ಗಿಗ್ ಕಾರ್ಮಿಕರ ಪರ ಕಾನೂನು: ಕರ್ನಾಟಕ, ರಾಜಸ್ಥಾನದ ಕ್ರಮಕ್ಕೆ ರಾಹುಲ್ ಮೆಚ್ಚುಗೆ

ನವದೆಹಲಿ: ‘ಗಿಗ್‌ ಕಾರ್ಮಿಕರ ಹಿತ ಕಾಯುವ ದೃಷ್ಟಿಯಿಂದ ರಾಜಸ್ಥಾನ ಕಾಂಗ್ರೆಸ್ ಸರ್ಕಾರ ಹೊಸ ಕಾನೂನು ಜಾರಿಗೆ ತಂದಿದ್ದು, ಇದರಿಂದ 3 ಲಕ್ಷ ಗಿಗ್ ಕೆಲಸಗಾರರು ತಮ್ಮ ಹಕ್ಕುಗಳೊಂದಿಗೆ ಸ್ವಾಭಿಮಾನದಿಂದ ಬದುಕಲು ಸಾಧ್ಯವಾಗಲಿದೆ’ ಎಂದು ಕಾಂಗ್ರೆಸ್ ಮುಖಂಡ ರಾಹುಲ್ ಗಾಂಧಿ ಹೇಳಿದ್ದಾರೆ.

ಈ ಕುರಿತು ಟ್ವೀಟ್ ಮಾಡಿರುವ ಅವರು, ‘ಇಡೀ ದೇಶದಲ್ಲೇ ಇಂಥ ಕಾನೂನು ಜಾರಿಗೆ ಬಂದಿದ್ದು ಇದೇ ಮೊದಲು. ಗಿಗ್ ಆರ್ಥಿಕತೆಯಲ್ಲಿ ಕಾರ್ಮಿಕರಿಗೆ ಆರ್ಥಿಕ ಭದ್ರತೆಯನ್ನು ಈ ನೂತನ ಕಾನೂನು ನೀಡಲಿದೆ. ಇದರಿಂದ ಬಹಳಷ್ಟು ಯುವಸಮುದಾಯಕ್ಕೆ ಖಾತ್ರಿ ನೀಡಬಲ್ಲ ಉದ್ಯೋಗಕ್ಕೆ ಆಧಾರವಾಗಲಿದೆ’ ಎಂದಿದ್ದಾರೆ.

‘ಕರ್ನಾಟಕದಲ್ಲೂ ಈ ಕುರಿತು ಚರ್ಚಿಸಲಾಗಿತ್ತು. ಇತ್ತೀಚಿನ ಬಜೆಟ್‌ನಲ್ಲಿ ಗಿಗ್ ಕಾರ್ಮಿಕರಿಗಾಗಿ ₹4 ಲಕ್ಷವರೆಗೆ ಅಪಘಾತ ವಿಮೆಯನ್ನು ಬಜೆಟ್‌ನಲ್ಲಿ ಘೋಷಿಸಲಾಗಿದೆ. ನಮ್ಮ ಪಕ್ಷವಿರುವ ಸರ್ಕಾರಗಳು ಜಾರಿಗೆ ತರುತ್ತಿರುವ ಇಂಥ ಕಾನೂನುಗಳ ಮೂಲಕ ಕಾರ್ಮಿಕರು ಹಾಗೂ ಮಾಲೀಕರು ಇಬ್ಬರಿಗೂ ಪ್ರಯೋಜನವಾಗಲಿದೆ’ ಎಂದಿದ್ದಾರೆ.

‘ಬಡವರ ಪರವಾಗಿ ನಾವು ಸದಾ ನಿಲ್ಲುತ್ತೇವೆ ಹಾಗೂ ಭಾರತದ ಜನರಿಗಾಗಿ ಸದಾ ಶ್ರಮಿಸುತ್ತೇವೆ. ಆ ಮೂಲಕ ತಮ್ಮ ಪಾಲಿನದನ್ನು ಅವರು ಪಡೆಯುವಂತಾಗಲಿದೆ. ನಾವು ನೀಡಿದ ಭರವಸೆಯಂತೆಯೇ ಅದನ್ನು ಸಾಕಾರಗೊಳಿಸಲು ನಿರಂತರವಾಗಿ ಶ್ರಮಿಸುತ್ತಿದ್ದೇವೆ’ ಎಂದಿದ್ದಾರೆ.

‘ಭಾರತದ ಪ್ರತಿಯೊಬ್ಬ ಶ್ರಮಿಕ ಆರ್ಥಿಕವಾಗಿ ಸದೃಢನಾದರೆ ಹಾಗೂ ಸಂಪೂರ್ಣ ಹಕ್ಕನ್ನು ಪಡೆಯುವವನಾದರೆ ಮಾತ್ರ ಭಾರತ ಒಂದಾಗಲಿದೆ’ ಎಂದು ರಾಹುಲ್ ಗಾಂಧಿ ಟ್ವೀಟ್‌ನಲ್ಲಿ ಹೇಳಿದ್ದಾರೆ.