ನೋಟು ರದ್ದತಿ: ಬಳ್ಳಾರಿಯ ಜೀನ್ಸ್‌ ಉದ್ದಿಮೆಯ 3.5 ಲಕ್ಷ ಉದ್ಯೋಗ ನಷ್ಟ- ರಾಹುಲ್

ಹೈದರಾಬಾದ್: 2016ರಲ್ಲಿ ನೋಟುಗಳ ಅಮಾನ್ಯೀಕರಣ ಹಾಗೂ ಜಿಎಸ್‌ಟಿಯ ಅಸಮರ್ಪಕ ಅನುಷ್ಠಾನದಿಂದಾಗಿ ಕರ್ನಾಟಕದ ಬಳ್ಳಾರಿಯಲ್ಲಿನ ಜೀನ್ಸ್‌ ಉಡುಪುಗಳ ಉದ್ಯಮದ ದುಡಿಯುತ್ತಿದ್ದ 3.5 ಲಕ್ಷಕ್ಕೂ ಹೆಚ್ಚು ಜನರು ತಮ್ಮ ಉದ್ಯೋಗ ಕಳೆದುಕೊಳ್ಳುವಂತಾಯಿತು ಎಂದು ಕಾಂಗ್ರೆಸ್‌ ಮುಖಂಡ ರಾಹುಲ್‌ ಗಾಂಧಿ ಬುಧವಾರ ಟೀಕಿಸಿದರು.

ಇಲ್ಲಿಗೆ ಸಮೀಪದ ಮುತ್ತಂಗಿಯಲ್ಲಿ ನಡೆದ ಸಭೆಯಲ್ಲಿ ಅವರು ಮಾತನಾಡಿದರು. ‘ಬಳ್ಳಾರಿಯಲ್ಲಿರುವ ಜೀನ್ಸ್‌ ಉಡುಪು ಉದ್ದಿಮೆಗಳಲ್ಲಿ ಸದ್ಯ 40 ಸಾವಿರ ಜನರು ಮಾತ್ರ ಕಾರ್ಯ ನಿರ್ವಹಿಸುತ್ತಿದ್ದಾರೆ’ ಎಂದರು.

‘ಸಾರ್ವಜನಿಕ ವಲಯದ ಹಲವು ಉದ್ದಿಮೆಗಳನ್ನು ಖಾಸಗೀಕರಣಗೊಳಿಸಲು ಕೇಂದ್ರ ಸರ್ಕಾರ ಚಿಂತನೆ ನಡೆಸಿದೆ. ಈ ಉದ್ದಿಮೆಗಳ ವ್ಯವಸ್ಥಾಪನಾ ಮಂಡಳಿ ಹಾಗೂ ನೌಕರರ ಪರವಾಗಿ ಕಾಂಗ್ರೆಸ್‌ ನಿಲ್ಲಲಿದೆ’ ಎಂದೂ ಅವರು ಹೇಳಿದರು.