Telangana Election | ಕುಟುಂಬ ರಾಜಕಾರಣ: ಪ್ರಿಯಾಂಕಾಗೆ ತಿರುಗೇಟು ನೀಡಿದ ಕವಿತಾ

ಹೈದರಾಬಾದ್‌: ಎಐಸಿಸಿ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ವಾದ್ರಾ ಅವರ ಹೇಳಿಕೆಗೆ ತಿರುಗೇಟು ನೀಡಿರುವ ಬಿಆರ್‌ಎಸ್‌ನ ಎಂಎಲ್‌ಸಿ ಕೆ. ಕವಿತಾ, ಕಾಂಗ್ರೆಸ್ ಪಕ್ಷದ ನಾಯಕರು ಕುಟುಂಬ ರಾಜಕಾರಣದ ಬಗ್ಗೆ ಮಾತನಾಡುತ್ತಿರುವುದೇ ಹಾಸ್ಯಾಸ್ಪದ ಎಂದು ಲೇವಡಿ ಮಾಡಿದ್ದಾರೆ.

ಬುಧವಾರ ನಡೆದ ಸಾರ್ವಜನಿಕ ರ‍್ಯಾಲಿಯಲ್ಲಿ ಕೆಸಿಆರ್ ಸರ್ಕಾರದ ಕುಟುಂಬ ರಾಜಕಾರಣದ ಕುರಿತು ಪ್ರಿಯಾಂಕಾ ವಾಗ್ದಾಳಿ ನಡೆಸಿದ್ದರು. ತೆಲಂಗಾಣದ ಜನರು ಸಾಮಾಜಿಕ ನ್ಯಾಯ ಸಿಗುತ್ತದೆ ಎಂದು ಕನಸು ಕಂಡಿದ್ದರು, ಆದರೆ ತೆಲಂಗಾಣದ ಮೂವರು ಸಚಿವರು ಮುಖ್ಯಮಂತ್ರಿ ಕುಟುಂಬದವರೇ ಆಗಿದ್ದರಿಂದ ಜನರಿಗೆ ನ್ಯಾಯ ದೊರೆತ್ತಿಲ್ಲ ಎಂದು ಟೀಕಿಸಿದ್ದರು.

ಈ ಟೀಕೆಗೆ ಪ್ರತಿಕ್ರಿಯಿಸಿರುವ ಕವಿತಾ, ಜವಾಹರ್‌ ಲಾಲ್‌ ನೆಹರೂ ಅವರ ಮರಿ ಮೊಮ್ಮಗಳು, ಇಂದಿರಾ ಗಾಂಧಿ ಅವರ ಮೊಮ್ಮಗಳು ಹಾಗೂ ರಾಜೀವ್‌ ಗಾಂಧಿ ಅವರ ಪುತ್ರಿ ಪ್ರಿಯಾಂಕಾ ಗಾಂಧಿ ಅವರು ಕುಟುಂಬ ರಾಜಕಾರಣದ ಬಗ್ಗೆ ಮಾತನಾಡುತ್ತಿದ್ದಾರೆ. ಇಡೀ ಚುನಾವಣಾ ಪ್ರಚಾರದಲ್ಲಿ ನಾನು ಕೇಳಿದ ತಮಾಷೆಯ ವಿಷಯ ಇದು’ ಎಂದು ಹೇಳಿದ್ದಾರೆ.