ಮನ್‌ಕಾಮೇಶ್ವರ ದೇಗುಲ: ಹೊರಗಡೆಯಿಂದ ತರುವ ಪ್ರಸಾದ ಹಂಚಿಕೆಗೆ ನಿಷೇಧ
ಲಖನೌ: ಪ್ರಸಿದ್ಧ ಮನ್‌ಕಾಮೇಶ್ವರ ಮಂದಿರವು, ಭಕ್ತರು ಹೊರಗಡೆಯಿಂದ ತರುವ ಪ್ರಸಾದ ಹಂಚಿಕೆಗೆ ನಿಷೇಧ ಹೇರಿದೆ. ಮನೆಯಲ್ಲಿ ತಯಾರಿಸುವ ‘ಪ್ರಸಾದ’ ಮತ್ತು ಹಣ್ಣುಗಳನ್ನು ಮಾತ್ರ ಹಂಚಬಹುದು ಎಂದು ಅದು ತಿಳಿಸಿದೆ.
ತಿರುಪತಿ ಲಾಡುನಲ್ಲಿ ಕಲಬೆರಕೆ ಮಾಡಿದ ಆರೋಪ ಕೇಳಿಬಂದ ಬೆನ್ನಲ್ಲೇ ಈ ನಿರ್ದೇಶನ ನೀಡಲಾಗಿದೆ.
‘ಪ್ರಸಾದ ತಯಾರಿಕೆಯಲ್ಲಿ ಯಾವುದೇ ಮಾಂಸಾಹಾರ ಪದಾರ್ಥ ಬಳಕೆ ಮಾಡದಂತೆ ಭಕ್ತಾದಿಗಳಲ್ಲಿ ಮನವಿ ಮಾಡಿದ್ದೇವೆ. ಮನೆಯಲ್ಲಿಯೇ ಮಾಡಿದ ತುಪ್ಪ, ಒಣಹಣ್ಣುಗಳು ಅಥವಾ ಹಣ್ಣುಗಳಿಂದ ಮಾಡುವ ಪ್ರಸಾದವನ್ನು ಮಾತ್ರ ವಿತರಿಸುವಂತೆ ಕೋರಿದ್ದೇವೆ’ ಎಂದು ದೇಗುಲವ ಮಹಾಂತ ದೇವ್ಯ ಗಿರಿ ಅವರು ತಿಳಿಸಿದ್ದಾರೆ.
ಎಫ್‌ಎಸ್‌ಎಸ್‌ಎಐ ವರದಿ ಬಳಿಕ ಕ್ರಮ: ನಿಧಿ ಖರೆ
ತಿರುಪತಿ ಲಾಡುನಲ್ಲಿ ಕಲಬೆರಕೆ ಆಗಿದೆ ಎಂಬ ವಿವಾದದ ಬೆನ್ನಲ್ಲೇ, ಗ್ರಾಹಕ ವ್ಯವಹಾರಗಳ ಕಾರ್ಯದರ್ಶಿ ನಿಧಿ ಖರೆ ಅವರು, ‘ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ’ದಿಂದ (ಎಫ್‌ಎಸ್‌ಎಸ್‌ಎಐ) ವರದಿ ಪಡೆದ ನಂತರ ಮಾರುಕಟ್ಟೆಯಲ್ಲಿ ಲಭ್ಯವಿರುವ ತುಪ್ಪದ ಗುಣಮಟ್ಟ ಪರಿಶೀಲನೆಗೆ ಹೆಚ್ಚುವರಿ ಕ್ರಮ ಕೈಗೊಳ್ಳಲಾಗುವುದು’ ಎಂದು ಹೇಳಿದರು.
ನರೇಂದ್ರ ಮೋದಿ 3.0 ಸರ್ಕಾರದ 100 ದಿನದ ಸಾಧನೆ ಬಗ್ಗೆ ತಿಳಿಸಲು ಕರೆದಿದ್ದ ಪತ್ರಿಕಾಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದರು.
ಹಬ್ಬದ ಸಂದರ್ಭದಲ್ಲಿ ಮುಂಜಾಗ್ರತಾ ಕ್ರಮವಾಗಿ ತುಪ್ಪದ ಗುಣಮಟ್ಟ ಪರಿಶೀಲಿಸಲಾಗುತ್ತದೆಯೇ ಎಂಬ ಪ್ರಶ್ನೆಗೆ, ‘ವರದಿ ಸ್ವೀಕರಿಸಿದ ನಂತರ ಅಗತ್ಯಬಿದ್ದರೆ ಮತ್ತಷ್ಟು ಕ್ರಮ ಕೈಗೊಳ್ಳುತ್ತೇವೆ’ ಎಂದು ಹೇಳಿದರು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.