ಟಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ತಡರಾತ್ರಿ 1.30ರ ಸುಮಾರಿಗೆ ಘಟನೆ ನಡೆದಿದ್ದು, ಆವರಣ ಗೋಡೆಯ ಪಕ್ಕದಲ್ಲಿ ಇದ್ದ ಗುಡಿಸಲುಗಳ ಮೇಲೆ ಗೋಡೆ ಕುಸಿದು ದುರ್ಘಟನೆ ಸಂಭವಿಸಿದೆ ಎಂದು ಅವರು ತಿಳಿಸಿದರು.

ನಾಲ್ವರು ಸ್ಥಳದಲ್ಲಿಯೇ ಮೃತಪಟ್ಟಿದ್ದಾರೆ. ಮೂವರು ಗಂಭೀರವಾಗಿ ಗಾಯಗೊಂಡಿದ್ದು, ಪ್ರಾಣಾಪಾಯದಿಂದ ಪಾರಾಗಿದ್ದಾರೆ ಎಂದು ತಿಳಿಸಿದರು.

ಮೃತರನ್ನು ಊರ್ಮಿಳಾ ಬಿಸ್ವಾಸ್, ವಿಕಾಶ್ ಬಿಸ್ವಾಸ್, ಮುಕಿಬುರ್ ರೆಹಮಾನ್ ಮತ್ತು ಪಾಲ್ ಎಂದು ಗುರುತಿಸಲಾಗಿದೆ.

ಘಟನೆ ಬಗ್ಗೆ ಜಿಲ್ಲಾಡಳಿತಕ್ಕೆ ಮಾಹಿತಿ ನೀಡಲಾಗಿದ್ದು, ಮೃತದೇಹಗಳನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ ಎಂದು ನಹರ್ಲಗುನ್ ಪೊಲೀಸ್ ವರಿಷ್ಠಾಧಿಕಾರಿ ಮಿಹಿನ್ ಗ್ಯಾಂಬೋ ತಿಳಿಸಿದರು.