ಮೃತರ ಕುಟುಂಬಸ್ಥರಿಗೆ ನೆರವಾಗಿ ಸಂಸದರು ವೇತನದ ಅಲ್ಪ ಭಾಗ ನೀಡಲಿ: ವರುಣ್‌ ಗಾಂಧಿ

ನವದೆಹಲಿ: ಒಡಿಶಾದ ರೈಲು ದುರಂತದಲ್ಲಿ ಮೃತಪಟ್ಟವರ ಕುಟುಂಬಸ್ಥರಿಗೆ ನೆರವು ನೀಡಲು ಸಂಸದರೆಲ್ಲರೂ ತಮ್ಮ ವೇತನದ ಅಲ್ಪ ಭಾಗವನ್ನು ನೀಡಬೇಕು ಎಂದು ಬಿಜೆಪಿ ಸಂಸದ ವರುಣ್ ಗಾಂಧಿ ಶನಿವಾರ ಮನವಿ ಮಾಡಿದರು.

‘ಸಂತ್ರಸ್ತರಿಗೆ ಮೊದಲಿಗೆ ಬೆಂಬಲ ನೀಡಬೇಕು ಅನಂತರ ನ್ಯಾಯ ಒದಗಿಸಬೇಕು. ಬರಸಿಡಿಲಿನಂಥ ಆಘಾತದಿಂದ ನೊಂದಿರುವ ಕುಟುಂಬಗಳೊಂದಿಗೆ ಜನರು ನಿಲ್ಲಬೇಕು’ ಎಂದು ಅವರು ಟ್ವೀಟ್‌ ಮಾಡಿದ್ದಾರೆ.

ಸೋನಿಯಾ ಗಾಂಧಿ ಕಂಬನಿ

‘ಒಡಿಶಾದಲ್ಲಿ ನಡೆದ ಭೀಕರ ರೈಲು ಅವಘಡದ ಸುದ್ದಿ ತಿಳಿದು ಆಘಾತ ಮತ್ತು ಸಂಕಟವಾಗುತ್ತಿದೆ. ದುರಂತದಲ್ಲಿ ಆತ್ಮೀಯರನ್ನು ಕಳೆದುಕೊಂಡ ಕುಟುಂಬಗಳಿಗೆ ಸಂತಾಪ ಸೂಚಿಸುತ್ತೇನೆ’ ಎಂದು ಕಾಂಗ್ರೆಸ್‌ ಮಾಜಿ ಅಧ್ಯಕ್ಷೆ ಸೋನಿಯಾ ಗಾಂಧಿ ಶನಿವಾರ ತಿಳಿಸಿದ್ದಾರೆ.