ಜಮ್ಮು | ಗಡಿಯಲ್ಲಿ ಪಾಕ್ ನುಸುಳುಕೋರನ ಬಂಧನ

ಶ್ರೀನಗರ: ಇಲ್ಲಿನ ಅಂತರರಾಷ್ಟ್ರೀಯ ಗಡಿಯಲ್ಲಿ ಪಾಕಿಸ್ತಾನದ ನುಸುಳುಕೋರನನ್ನು ಗಡಿ ಭದ್ರತಾ ಪಡೆ (ಬಿಎಸ್‌ಎಫ್‌) ಬಂಧಿಸಿದೆ ಎಂದು ಅಧಿಕಾರಿಗಳು ಬುಧವಾರ ತಿಳಿಸಿದ್ದಾರೆ.

ಗಡಿಯಲ್ಲಿ ನುಸುಳಲು ಯತ್ನಿಸಿದ ಪಾಕಿಸ್ತಾನ ಪಂಜಾಬ್‌ನ ಸರ್ಗೋಧಾ ನಿವಾಸಿ ಶಾಹಿದ್ ಇಮ್ರಾನ್ ಎಂಬಾತನನ್ನು ಮಂಗಳವಾರ ಸಂಜೆ ವಶಕ್ಕೆ ಪಡೆಯಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಬಂಧಿತನಿಂದ ಎರಡು ಚಾಕು, ಒಂದು ಸ್ಮಾರ್ಟ್ ವಾಚ್, ಸಿಗರೇಟ್ ಪ್ಯಾಕೆಟ್, ಖಾಲಿ ಸಿಮ್ ಕಾರ್ಡ್ ಮತ್ತು 5 ರೂಪಾಯಿ ಪಾಕಿಸ್ತಾನ ಕರೆನ್ಸಿಯ ನಾಣ್ಯವನ್ನು ವಶಪಡಿಸಿಕೊಳ್ಳಲಾಗಿದೆ.

ವಿಚಾರಣೆಯ ವೇಳೆ ಪ್ರಮಾದದಿಂದಾಗಿ ಗಡಿ ದಾಟಿ ಬಂದಿರುವುದಾಗಿ ಹೇಳಿಕೊಂಡಿದ್ದಾನೆ. ಹೆಚ್ಚಿನ ತನಿಖೆಗಾಗಿ ಆತನನ್ನು ಪೊಲೀಸರಿಗೆ ಒಪ್ಪಿಸಲಾಗಿದೆ.