ಮಧ್ಯಪ್ರದೇಶ: ಸಚಿವರ ಆದಾಯ ತೆರಿಗೆ 52 ವರ್ಷಗಳ ಹಿಂದಿನ ನಿಯಮ ರದ್ದು

ಭೋಪಾಲ್‌: ಮಧ್ಯಪ್ರದೇಶದ ಸಚಿವರು ಇನ್ನು ಮುಂದೆ ತಾವು ಪಡೆಯುವ ವೇತನ ಮತ್ತು ಸವಲತ್ತುಗಳಿಗೆ ತಾವೇ ಆದಾಯ ತೆರಿಗೆ ಪಾವತಿಸಬೇಕು. ಇಲ್ಲಿಯವರೆಗೆ ಈ ಹೊರೆಯನ್ನು ರಾಜ್ಯ ಸರ್ಕಾರ ಭರಿಸುತ್ತಿತ್ತು.

‌ಈ ಸಂಬಂಧ ಮಧ್ಯಪ್ರದೇಶದ ಮುಖ್ಯಮಂತ್ರಿ ಮೋಹನ್‌ ಯಾದವ್‌ ಅವರ ನೇತೃತ್ವದ ಸಂಪುಟ ಸಭೆ ಮಂಗಳವಾರ ನಿರ್ಧಾರ ತೆಗೆದುಕೊಂಡಿದೆ. 

1972ರ ನಿಯಮದ ಪ್ರಕಾರ ಸಚಿವರ ವೇತನ ಮತ್ತು ಸವಲತ್ತುಗಳ ಮೇಲಿನ ಆದಾಯ ತೆರಿಗೆಯನ್ನು ರಾಜ್ಯ ಸರ್ಕಾರ ಭರಿಸುತ್ತಿತ್ತು. ಈ ನಿಯಮವನ್ನು ರದ್ದುಗೊಳಿಸಲು ಸಂಪುಟ ನಿರ್ಧರಿಸಿದೆ. ಅಲ್ಲದೆ, ಎಲ್ಲ ಸಚಿವರು ತಮ್ಮ ಆದಾಯ ತೆರಿಗೆಯನ್ನು ತಾವೇ ಪಾವತಿಸುವುದಕ್ಕೆ ಸಮ್ಮತಿ ಸೂಚಿಸಿದೆ ಎಂದು ಮುಖ್ಯಮಂತ್ರಿ ಯಾದವ್‌ ಅವರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.