ಅಲ್‌ ಜಜೀರಾ ವಾಹಿನಿ ಭದ್ರತಾ ಅನುಮೋದನೆ ರದ್ದು

ನವದೆಹಲಿ : ಕತಾರ್‌ನ ಇಂಗ್ಲಿಷ್‌ ಸುದ್ದಿ ವಾಹಿನಿ ಅಲ್‌ ಜಜೀರಾಕ್ಕೆ ನೀಡಲಾಗಿದ್ದ ಭದ್ರತಾ ಅನುಮೋದನೆಯನ್ನು ಕೇಂದ್ರ ಗೃಹ ಸಚಿವಾಲಯವು ರದ್ದುಪಡಿಸಿದೆ. ಹಾಗಾಗಿ ಈ ಸುದ್ದಿವಾಹಿನಿಯು ಪ್ರಸಾರ ಸ್ಥಗಿತಗೊಳಿಸಬೇಕಾಗಿದೆ.

ಭದ್ರತಾ ಅನುಮೋದನೆ ರದ್ದತಿಯನ್ನು ಕೈಬಿಡಬೇಕು ಎಂದು ವಾಹಿನಿಯು ಕೇಂದ್ರ ಸರ್ಕಾರಕ್ಕೆ ಮನವಿ ಮಾಡಿದೆ. ಈ ಮನವಿಗೆ ಸಂಬಂಧಿಸಿ ಸರ್ಕಾರದ ಆದೇಶ ಇನ್ನಷ್ಟೇ ಪ್ರಕಟವಾಗಬೇಕಿದೆ.

ಅಲ್‌ ಜಜೀರಾ ವಿರುದ್ಧ ಕ್ರಮ ಕೈಗೊಳ್ಳಲು ಕಾರಣ ಏನು ಎಂಬುದನ್ನು ತಿಳಿಸಲಾಗಿಲ್ಲ. ಆದರೆ, ಜಮ್ಮು ಮತ್ತು ಕಾಶ್ಮೀರದ ಸ್ಥಿತಿಯ ಬಗ್ಗೆ ವಾಹಿನಿಯಲ್ಲಿ ಪ್ರಸಾರವಾದ ಸಾಕ್ಷ್ಯಚಿತ್ರವೊಂದು ಕೇಂದ್ರ ಸರ್ಕಾರದ ಅಸಮಾಧಾನಕ್ಕೆ ಕಾರಣ ಎನ್ನಲಾಗಿದೆ.