ಕೊರೊನಾ ವಿರುದ್ಧದ ಭಾರತದ ಮೊದಲ ಮದ್ದು:‘ವಿನ್ಕೋವ್–19’ನ 2ನೇ ಟ್ರಯಲ್‌ ಯಶಸ್ವಿ
ಕೊರೊನಾ ವೈರಸ್ ವಿರುದ್ಧ ಭಾರತದ ‘ಮೊದಲ ಮದ್ದು’
ಹೈದರಾಬಾದ್:‘ಸಾರ್ಸ್‌–ಕೋವ್–2’ (ಕೊರೊನಾ ವೈರಸ್) ವೈರಸ್ ಸೋಂಕಿನ ಚಿಕಿತ್ಸೆಗಾಗಿ ಅಭಿವೃದ್ಧಿಪಡಿಸಿರುವ ‘ವಿನ್ಕೋವ್–19’ ಔಷಧಿಯ 2ನೇ ಹಂತದ ಕ್ಲಿನಿಕಲ್‌ ಟ್ರಯಲ್‌ ಯಶಸ್ವಿಯಾಗಿದೆ.
ಔಷಧಿಯನ್ನು ಅಭಿವೃದ್ಧಿಪಡಿಸಿರುವ ಹೈದರಾಬಾದ್ ವಿಶ್ವವಿದ್ಯಾಲಯ, ಸಿಎಸ್‌ಐಆರ್‌–ಸಿಸಿಎಂಬಿ ಹಾಗೂ ವಿಐಎನ್‌ಎಸ್‌ ಬಯೋಪ್ರಾಡಕ್ಟ್ಸ್‌ ಲಿಮಿಟೆಡ್‌, ಕ್ಲಿನಿಕಲ್‌ ಟ್ರಯಲ್‌ ಯಶಸ್ವಿಯಾಗಿರುವ ಕುರಿತು ಮಂಗಳವಾರ ಘೋಷಣೆ ಮಾಡಿವೆ.
ಕೊರೊನಾ ವೈರಸ್ ವಿರುದ್ಧ ಭಾರತದಲ್ಲಿ ಅಭಿವೃದ್ಧಿಪಡಿಸಲಾಗಿರುವ ‘ಮೊದಲ ಔಷಧಿ’ ಇದಾಗಿದೆ ಎಂದು ಈ ಸಂಸ್ಥೆಗಳು ಹೇಳಿಕೊಂಡಿವೆ.
‘ವಿನ್ಕೋವ್–19’ನ 3ನೇ ಹಂತದ ಕ್ಲಿನಿಕಲ್‌ ಟ್ರಯಲ್‌ನ ಸಿದ್ಧತೆ ನಡೆಯುತ್ತಿದ್ದು, ಔಷಧಿಯನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಲು ಸಹ ಅನುಮತಿ ಕೋರಲಾಗಿದೆ ಎಂದು ಸಂಸ್ಥೆಗಳು ಹೇಳಿವೆ.
‘ಕೊರೊನಾ ವೈರಸ್ ಸೋಂಕಿಗೆ ಚಿಕಿತ್ಸೆ ನೀಡಲು ಅಭಿವೃದ್ಧಿಪಡಿಸಲಾಗಿರುವ ಪ್ರತಿಕಾಯಗಳಿರುವ ಈ ಔಷಧಿ ಭಾರತದಲ್ಲಿಯೇ ಮೊದಲು. ಈ ವೈರಸ್ ಸೋಂಕಿನ ಚಿಕಿತ್ಸೆಗೆ ಒಂದಕ್ಕಿಂತ ಹೆಚ್ಚು ಔಷಧಿಗಳ ಆಯ್ಕೆ ಹೊಂದಬೇಕಾಗಿರುವುದು ಅಗತ್ಯ’ ಎಂದು ಸಿಎಸ್‌ಐಆರ್‌–ಸಿಸಿಎಂಬಿ ನಿರ್ದೇಶಕ ಡಾ.ವಿನಯ್ ನಂದಿಕೂರಿ ಹೇಳಿದ್ದಾರೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.