ಕೋವಿಡ್ ಸಾವು: ‘ಸೈನ್ಸ್ ಅಡ್ವಾನ್ಸಸ್’ ನಿಯತಕಾಲಿಕದ ವರದಿ ಅಲ್ಲಗಳೆದ ಕೇಂದ್ರ
‘ಸೈನ್ಸ್ ಅಡ್ವಾನ್ಸಸ್’ ನಿಯತಕಾಲಿಕದ ವರದಿ ಅಸಮರ್ಥನೀಯ, ಅಸ್ವೀಕಾರಾರ್ಹ–ಆರೋಗ್ಯ ಸಚಿವಾಲಯ
ನವದೆಹಲಿ: ಭಾರತದಲ್ಲಿ ಕೋವಿಡ್ ಅವಧಿಯ 2020ನೇ ಸಾಲಿನ ಜೀವಿತಾವಧಿ ಕುರಿತು ‘ಸೈನ್ಸ್ ಅಡ್ವಾನ್ಸಸ್’ ನಿಯತಕಾಲಿಕದಲ್ಲಿ ಪ್ರಕಟವಾದ ವರದಿಯು ‘ಅಸ್ವೀಕಾರಾರ್ಹ ಮತ್ತು ಅಸಮರ್ಥನೀಯ’ ಎಂದು ಕೇಂದ್ರ ಗೃಹ ಸಚಿವಾಲಯವು ಅಲ್ಲಗಳೆದಿದೆ.
ನಿಯತಕಾಲಿಕದ ವರದಿಯ ಅಂಶಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹೆಚ್ಚು ಮುನ್ನೆಲೆಗೆ ಬಂದ ಹಿಂದೆಯೇ ಶನಿವಾರ ಸಚಿವಾಲಯವು ಈ ಪ್ರತಿಕ್ರಿಯೆ ನೀಡಿದೆ.
ರಾಷ್ಟ್ರೀಯ ಕೌಟುಂಬಿಕ ಆರೋಗ್ಯ ಸಮೀಕ್ಷೆ–5 (ಎನ್‌ಎಫ್‌ಎಚ್‌ಎಸ್‌ –5) ವಿಶ್ಲೇಷಿಸುವಾಗ ಸಾಮಾನ್ಯ ಕ್ರಮವನ್ನೇ ಅನುಸರಿಸಲಾಗಿದೆ ಎಂದು ಲೇಖಕರು ಹೇಳಿಕೊಂಡಿದ್ದರೂ, ‘ವಿಶ್ಲೇಷಣಾ ಕ್ರಮದಲ್ಲಿಯೇ ಗಂಭೀರವಾದ ಲೋಪಗಳಿವೆ’ ಎಂದು ಸಚಿವಾಲಯ ದೂರಿದೆ.
ಸಚಿವಾಲಯವು ಈ ಕುರಿತ ಹೇಳಿಕೆಯಲ್ಲಿ ಪಟ್ಟಿ ಮಾಡಿರುವ ಅಂಶಗಳು ಹೀಗಿವೆ:
‘ಮುಖ್ಯವಾದ ಲೋಪವೆಂದರೆ ಲೇಖಕರು, ಎನ್‌ಎಫ್‌ಎಚ್‌ಎಸ್‌ ಸಮೀಕ್ಷೆಯ ಉಪವಿಭಾಗದಲ್ಲಿರುವ ಜನವರಿ–ಏಪ್ರಿಲ್‌ 2021ರ ಕುಟುಂಬಗಳ ಮಾಹಿತಿ ಜೊತೆಗೆ, ಈ ಕುಟುಂಬಗಳಲ್ಲಿ 2020 ಮತ್ತು 2019ರಲ್ಲಿ ಸಂಭವಿಸಿದ ಸಾವಿನ ಪ್ರಕರಣಗಳ ವಿವರ ಹೋಲಿಕೆ ಮಾಡುತ್ತಾರೆ. ಮತ್ತು ಈ ಹೋಲಿಕೆ ಫಲಿತಾಂಶವನ್ನು ಇಡೀ ದೇಶಕ್ಕೆ ಅನ್ವಯ ಮಾಡುತ್ತಾರೆ.
14 ರಾಜ್ಯಗಳ ಕುಟುಂಬಗಳ ಶೇ 23ರಷ್ಟು ಮಾಹಿತಿಯನ್ನಷ್ಟೇ ಈ ವಿಶ್ಲೇಷಣೆಗೆ ಬಳಸಿದೆ. ಇದು, ದೇಶದ ಒಟ್ಟು ಸ್ಥಿತಿಯ ಪ್ರಾತಿನಿಧಿಕವಲ್ಲ.
ಕೋವಿಡ್ ಪರಿಣಾಮ ಉತ್ತುಂಗದಲ್ಲಿದ್ದಾಗಿನ ಮಾಹಿತಿ ಆಯ್ಕೆ ಮಾಡಿ ವಿಶ್ಲೇಷಿಸಲಾಗಿದೆ. ಇದು, ತಾರತಮ್ಯದ ಕ್ರಮ.
‘ಸೈನ್ಸ್ ಅಡ್ವಾನ್ಸಸ್’ ವರದಿಗೆ ಆಧಾರವಾಗಿ ಭಾರತದ ಮಾದರಿ ನೋಂದಣಿ ವ್ಯವಸ್ಥೆ (ಎಸ್‌ಆರ್‌ಎಸ್) ಅಂಕಿಅಂಶಗಳನ್ನು ಬಳಸಲಾಗಿದೆ ಎಂದೂ ಸಚಿವಾಲಯ ಸ್ಪಷ್ಟಪಡಿಸಿದೆ.
ಎಸ್‌ಆರ್‌ಎಸ್‌ನ ಮಾಹಿತಿಯು 36 ರಾಜ್ಯಗಳು, ಕೇಂದ್ರಾಡಳಿತ ಪ್ರದೇಶಗಳಲ್ಲಿನ 8,842 ಮಾದರಿ ಘಟಕಗಳ ವ್ಯಾಪ್ತಿಗೆ ಒಳಪಡುವ 24 ಲಕ್ಷ ಕುಟುಂಬಗಳ 84 ಲಕ್ಷ ಜನಸಂಖ್ಯೆಯ ವಿವರಗಳನ್ನಷ್ಟೇ ಒಳಗೊಂಡಿತ್ತು ಎಂದು ಸಚಿವಾಲಯವು ವಿವರಿಸಿದೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.