ಸೈಬರ್‌ ವಂಚನೆ | ₹2,400 ಕೋಟಿ ಉಳಿಕೆ: ಗೃಹ ಸಚಿವಾಲಯ
ನವದೆಹಲಿ: ‘ನಾಗರಿಕ ಹಣಕಾಸು ಸೈಬರ್‌ ವಂಚನೆ ವರದಿ ಮತ್ತು ನಿರ್ವಹಣಾ ವ್ಯವಸ್ಥೆ’ ಮೂಲಕ 7.6 ಲಕ್ಷಕ್ಕೂ ಹೆಚ್ಚು ಸೈಬರ್‌ ಪ್ರಕರಣಗಳಲ್ಲಿ ₹ 2,400 ಕೋಟಿ ವಂಚನೆಯಾಗುವುದನ್ನು ತಡೆಯಲಾಗಿದೆ ಎಂದು ಗೃಹ ಸಚಿವಾಲಯ ರಾಜ್ಯಸಭೆಗೆ ತಿಳಿಸಿದೆ.
ಹಣಕಾಸು ವಂಚನೆಗಳ ಕುರಿತು ತಕ್ಷಣದ ವರದಿ ಮತ್ತು ವಂಚಕರು ಹಣವನ್ನು ಪೋಲು ಮಾಡುವುದನ್ನು ತಡೆಯುವ ಉದ್ದೇಶದಿಂದ, ಭಾರತೀಯ ಸೈಬರ್‌ ಅಪರಾಧ ಸಮನ್ವಯ ಕೇಂದ್ರದ 14ಸಿ ಅಡಿಯಲ್ಲಿ ಈ ವ್ಯವಸ್ಥೆಯನ್ನು 2021ರಲ್ಲಿ ಸ್ಥಾಪಿಸಲಾಗಿತ್ತು ಎಂದು ಕೇಂದ್ರ ಗೃಹ ಖಾತೆಯ ರಾಜ್ಯ ಸಚಿವ ಬಂಡಿ ಸಂಜಯ್‌ ಕುಮಾರ್‌ ಲಿಖಿತ ಉತ್ತರ ನೀಡಿದ್ದಾರೆ.
ಆನ್‌ಲೈನ್‌ ಸೈಬರ್‌ ದೂರುಗಳನ್ನು ಸಲ್ಲಿಸಲು ನೆರವಾಗುವುದಕ್ಕೆ ಟೋಲ್‌ ಫ್ರಿ ಸಹಾಯವಾಣಿ ಸಂಖ್ಯೆ 1930 ಕಾರ್ಯ ನಿರ್ವಹಿಸುತ್ತಿದೆ ಎಂದು ತಿಳಿಸಿರುವ ಅವರು, ಇಲ್ಲಿಯವರೆಗೆ ಪೊಲೀಸ್‌ ಅಧಿಕಾರಿಗಳು ವರದಿ ಮಾಡಿರುವ 5.8 ಲಕ್ಷಕ್ಕೂ ಹೆಚ್ಚು ಸಿಮ್‌ ಕಾರ್ಡ್‌ಗಳು ಮತ್ತು 1.08 ಲಕ್ಷ ಇಎಂಇಐಗಳನ್ನು ನಿರ್ಬಂಧಿಸಲಾಗಿದೆ ಎಂದು ಸಚಿವರು ಹೇಳಿದ್ದಾರೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.