ತಮಿಳುನಾಡು: ಉದಯನಿಧಿಗೆ ಡಿಸಿಎಂ ಪಟ್ಟ?

ಚೆನ್ನೈ: ತಮಿಳುನಾಡಿನ ಮುಖ್ಯಮಂತ್ರಿ ಎಂ.ಕೆ.ಸ್ಟಾಲಿನ್‌ ಅವರು ತಮ್ಮ ಪುತ್ರ, ಕ್ರೀಡಾ ಸಚಿವ ಉದಯನಿಧಿ ಅವರನ್ನು ಉಪಮುಖ್ಯಮಂತ್ರಿಯಾಗಿ ಮಾಡುವ ಸಾಧ್ಯತೆಯಿದೆ.

ಉದಯನಿಧಿ ಅವರು ಉಪ ಮುಖ್ಯಮಂತ್ರಿಯಾಗುವುದು ಬಹುತೇಕ ಖಚಿತ ಎಂದು ಡಿಎಂಕೆ ಮುಖಂಡರು ಹೇಳಿದ್ದಾರೆ. ಆದರೆ ‘ಬಡ್ತಿ’ ಯಾವಾಗ ಸಿಗಲಿದೆ ಎಂಬುದು ಖಚಿತವಾಗಿಲ್ಲ. ಸ್ಟಾಲಿನ್‌ ಅವರು ಆ.22 ರಂದು ಅಮೆರಿಕ ಪ್ರವಾಸಕ್ಕೆ ತೆರಳಲಿದ್ದಾರೆ ಎಂದು ಸರ್ಕಾರದ ಮೂಲಗಳು ತಿಳಿಸಿವೆ.

‘ಉದಯನಿಧಿ ಅವರನ್ನು ಅವರ ತಂದೆಗೆ ಡೆಪ್ಯುಟಿಯನ್ನಾಗಿ (ಡಿಸಿಎಂ) ಮಾಡುವುದರಲ್ಲಿ ಯಾವುದೇ ಅನುಮಾನವಿಲ್ಲ. ಆದರೆ ಅದು ಯಾವಾಗ ನಡೆಯುತ್ತದೆ ಎಂಬುದು ಮಾತ್ರ ನಮ್ಮ ಮುಂದಿರುವ ಪ್ರಶ್ನೆ. ಸ್ಟಾಲಿನ್‌ ಅವರ ಅಮೆರಿಕ ಭೇಟಿಗೆ ಮುನ್ನವೇ ನಡೆಯಲಿದೆಯೇ ಅಥವಾ ಅಮೆರಿಕದಿಂದ ಮರಳಿದ ಬಳಿಕ ನಡೆಯಲಿದೆಯೇ ಎಂಬುದು ಖಚಿತವಾಗಿಲ್ಲ’ ಎಂದು ಡಿಎಂಕೆ ಮುಖಂಡರೊಬ್ಬರು ‘ಪ್ರಜಾವಾಣಿ’ಗೆ ತಿಳಿಸಿದರು.

ಉದಯನಿಧಿ ಅವರು ಉಪ ಮುಖ್ಯಮಂತ್ರಿಯಾದರೂ, ಈಗ ಇರುವ ಖಾತೆಯನ್ನು (ಯುವ ಸಬಲೀಕರಣ ಮತ್ತು ಕ್ರೀಡೆ) ತಮ್ಮಲ್ಲೇ ಉಳಿಸಿಕೊಳ್ಳಲಿದ್ದಾರೆ ಎಂದು ಮೂಲಗಳು ಹೇಳಿವೆ.