ಮೆಟ್ರೊ ಪ್ರಯಾಣಿಕರಿಗೆ ಒಂದು ದಿನ, ಮೂರು ದಿನದ ಪಾಸ್‌

ಬೆಂಗಳೂರು: ‘ನಮ್ಮ ಮೆಟ್ರೊ’ ಪ್ರಯಾಣಿಕರ ಅನುಕೂಲಕ್ಕಾಗಿ ಒಂದು ದಿನದ ಮತ್ತು ಮೂರು ದಿನದ ಪಾಸ್‌ಗಳನ್ನು ಬೆಂಗಳೂರು ಮೆಟ್ರೊ ರೈಲು ನಿಗಮ (ಬಿಎಂಆರ್‌ಸಿಎಲ್) ಪರಿಚಯಿಸಿದೆ.

ಏ.2ರಿಂದ ಈ ಯೋಜನೆಗೆ ಚಾಲನೆ ದೊರಯಲಿದೆ. ₹200 ದರದ ಒಂದು ದಿನದ ಪಾಸ್‌ ಖರೀದಿಸಿದವರು ಆ ದಿನ ಮೆಟ್ರೊ ರೈಲಿನಲ್ಲಿ ಅನಿಯಮಿತವಾಗಿ ಪ್ರಯಾಣಿಸಬಹುದು. ₹400 ಮೊತ್ತದ ಪಾಸ್ ಖರೀದಿಸಿದವರು ಮೂರು ದಿನ ಪ್ರಯಾಣಿಸಲು ಅವಕಾಶ ಇದೆ. ಪಾಸ್‌ಗಳು ನಿಲ್ದಾಣದ ಟಿಕೆಟ್ ಕೌಂಟರ್‌ಗಳಲ್ಲಿ ಲಭ್ಯವಿರುತ್ತದೆ. ಪ್ರಯಾಣ ಪೂರ್ಣಗೊಳಿಸಿದ ನಂತರ ಉತ್ತಮ ಸ್ಥಿತಿಯಲ್ಲಿರುವ ಸ್ಮಾರ್ಟ್‌ ಕಾರ್ಡ್‌ಗಳನ್ನು (ಪಾಸ್‌) ಗ್ರಾಹಕ ಸಂಪರ್ಕ ಕೇಂದ್ರಗಳಲ್ಲಿ ಹಿಂದಿರುಗಿಸಿದರೆ ಭದ್ರತಾ ಠೇವಣಿ ₹50 ಹಿಂಪಡೆಯಬಹುದು.