ತ.ನಾಡು | 3 ವರ್ಷದಲ್ಲಿ ₹9.74ಲಕ್ಷ ಕೋಟಿ ಹೂಡಿಕೆ; 31 ಲಕ್ಷ ಉದ್ಯೋಗ ಸೃಷ್ಟಿ; CM

ಚೆನೈ: ಕಳೆದ ಮೂರು ವರ್ಷದಲ್ಲಿ ರಾಜ್ಯದಲ್ಲಿ ₹9.74 ಲಕ್ಷ ಕೋಟಿ ಹೂಡಿಕೆಯಾಗಿದ್ದು, 31 ಲಕ್ಷ ಹೊಸ ಉದ್ಯೋಗಗಳು ಸೃಷ್ಟಿಯಾಗಿವೆ ಎಂದು ತಮಿಳುನಾಡು ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ ಹೇಳಿದರು. 

ಬುಧವಾರ ₹68,773 ಕೋಟಿಯ ಹೊಸ ಯೋಜನೆಗಳನ್ನು ಜಾರಿಗೊಳಿಸಿದರು. ಇದರಿಂದ ರಾಜ್ಯದಲ್ಲಿ ಒಂದು ಲಕ್ಷ ಉದ್ಯೋಗ ಸೃಷ್ಟಿಯಾಗಲಿದೆ ಎಂದರು. 

ತಮಿಳುನಾಡಿನ ಅಭಿವೃದ್ಧಿ ಹಾಗೂ ಉದ್ಯಮದ ಇತಿಹಾಸದಲ್ಲೇ ಈ ದಿನ ಮಹತ್ವದ್ದಾಗಿದೆ. ಇಂದು ನಮ್ಮ ಆರ್ಥಿಕ ಶಕ್ತಿಯನ್ನು ಜಗ್ತತಿಗೆ ತೋರಿಸಿದ್ದೇವೆ ಎಂದು ಎಂ.ಕೆ. ಸ್ಟಾಲಿನ್ ಅವರು ತಮಿಳುನಾಡು ಹೂಡಿಕೆದಾರರ ಸಮ್ಮೇಳನದಲ್ಲಿ ಮಾತನಾಡಿದರು. 

ಕಾರ್ಯಕ್ರಮದಲ್ಲಿ ₹17,616 ಕೋಟಿ ಮೊತ್ತದ 19 ಹೊಸ ಯೋಜನೆಗೆ ಚಾಲನೆ ನೀಡಿದರು ಹಾಗೂ ₹51,157 ಕೋಟಿ ಮೊತ್ತದ 28 ವಿವಿಧ ಯೋಜನೆಗಳಿಗೆ ಶಂಕುಸ್ಥಾಪನೆ ಮಾಡಿದರು. ಈ ಯೋಜನೆಗಳಿಂದ 1,06,803 ಹೊಸ ಉದ್ಯೋಗಗಳು ಸೃಷ್ಟಿಯಾಗಲಿವೆ ಎಂದು ತಿಳಿಸಿದರು. 

ಉದ್ಯಮಗಳು ಅಭಿವೃದ್ದಿಯ ಸಂಕೇತವಾಗಿದ್ದು, ಉದ್ಯಮಗಳಿಂದ ಉದ್ಯೋಗ ಸೃಷ್ಟಿಯಾಗಲಿದೆ. ಉದ್ಯಮಗಳು ಬೆಳೆದರೆ, ರಾಜ್ಯವೂ ಬೆಳೆಯುತ್ತದೆ. ಎಲ್ಲಾ ಉದ್ಯಮಿಗಳಿಗೆ ಹಾಗೂ ಬಂಡವಾಳ ಹೂಡಿಕೆದಾರರಿಗೆ ಧನ್ಯವಾದಗಳು ಎಂದರು. 

ಸ್ಟಾಲಿನ್‌ ಅವರು ತಮಿಳುನಾಡಿನಲ್ಲಿ ವಿದೇಶಿ ಬಂಡವಾಳ ಹೂಡಿಕೆ ಮಾಡುವಂತೆ ಹೂಡಿಕೆದಾರರು ಮತ್ತು ಉದ್ಯಮಿಗಳ ಗಮನಸೆಳೆಯಲು ಆ.27ರಂದು ಅಮೆರಿಕಗೆ ತೆರಳಲಿದ್ದಾರೆ ಎಂದು ಸರ್ಕಾರದ ಮೂಲಗಳು ತಿಳಿಸಿವೆ.