ಅವಹೇಳನಕಾರಿ ಬರಹ: ಬಂಧನ

ಬೆಂಗಳೂರು: ರಾಮ­ಚಂದ್ರಾ­ಪುರ ಮಠದ ರಾಘವೇಶ್ವರ ಭಾರತಿ ಸ್ವಾಮೀಜಿ ವಿರುದ್ಧ ದೂರು ದಾಖಲಿಸಿರುವ  ದಿವಾಕರ ಶಾಸ್ತ್ರಿ ದಂಪತಿಯ ಮಗಳು ಅಂಶುಮತಿ ಅವರ ಬಗ್ಗೆ ಸಾಮಾಜಿಕ ಜಾಲತಾಣ ‘ಫೇಸ್‌ಬುಕ್‌’ನಲ್ಲಿ ಅವಹೇಳ­ನ­­ಕಾರಿಯಾಗಿ ಬರೆದ ಆರೋಪದ ಮೇಲೆ ಇಬ್ಬರನ್ನು ಬನಶಂಕರಿ ಪೊಲೀಸರು ಬಂಧಿಸಿದ್ದಾರೆ.

ಹುಣಸೂರಿನ ಸನತ್‌ ಪಾಲೆಪ್ಪಾಡಿ (45) ಮತ್ತು ಶಿವಮೊಗ್ಗ ಜಿಲ್ಲೆ ತೀರ್ಥಹಳ್ಳಿಯ ಎಚ್‌.ಕೆ.ಸಂತೋಷ್‌ (30) ಬಂಧಿತರು. ‘ಸನತ್‌ ಮತ್ತು ಸಂತೋಷ್‌ ಅವರು ನನ್ನ ಬಗ್ಗೆ ಫೇಸ್‌ಬುಕ್‌­ನಲ್ಲಿ ಅವಹೇಳನ­ಕಾರಿಯಾಗಿ ಬರೆದಿದ್ದಾರೆ. ಅಲ್ಲದೇ, ನನ್ನ ಖಾಸಗಿ ಬದುಕಿಗೆ ಸಂಬಂಧಿಸಿದ ಛಾಯಾ­ಚಿತ್ರಗಳನ್ನು ಫೇಸ್‌ಬುಕ್‌ ಖಾತೆಯಲ್ಲಿ ಹಾಕಿ ಗೌರವಕ್ಕೆ ಧಕ್ಕೆ ಉಂಟು ಮಾಡಿದ್ದಾರೆ’ ಎಂದು ಆರೋಪಿಸಿ ಅಂಶುಮತಿ ಅವರು ಅ.19ರಂದು ಪೊಲೀಸರಿಗೆ ದೂರು ನೀಡಿದ್ದರು.

ಆ ದೂರು ಆಧರಿಸಿ ಸನತ್‌ ಹಾಗೂ ಸಂತೋಷ್‌ನನ್ನು ಶನಿವಾರ ಬಂಧಿಸಿ ನ್ಯಾಯಾಧೀಶರ ಮನೆಗೆ ಹಾಜರು­ಪಡಿಸಲಾಯಿತು. ನ್ಯಾಯಾಧೀಶರು ಆರೋಪಿಗಳನ್ನು ನ್ಯಾಯಾಂಗ  ಬಂಧನಕ್ಕೆ ಒಪ್ಪಿಸಿ  ಆದೇಶ  ಹೊರಡಿಸಿದ್ದು,  ಅವರಿಬ್ಬರನ್ನೂ  ಪರಪ್ಪನ  ಅಗ್ರಹಾರ ಕೇಂದ್ರ ಕಾರಾಗೃಹಕ್ಕೆ  ಕಳುಹಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಮೂಲತಃ ಸುಳ್ಯದ ಸನತ್‌ ಬಿ.ಎಸ್ಸಿ ಓದಿದ್ದು, ಹುಣಸೂರಿನಲ್ಲಿ ಕೃಷಿ ಮಾಡುತ್ತಿದ್ದ. ಬಿ.ಕಾಂ ಪದವೀಧರನಾದ ಸಂತೋಷ್‌ ನಗರದ ಖಾಸಗಿ ಕಂಪೆನಿ­ಯೊಂದರಲ್ಲಿ ಉದ್ಯೋಗಿ­ಯಾಗಿದ್ದ. ಆತ ಗಿರಿನಗರದಲ್ಲಿ ವಾಸವಾಗಿದ್ದ ಎಂದು ಪೊಲೀಸರು ಹೇಳಿದ್ದಾರೆ.

ಬಂಧಿತರ ವಿರುದ್ಧ ಮಹಿಳೆಯ ಖಾಸಗಿ ಬದುಕಿಗೆ ಸಂಬಂಧಿಸಿದ ಛಾಯಾಚಿತ್ರಗಳನ್ನು ಫೇಸ್‌ಬುಕ್‌ನಲ್ಲಿ ಹಾಕಿ ಗೌರವಕ್ಕೆ ಧಕ್ಕೆ ತಂದ ಮತ್ತು ಮಾಹಿತಿ ತಂತ್ರಜ್ಞಾನ ದುರುಪಯೋಗ ಆರೋಪದಡಿ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.