ಇಸ್ರೊ ಅಧ್ಯಕ್ಷ ಶಿವನ್‌ಗೆ ಅಬ್ದುಲ್‌ ಕಲಾಂ ಪ್ರಶಸ್ತಿ

ಚೆನ್ನೈ: ಇಸ್ರೊ ಆಧ್ಯಕ್ಷ ಕೆ. ಶಿವನ್‌ ಅವರಿಗೆ ಗುರುವಾರ ತಮಿಳುನಾಡು ಸರ್ಕಾರ ಡಾ. ಎ.‍ಪಿ.ಜೆ. ಅಬ್ದುಲ್‌ ಕಲಾಂ ಪ್ರಶಸ್ತಿ ನೀಡಿ ಗೌರವಿಸಿತು.

ಮುಖ್ಯಮಂತ್ರಿ ಕೆ. ಪಳನಿಸ್ವಾಮಿ ಪ್ರಶಸ್ತಿ ಪ್ರದಾನ ಮಾಡಿದರು. ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರದಲ್ಲಿ ಮಾಡಿರುವ ಸಾಧನೆಯನ್ನು ಗುರುತಿಸಿ ಅವರನ್ನು ಈ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿತ್ತು.

ಸ್ವಾತಂತ್ಯ ದಿನಾಚರಣೆ ವೇಳೆ ಪ್ರಶಸ್ತಿ ಪ್ರದಾನ ಮಾಡಲು ನಿರ್ಧರಿಸಲಾಗಿತ್ತು. ಕಾರಣಾಂತರಗಳಿಂದ ಅದು ಸಾಧ್ಯ ವಾಗದ ಕಾರಣ ಸೆಕ್ರೆಟರಿಯೇಟ್‌ನಲ್ಲಿ ಪ್ರಶಸ್ತಿ ಪ್ರದಾನ ಮಾಡಲಾಯಿತು. ಪ್ರಶಸ್ತಿಯು 8 ಗ್ರಾಂ ಚಿನ್ನದ ಪದಕ, ₹5 ಲಕ್ಷ ನಗದು ಹಾಗೂ ಸ್ಮರಣಿಕೆಯನ್ನು ಒಳಗೊಂಡಿದೆ. ಕೆ. ಶಿವನ್‌ ಅವರು ಇಸ್ರೊದ ಚಂದ್ರಯಾನ– 2ರ ರೂವಾರಿಯಾಗಿದ್ದಾರೆ.