‘ಸಮಸ್ಯೆಗಳಿದ್ದರೆ ಎತ್ತಿನಹೊಳೆ ಯೋಜನೆ ಬೇಡ’

ಮಂಗಳೂರು: ಎತ್ತಿನಹೊಳೆ ಯೋಜನೆಯಿಂದ ಕರಾವಳಿ ಮತ್ತು ಪಶ್ಚಿಮ ಘಟ್ಟದ ಪರಿಸರಕ್ಕೆ ತೊಂದರೆ ಆಗುವುದಾದರೆ ಮತ್ತು ಯೋಜನೆಯಲ್ಲಿ ತಾಂತ್ರಿಕ ಅಡಚಣೆಗಳು ಇದ್ದಲ್ಲಿ ಅದನ್ನು ಕೈಬಿಡಬೇಕು ಎಂದು ಕೋಲಾರ– ಚಿಕ್ಕಬಳ್ಳಾಪುರ ಶಾಶ್ವತ ನೀರಾವರಿ ಹೋರಾಟ ಸಮಿತಿ ಒತ್ತಾಯಿಸಿದೆ.

ಭಾನುವಾರ ಕರಾವಳಿ ಜೀವನದಿ– ನೇತ್ರಾವತಿ ಸಂರಕ್ಷಣಾ ಸಮಿತಿ ಏರ್ಪಡಿಸಿದ್ದ ಸಂವಾದ ಕಾರ್ಯಕ್ರಮದಲ್ಲಿ ಭಾಗವಹಿಸಿದ ನಂತರ ಸಮಿತಿಯ ಸದಸ್ಯರೊಂದಿಗೆ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಈ ಸಮಿತಿ ಅಧ್ಯಕ್ಷ ಆರ್‌.ಆಂಜನೇಯ ರೆಡ್ಡಿ, ‘ಈ ಯೋಜನೆಯಿಂದ ಕರಾವಳಿಯ ಜನರ ಬದುಕಿನ ಮೇಲೆ ದುಷ್ಪರಿಣಾಮ ಆಗುವುದಾದರೆ ಅದನ್ನು ಬೆಂಬಲಿಸುವುದಿಲ್ಲ. ಯೋಜನೆಯಲ್ಲಿ ತಾಂತ್ರಿಕವಾದ ಅಡಚಣೆಗಳು ಇರುವುದು ನಿಜವಾದರೂ ಅದನ್ನು ವಿರೋಧಿಸುತ್ತೇವೆ’ ಎಂದರು.