ಬಾಂಬ್‌ ಬೆದರಿಕೆ, ಆತಂಕ: ‘ವಿಸ್ತಾರ’ ವಿಮಾನ ಶೋಧ

ಮುಂಬೈ: ತಿರುವನಂತಪುರ –ಮುಂಬೈ ನಡುವಿನ ‘ವಿಸ್ತಾರ’ ಸಂಸ್ಥೆ ವಿಮಾನದಲ್ಲಿ ಬಾಂಬ್‌ ಇಡಲಾಗಿದೆ ಎಂಬ ಬೆದರಿಕೆ ಪತ್ರ ಲಭಿಸಿದ್ದು, ತೀವ್ರ ಶೋಧ ಕಾರ್ಯ ನಡೆಯಿತು.

‘ವಿಮಾನದಲ್ಲಿ ಬಾಂಬ್ ಇದೆ’ ಎಂದು ಬರೆಯಲಾಗಿದ್ದ ಪತ್ರವೊಂದು ವಿಮಾನದ ಸಿಬ್ಬಂದಿ ಒಬ್ಬರಿಗೆ ಸಿಕ್ಕಿತ್ತು ಎಂದು ಸಹರ್ ಪೊಲೀಸ್‌ ಠಾಣೆಯ ಅಧಿಕಾರಿಯೊಬ್ಬರು ತಿಳಿಸಿದರು.

ವಿಮಾನವು ಮುಂಬೈನ ಛತ್ರಪತಿ ಶಿವಾಜಿ ಮಹಾರಾಜ್‌ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಶುಕ್ರವಾರ ಮಧ್ಯಾಹ್ನ 3.15ಕ್ಕೆ ಇಳಿಯಿತು. ‍ವಿಮಾನಕ್ಕೆ ಬಾಂಬ್ ಬೆದರಿಕೆ ಇರುವ ಕುರಿತು ಪ್ರಯಾಣಿಕರಿಗೆ ಮಾಹಿತಿಯನ್ನು ನೀಡಿ ತಪಾಸಣೆ ನಡೆಸಲಾಯಿತು.

ತಪಾಸಣೆಯಲ್ಲಿ ಶಂಕಿತ ಯಾವುದೇ ವಸ್ತು ಲಭಿಸಿಲ್ಲ. ಬೆದರಿಕೆ ಮಾಹಿತಿ ತಿಳಿದಂತೆ ಶಿಷ್ಟಾಚಾರದ ಅನುಸಾರ ತಪಾಸಣೆ ನಡೆಸಲಾಯಿತು ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ.