ವಿದೇಶ ಪ್ರಯಾಣ: ಇಂದ್ರಾಣಿ ಮುಖರ್ಜಿಗೆ ನೀಡಿದ ಅನುಮತಿ ರದ್ದುಪಡಿಸಿದ ಬಾಂಬೆ HC

ಮುಂಬೈ: ಪುತ್ರಿ ಶೀನಾ ಬೋರಾ ಕೊಲೆ ಪ್ರಕರಣದಲ್ಲಿ ಆರೋಪಿಯಾಗಿರುವ ಇಂದ್ರಾಣಿ ಮುಖರ್ಜಿ ಅವರಿಗೆ ವಿದೇಶ ಪ್ರಯಾಣ ಕೈಗೊಳ್ಳಲು ಅನುಮತಿ ನೀಡಿ ಸಿಬಿಐ ವಿಶೇಷ ನ್ಯಾಯಾಲಯ ಹೊರಡಿಸಿದ್ದ ಆದೇಶವನ್ನು ಬಾಂಬೆ ಹೈಕೋರ್ಟ್‌ ಶುಕ್ರವಾರ ರದ್ದು ಮಾಡಿದೆ.

ವಿಶೇಷ ನ್ಯಾಯಾಲಯದ ಆದೇಶ ಪ್ರಶ್ನಿಸಿ ಸಿಬಿಐ ಸಲ್ಲಿಸಿದ್ದ ಅರ್ಜಿಯನ್ನು ನ್ಯಾಯಮೂರ್ತಿ ಶ್ಯಾಮ್‌ ಚಾಂಡಕ್‌ ಅವರು ಇದ್ದ ಏಕಸದಸ್ಯ ಪೀಠ ವಿಚಾರಣೆ ನಡೆಸಿತು.

‘ಗಂಭೀರ ಅಪರಾಧ ಕೃತ್ಯ ಎಸಗಿದ ಆರೋಪಕ್ಕೆ ಸಂಬಂಧಿಸಿ ಇಂದ್ರಾಣಿ ಮುಖರ್ಜಿ ವಿಚಾರಣೆ ಎದುರಿಸುತ್ತಿದ್ದಾರೆ. ‌ಅವರು ದೇಶ ತೊರೆಯುವ ಸಾಧ್ಯತೆ ಇರುವ ಕಾರಣ, ವಿದೇಶ ಪ್ರಯಾಣಕ್ಕೆ ನೀಡಿರುವ ಅನುಮತಿಯನ್ನು ರದ್ದು ಮಾಡಬೇಕು’ ಎಂದು ಸಿಬಿಐ ಕೋರಿತ್ತು.

ಸಿಬಿಐ ವಾದವನ್ನು ಒಪ್ಪಿದ ಹೈಕೋರ್ಟ್‌, ‘ವಿಶೇಷ ನ್ಯಾಯಾಲಯದ ಆದೇಶವನ್ನು ರದ್ದುಪಡಿಸಲಾಗಿದೆ’ ಎಂದು ಹೇಳಿತು.

ಮುಂದಿನ ಮೂರು ತಿಂಗಳಲ್ಲಿ, ಸ್ಪೇನ್‌ ಹಾಗೂ ಬ್ರಿಟನ್‌ಗೆ ಒಟ್ಟು 10 ದಿನ ಪ್ರವಾಸ ಕೈಗೊಳ್ಳಲು ಮುಖರ್ಜಿ ಅವರಿಗೆ ಅನುಮತಿ ನೀಡಿ ಸಿಬಿಐ ವಿಶೇಷ ನ್ಯಾಯಾಲಯ ಜುಲೈ 19ರಂದು ಆದೇಶ ಹೊರಡಿಸಿತ್ತು.

ಬ್ಯಾಂಕಿಗೆ ಸಂಬಂಧಿಸಿದ ದಾಖಲೆಗಳಲ್ಲಿ ಬದಲಾವಣೆ ಮಾಡುವುದಕ್ಕೆ ಹಾಗೂ ಪತಿ ಪೀಟರ್‌ ಮುಖರ್ಜಿ ಅವರಿಂದ ವಿಚ್ಛೇದನ ಪಡೆದ ನಂತರ ಪೂರೈಸಬೇಕಾದ ಪ್ರಕ್ರಿಯೆಗಳಿಗೆ ಸಂಬಂಧಿಸಿ ವಿದೇಶಕ್ಕೆ ತೆರಳುವ ಸಲುವಾಗಿ ಇಂದ್ರಾಣಿ ಅನುಮತಿ ಕೋರಿದ್ದರು.