ರಕ್ಷಣಾ ಖರೀದಿ: ₹802 ಕೋಟಿ ಮೊತ್ತದ ಒಪ್ಪಂದ

ನವದೆಹಲಿ: ಭಾರತೀಯ ಸೇನೆಗೆ ವಿವಿಧ ಸಲಕರಣೆ ಹಾಗೂ ಸಾಧನಗಳನ್ನು ಖರೀದಿಸುವುದಕ್ಕಾಗಿ ರಕ್ಷಣಾ ಇಲಾಖೆಯು ಗುರುವಾರ ₹ 802 ಕೋಟಿ ಮೊತ್ತದ ಎರಡು ಒಪ್ಪಂದಗಳಿಗೆ ಸಹಿ ಹಾಕಿದೆ.

ಸೇನೆಯ ತುಕಡಿಗಳು ಹಾಗೂ ಶಸ್ತ್ರಾಸ್ತ್ರಗಳ ಸಾಗಾಟಕ್ಕೆ 697 ಬೋಗಿಗಳನ್ನು ಒದಗಿಸುವುದಕ್ಕಾಗಿ ಜುಪಿಟರ್ ವ್ಯಾಗನ್ಸ್‌ ಲಿಮಿಟೆಡ್‌ ಜೊತೆ ₹ 473 ಕೋಟಿ ಮೊತ್ತದ ಒಪ್ಪಂದಕ್ಕೆ ಸಹಿ ಹಾಕಲಾಗಿದೆ.

56 ‘ಮೆಕಾನಿಕಲ್‌ ಮೈನ್‌ಫೀಲ್ಡ್‌ ಮಾರ್ಕಿಂಗ್‌ ಈಕ್ವಿಪ್‌ಮೆಂಟ್‌’ಗಳ (ಎಂಎಂಎಂಇ) ಪೂರೈಕೆಗಾಗಿ ಸಾರ್ವಜನಿಕ ವಲಯದ ಉದ್ದಿಮೆ ಬಿಇಎಂಎಲ್‌ ಜೊತೆ ₹ 329 ಕೋಟಿ ಮೊತ್ತದ ಒಪ್ಪಂದಕ್ಕೆ ಸಹಿ ಹಾಕಲಾಗಿದೆ ಎಂದು ರಕ್ಷಣಾ ಸಚಿವಾಲಯ ಪ್ರಕಟಣೆಯಲ್ಲಿ ತಿಳಿಸಿದೆ.