ಪ್ರಚೋದನಕಾರಿ ಭಾಷಣ ಸಾಧ್ಯತೆ; ಸಂಬಾಜಿ ಭಿಡೆ ಜಿಲ್ಲಾ ಪ್ರವೇಶಕ್ಕೆ ತಡೆ

ಬೆಳಗಾವಿ: ಮಹಾರಾಷ್ಟ್ರದ ಸಾಂಗ್ಲಿಯ ಶಿವಪ್ರತಿಷ್ಠಾನ–ಹಿಂದೂಸ್ಥಾನ ಸಂಘಟನೆ ಮುಖಂಡ ಮನೋಹರ ಅಲಿಯಾಸ್ ಸಂಬಾಜಿ ಭಿಡೆ ಅವರು ಜಿಲ್ಲೆ ಪ್ರವೇಶಿಸುವುದಕ್ಕೆ ನಿರ್ಬಂಧ ವಿಧಿಸಿ ಜಿಲ್ಲಾಧಿಕಾರಿ ಎಸ್. ಜಿಯಾವುಲ್ಲಾ ಆದೇಶ ಹೊರಡಿಸಿದ್ದಾರೆ.

ಜುಲೈ 21ರ ಮಧ್ಯರಾತ್ರಿ 12ರಿಂದ ಜುಲೈ 31ರ ಮಧ್ಯಾಹ್ನ 12ರವರೆಗೆ ಜಿಲ್ಲಾ ವ್ಯಾಪ್ತಿಯ ಯಾವುದೇ ಪ್ರದೇಶಕ್ಕೆ ಅವರು ಭೇಟಿ ನೀಡುವುದಕ್ಕೆ ನಿಷೇಧ ವಿಧಿಸಲಾಗಿದೆ.

ಹುಕ್ಕೇರಿ ತಾಲ್ಲೂಕಿನ ಸಂಕೇಶ್ವರದ ಗಜಾನನ ಸಾಂಸ್ಕೃತಿಕ ಭವನದಲ್ಲಿ ಶಿವಪ್ರತಿಷ್ಠಾನ–ಹಿಂದೂಸ್ಥಾನ ಸಂಘಟನೆಯು ಜುಲೈ 21ರಂದು ಆಯೋಜಿಸಿರುವ ಕಾರ್ಯಕ್ರಮದಲ್ಲಿ ‘ರಾಯಗಡ ಸುವರ್ಣ ಸಿಂಹಾಸನದ ಇತಿಹಾಸ’ ವಿಷಯ ಕುರಿತು ಭಾಷಣ ಮಾಡಲು ಅವರನ್ನು ಆಹ್ವಾನಿಸಲಾಗಿತ್ತು.

ಭಿಡೆ ಅವರ ಪ್ರಚೋದನಕಾರಿ ಭಾಷಣದಿಂದ ದಲಿತರ ಭಾವನೆಗಳಿಗೆ ಧಕ್ಕೆಯಾಗುವ ಸಾಧ್ಯತೆ ಇದೆ. ಹೀಗಾಗಿ, ಕಾನೂನು ಮತ್ತು ಸುವ್ಯವಸ್ಥೆ ಕಾಪಾಡಲು, ಸಮಾಜದಲ್ಲಿ ಶಾಂತಿ ಕದಡದಂತೆ ನೋಡಿಕೊಳ್ಳಲು ಹಾಗೂ ಸಾರ್ವಜನಿಕ ಆಸ್ತಿಪಾಸ್ತಿ ರಕ್ಷಣೆಗಾಗಿ ಈ ನಿಷೇಧ ಹೊರಡಿಸಲಾಗಿದೆ ಆದೇಶದಲ್ಲಿ ಎಂದು ತಿಳಿಸಲಾಗಿದೆ.

ಹೋದ ವರ್ಷ ಇಲ್ಲಿನ ಸಂಭಾಜಿ ಉದ್ಯಾನದಲ್ಲಿ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಭಾಗವಹಿಸುವುದಕ್ಕೂ ಜಿಲ್ಲಾಡಳಿತದಿಂದ ಅವರಿಗೆ ಅನುಮತಿ ದೊರೆತಿರಲಿಲ್ಲ.