ಯೋಧನ ಅಂತ್ಯ ಸಂಸ್ಕಾರಕ್ಕೆ ಕೆಲವೇ ಗಂಟೆಗಳಿರುವಾಗ ಮಗುವಿಗೆ ಜನ್ಮ ನೀಡಿದ ಪತ್ನಿ

ಜಮ್ಮು:ಮಗುವಿಗಾಗಿ ಆ ದಂಪತಿ 10 ವರ್ಷ ಕಾದಿದ್ದರು.ಆದರೆ ವಿಧಿಯ ಲೀಲೆ ಬೇರೆಯೇ ಆಗಿತ್ತು.ಲಾನ್ಸ್ ನಾಯಕ್ ರಂಜೀತ್ ಸಿಂಗ್‍ ಎಂಬ ಯೋಧ ಭಾನುವಾರ ಹುತಾತ್ಮರಾಗಿದ್ದು ಇವರ ಅಂತ್ಯ ಸಂಸ್ಕಾರಕ್ಕೆ ಕೆಲವೇ ಗಂಟೆಗಳಿರುವಾಗ ಆತನ ಪತ್ನಿ ಮಗುವಿಗೆ ಜನ್ಮ ನೀಡಿದ್ದಾರೆ.

ಜಮ್ಮ ಕಾಶ್ಮೀರದ ರಜೌರಿ ಜಿಲ್ಲೆಯ ಗಡಿ ನಿಯಂತ್ರಣಾ ರೇಖೆಯಲ್ಲಿ ಭಾನುವಾರ ಪಾಕಿಸ್ತಾನದ ನುಸುಳುಕೋರರ ಜತೆ ಕಾದಾಡುತ್ತಿರುವಾಗ ಸಿಂಗ್ ದೇಹಕ್ಕೆ ಗುಂಡು ತಾಗಿತ್ತು.ಮಂಗಳವಾರ ರಾಂಬಾನ್ ಜಿಲ್ಲೆಯಲ್ಲಿ ಸಿಂಗ್ ಅಂತ್ಯಕ್ರಿಯೆ ನಡೆದಿದ್ದು. ಅಂತ್ಯ ಸಂಸ್ಕಾರಕ್ಕೆ ಕೆಲವೇ ಗಂಟೆಗಳಿರುವಾಗ ಸಿಂಗ್ ಪತ್ನಿ ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದಾರೆ ಎಂದು ಪಿಟಿಐ ಸುದ್ದಿಸಂಸ್ಥೆ ವರದಿ ಮಾಡಿದೆ.

36ರ ಹರೆಯದ ಸಿಂಗ್ ಅವರ ಮೃತದೇಹ ಸೋಮವಾರ ಸುಲಿಗಂ ಗ್ರಾಮಕ್ಕೆ ತಲುಪಿತ್ತು. ಆದರೆ ಅಂತ್ಯ ಸಂಸ್ಕಾರವನ್ನು ಮಂಗಳವಾರ ಬೆಳಗ್ಗೆಯೇ ಮಾಡುವುದಾಗಿ ಕುಟುಂಬ ತೀರ್ಮಾನಿಸಿತ್ತು.ಸೋಮವಾರ ರಾತ್ರಿ ಯೋಧನಪತ್ನಿ ಶಿಮು ದೇವಿಗೆ ಹೆರಿಗೆ ನೋವು ಕಾಣಿಸಿಕೊಂಡಿತ್ತು.ಅಲ್ಲಿನ ಜಿಲ್ಲಾಸ್ಪತ್ರೆಯಲ್ಲಿ ದಾಖಲಾಗಿದ್ದ ಶಿಮು ದೇವಿ ಬೆಳಗ್ಗೆ 5 ಗಂಟೆಗೆ ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದಾರೆ.

2003ರಲ್ಲಿ ಸೇನೆ ಸೇರಿದ್ದ ಸಿಂಗ್, ಪತ್ನಿಯ ಹೆರಿಗೆಗಾಗಿ ರಜೆ ತೆಗೆದುಕೊಳ್ಳಲು ತೀರ್ಮಾನಿಸಿದ್ದರು ಎಂದು ಸಿಂಗ್ ಅವರ ನೆರೆಮನೆಯ ವ್ಯಕ್ತಿ ವಿಜಯ್ ಕುಮಾರ್ ಹೇಳಿದ್ದಾರೆ.