ಜಮ್ಮು ಮತ್ತು ಕಾಶ್ಮೀರಕ್ಕೆ ವಿಶೇಷ ಸ್ಥಾನಮಾನ: ಅಮಿತ್‌ ಶಾ ಹೇಳಿಕೆಗೆ ಖರ್ಗೆ ಟೀಕೆ

ಪುಣೆ: ಜಮ್ಮು ಮತ್ತು ಕಾಶ್ಮೀರಕ್ಕೆ 370ನೇ ವಿಧಿಯಡಿ ವಿಶೇಷ ಸ್ಥಾನಮಾನವನ್ನು ಮರುಸ್ಥಾಪಿಸಲು ಕಾಂಗ್ರೆಸ್‌ ಬಯಸಿದೆ ಎಂದು ಪ್ರತಿಪಾದಿಸಿರುವ ಗೃಹ ಸಚಿವ ಅಮಿತ್‌ ಶಾ ಅವರ ಹೇಳಿಕೆಯನ್ನು ಟೀಕಿಸಿರುವ ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರು, ಈ ವಿವಾದಾತ್ಮಕ ನಿಬಂಧನೆಯನ್ನು ಈಗಾಗಲೇ ಸಂಸತ್ತು ರದ್ದುಗೊಳಿಸಿದೆಯಲ್ಲ ಎಂದಿದ್ದಾರೆ.

ಪುಣೆಯಲ್ಲಿ ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಸಮಾಜದಲ್ಲಿ ಒಡಕು ಮೂಡಿಸುವ ಸಲುವಾಗಿ ಬಿಜೆಪಿಯು ಈ ವಿಷಯವನ್ನು ಜೀವಂತವಾಗಿರಿಸಲು ಬಯಸಿದೆ ಎಂದು ಆರೋಪಿಸಿದರು.

‘ಕಾಂಗ್ರೆಸ್‌ನ ಯಾವ ನಾಯಕರು, ಎಲ್ಲಿ ಈ ಮಾತುಗಳನ್ನು ಹೇಳಿದ್ದಾರೆ ಎಂಬುದನ್ನು ಅಮಿತ್‌ ಶಾ ಅವರು ತಿಳಿಸಲಿ’ ಎಂದಿರುವ ಖರ್ಗೆ ಅವರು, ‘ನೀವು ಈ ಮಾತುಗಳನ್ನು ಬೇಕಿದ್ದರೆ ಕಾಶ್ಮೀರದಲ್ಲಿ ಹೋಗಿ ಹೇಳಿ. ಅಲ್ಲಿ ಈಗಾಗಲೇ ಚುನಾವಣೆ ಮುಗಿದಿದೆ’ ಎಂದಿದ್ದಾರೆ.