ಜಮ್ಮು-ಕಾಶ್ಮೀರ: ಸದನದಲ್ಲಿ ಗದ್ದಲ; ಬಿಜೆಪಿ ಸದಸ್ಯರನ್ನು ಹೊರಹಾಕಿದ ಮಾರ್ಷಲ್‌ಗಳು

ಶ್ರೀನಗರ: ಜಮ್ಮು ಮತ್ತು ಕಾಶ್ಮೀರ ವಿಧಾನಸಭೆಯಲ್ಲಿ ಗುರುವಾರ ನಡೆದ ಕಲಾಪದಲ್ಲೂ ಗದ್ದಲ, ಪ್ರತಿಭಟನೆಗಳು ಮುಂದುವರಿದವು. ‌ಜಮ್ಮು ಮತ್ತು ಕಾಶ್ಮೀರಕ್ಕೆ ವಿಶೇಷ ಸ್ಥಾನಮಾನವನ್ನು ಮತ್ತೆ ಸ್ಥಾಪಿಸಲು ಒತ್ತಾಯಿಸಿ ಅಂಗೀಕರಿಸಿದ ನಿರ್ಣಯವನ್ನು ವಿರೋಧಿಸಿ ಸ್ಪೀಕರ್‌ ಪೀಠದ ಮುಂದೆ ನುಗ್ಗಿದ ಮೂವರು ಬಿಜೆಪಿ ಸದಸ್ಯರನ್ನು ಸದನದಿಂದ ಹೊರ ಹಾಕಲಾಯಿತು. ಈ ವೇಳೆ ಬಿಜೆಪಿ ಸದಸ್ಯರು ಮತ್ತು ಮಾರ್ಷಲ್‌ಗಳ ನಡುವೆ ತಳ್ಳಾಟ, ನೂಕಾಟ ನಡೆಯಿತು.

ತೀವ್ರ ಗದ್ದಲ, ವಾಕ್ಸಮರದ ನಡುವೆ ಸ್ಪೀಕರ್‌ ಪೀಠದತ್ತ ನುಗ್ಗಿದ ಮೂವರು ಬಿಜೆಪಿ ಸದಸ್ಯರನ್ನು ಸದನದಿಂದ ಹೊರಕ್ಕೆ ಕಳುಹಿಸುವಂತೆ ಸ್ಪೀಕರ್‌ ಅಬ್ದುಲ್‌ ರಹಿಂ ರಾಥರ್‌ ಅವರು ನಿರ್ದೇಶನ ನೀಡಿದರು. ಅದರಂತೆ ಮಾರ್ಷಲ್‌ಗಳು ಸದಸ್ಯರನ್ನು ಹೊರ ಹಾಕಿದರು. ಆ ಬಳಿಕವೂ ಗದ್ದಲ, ಪ್ರತಿಭಟನೆ ಮುಂದುವರಿದಿದ್ದರಿಂದ ಕೆಲ ಬಾರಿ ಕಲಾಪ ಮುಂದೂಡಿದ ಸ್ಪೀಕರ್‌, ಅಂತಿಮವಾಗಿ ದಿನದಮಟ್ಟಿಗೆ ಕಲಾಪವನ್ನು ಮುಂದೂಡಿದರು.

ನಡೆದಿದ್ದೇನು:

ಬೆಳಿಗ್ಗೆ ಕಲಾಪ ಆರಂಭವಾಗುತ್ತಿದ್ದಂತೆ ಬಿಜೆಪಿ ಸದಸ್ಯರು ಬುಧವಾರದ ನಿರ್ಣಯ ವಿರೋಧಿಸಿ ಪ್ರತಿಭಟನೆ ಮುಂದುವರಿಸಿದರು. ‘ಆಡಳಿತಾರೂಢ ನ್ಯಾಷನಲ್‌ ಕಾನ್ಫರೆನ್ಸ್‌ ಶಾಸಕಾಂಗದ ಕಾರ್ಯವಿಧಾನಗಳನ್ನು ಮೀರಿ ನಡೆದುಕೊಂಡಿದೆ. ಹೀಗೆ ನೀರ್ಣಯ ಅಂಗೀಕರಿಸಿರುವುದು ಸಂವಿಧಾನಬಾಹಿರ. ನೀವು ಸದನದ ನಿಯಮಗಳನ್ನು ಉಲ್ಲಂಘಿಸಿದ್ದೀರಿ’ ಎಂದು ಬಿಜೆಪಿ ಶಾಸಕರೂ ಆಗಿರುವ ವಿರೋಧ ಪಕ್ಷದ ನಾಯಕ ಸುನೀಲ್‌ ಶರ್ಮಾ ಆರೋಪಿಸಿದರು.

ಈ ವೇಳೆ ಅವಾಮಿ ಇತೆಹಾದ್‌ ಪಕ್ಷದ ಶಾಸಕ  ಶೇಖ್‌ ಖುರ್ಷಿದ್‌ ಅವರು ವಿಧಿ 370ರ ಅಡಿ ವಿಶೇಷ ಸ್ಥಾನಮಾನ ಮತ್ತು ವಿಧಿ 35ಎ ಅನ್ನು ಮತ್ತೆ ಸ್ಥಾಪಿಸುವಂತೆ ಬ್ಯಾನರ್‌ ಹಿಡಿದು ಸ್ಪೀಕರ್‌ ಪೀಠದ ಮುಂದೆ ಬಂದು ಘೋಷಣೆಗಳನ್ನು ಕೂಗಿದರು. ಇದರಿಂದ ಕೆರಳಿದ ಬಿಜೆಪಿ ಸದಸ್ಯರು ಸ್ಪೀಕರ್‌ ಪೀಠದ ಮುಂದೆ ನುಗ್ಗಿ ಬ್ಯಾನರ್‌ ಕಸಿದುಕೊಂಡು, ಕಿತ್ತು ಹಾಕಿದರು. ‌ಈ ವೇಳೆ ತೀವ್ರ ಗದ್ದಲ ಉಂಟಾಗಿದ್ದರಿಂದ ಸ್ಪೀಕರ್‌ ಕಲಾಪವನ್ನು 15 ನಿಮಿಷ ಮುಂದೂಡಿದರು. ಕಲಾಪ ಮತ್ತೆ ಆರಂಭವಾದಾಗಲೂ ಬಿಜೆಪಿ ಸದಸ್ಯರು ಪ್ರತಿಭಟನೆ ಮುಂದುವರಿಸಿದರು.

ಸ್ಪೀಕರ್‌ ನಿರ್ದೇಶನದ ಮೇರೆಗೆ ಮೂವರು ಶಾಸಕರನ್ನು ಕಲಾಪದಿಂದ ಹೊರ ಹಾಕಲು ಬಂದ ಮಾರ್ಷಲ್‌ಗಳ ಜತೆಗೂ ಬಿಜೆಪಿ ಶಾಸಕರು ವಾಗ್ವಾದ ನಡೆಸಿದರು. ಸ್ಪೀಕರ್‌ ಪೀಠದ ಮುಂದಿನ ಮೇಜಿನ ಮೇಲೆ ನಿಂತಿದ್ದ ಮಹಿಳಾ ಶಾಸಕಿ ಶಗುನ್‌ ಪರಿಹಾರ್‌ ಅವರನ್ನು ಹೊರ ಹಾಕಲು ಮಹಿಳಾ ಮಾರ್ಷಲ್‌ಗಳನ್ನು ಕರೆಸಲಾಯಿತು. ಶಾಸಕರನ್ನು ಸದನದಿಂದ ಹೊರಗೆ ಕರೆದುಕೊಂಡು ಹೋಗಲು ಮಾರ್ಷಲ್‌ಗಳು ಹರಸಾಹಸಪಟ್ಟರು.

ಸ್ಪೀಕರ್‌ ಹಲವು ಬಾರಿ ಮಾಡಿದ ಮನವಿಯ ಬಳಿಕವೂ ವಿರೋಧ ಮತ್ತು ಆಡಳಿತ ಪಕ್ಷದ ಸದಸ್ಯರ ನಡುವೆ ವಾಕ್ಸಮರ ಮುಂದುವರಿಯಿತು. ಆಗ ಸ್ಪೀಕರ್‌ ಯಾವುದನ್ನೂ ಕಡತಕ್ಕೆ ಸೇರಿಸಬಾರದು ಎಂದೂ ನಿರ್ದೇಶನ ನೀಡಿದರು.

‌‘ಭಾರತ್‌ ಮಾತಾ ಕಿ ಜೈ’ ಘೋಷಣೆಗಳನ್ನು ಬಿಜೆಪಿ ಶಾಸಕರು ಕೂಗಿದರು. ಆಗ ಮಾತನಾಡಿದ ಸಚಿವ ಸತೀಶ್‌ ಶರ್ಮಾ ಅವರು ‘ಬಿಜೆಪಿ ಒಡೆದು ಆಳುವ ನಾಟಕ ಆಡುತ್ತಿದೆ. ಬುಧವಾರ ಅವರು (ಬಿಜೆಪಿ ಸದಸ್ಯರು) ನಿಂತಿದ್ದ ಮೇಜಿನ ಮೇಲೆ ಭಾರತದ ಸಂವಿಧಾನವಿತ್ತು. ಅವರು ಅದರ ಮೇಲೆ ತಮ್ಮ ಬೂಟುಗಳೊಂದಿಗೆ ನಿಂತಿದ್ದರು. ಅದಕ್ಕಾಗಿ ಅವರಿಗೆ ಶಿಕ್ಷೆಯಾಗಬೇಕು’ಎಂದು ಆಗ್ರಹಿಸಿದರು.

ಸದನ ಅಂಗೀಕರಿಸಿದ ವಿಶೇಷ ಸ್ಥಾನಮಾನದ ನಿರ್ಣಯವನ್ನು ಹಿಂದಕ್ಕೆ ಪಡೆಯಬೇಕು ಅಥವಾ ರಾಜೀನಾಮೆ ನೀಡಬೇಕು ಎಂದು ಬಿಜೆಪಿ ಸದಸ್ಯರು ಸ್ಪೀಕರ್‌ ಅನ್ನು ಒತ್ತಾಯಿಸಿದರು.

‘ಅವಿಶ್ವಾಸ ನಿರ್ಣಯ ಮಂಡಿಸಲಿ’:

ಬಿಜೆಪಿ ಬೇಡಿಕೆಯನ್ನು ತಿರಸ್ಕರಿಸಿದ ಸ್ಪೀಕರ್‌ ಅಬ್ದುಲ್‌ ರಹೀಂ ರಾಥರ್‌ ಅವರು ‘ಬಿಜೆಪಿಗೆ ನನ್ನ ಮೇಲೆ ನಂಬಿಕೆ ಇಲ್ಲದಿದ್ದರೆ ಅವಿಶ್ವಾಸ ನಿರ್ಣಯ ಮಂಡಿಸಲಿ’ ಎಂದರು. ‘ಸದಸ್ಯರು ಸ್ಪೀಕರ್‌ ಪೀಠದ ಮುಂದೆ ನುಗ್ಗುವುದು ಮತ್ತು ಕಾರ್ಯದರ್ಶಿ ಕುರ್ಚಿಯ ಮೇಲಿನ ರಾಷ್ಟ್ರೀಯ ಲಾಂಛನವನ್ನು ತುಳಿಯುವುದನ್ನು ಸಹಿಸಲು ಆಗದು‘ ಎಂದು ಅವರು ಹೇಳಿದರು. ‘ಸದನ ಅಂಗೀಕರಿಸಿದ ನಿರ್ಣಯವನ್ನು ಹಿಂದಕ್ಕೆ ಪಡೆಯಲು ನನಗೆ ಅಧಿಕಾರವಿಲ್ಲ. ಆ ಅಧಿಕಾರ ಇರುವುದು ಸದನಕ್ಕೆ ಮಾತ್ರ. ಆ ವಿಷಯದಲ್ಲಿ ಸ್ಪೀಕರ್‌ ಅಧಿಕಾರ ಸೀಮಿತ’ ಎಂದು ಅವರು ಪಿಟಿಐಗೆ ತಿಳಿಸಿದರು.